ދިވެހިރާއްޖޭގެ ސިއްހީ އަދި ވިޔަފާރީގެ ދާއިރާއަށް އަގުހުރި ޚިދުމަތްތަކެއް ކޮށްދެއްވި މާފަންނު ސައްކެޔޮގަސްދޮށުގޭ އަލްމަރުހޫމް ޑޮކްޓަރ އިބްރާހީމް ޢުމަރު މަނިކު އަވަހާރަވުމާ ގުޅިގެން، އެ ޢާއިލާއަށް ކޮކާކޯލާ ކުންފުނީގެ ފަރާތުން ތައުޒިޔާގެ މެސެޖެއް ފޮނުވައިފިއެވެ.
އެކުންފުނިން ބުނީ ޑރ.އިބްރާހިމް އުމަރު މަނިކުގެ އާއިލާ އަދި ރަހުމަތްތެރިންނާ އެކު، އެބޭފުޅާ އަވަހާރަވުމުގެ ހިތާމަ ފާޅުކުރާ ކަމަށެވެ. އަދި އެބޭފުޅާއަކީ ބައްޕައެއް، ޑޮކްޓަރެއް، ވިޔަފާރިވެރިއެއްގެ އިތުރުން ރާއްޖެއާއި ކޮކާކޯލާގެ ހަގީގީ އެމްބެސެޑަރެއްކަމަށް ކޮކާކޯލާއިން ބުންޏެވެ.
ކޮކާކޯލާ ކުންފުނިން ބުނީ ޑރ.އިބްރާހިމް އުމަރު މަނިކަކީ ވަޑައިގެންނެވި ކޮންމެ ދާއިރާއަކަށްވެސް ބޮޑެތި ބަދަލުތަކެއް ގެނެސްދެއްވާ، މުޖުތަމައުގެ މުހިންމު ބިންގަލަކަށް ވެވަޑައިގެންނެވި ބޭފުޅެއް ކަމަށެވެ. އަދި އެބޭފުޅާގެ ސަބަބުން އެހެން ފަރުދުންނާއި ވިޔަފާރިތައްވެސް ކުރިއަރައި ގޮސްފައިވާ ކަމަށް އެކުންފުނިން ވަނީ ފާހަގަކޮށްފައެވެ.
އަލްމަރްޙޫމް ޑޮކްޓަރ އިބްރާހީމް ޢުމަރު މަނިކަކީ، ރާއްޖޭގެ އެންމެ ފުރަތަމަ ހޭނައްތާ ޑޮކްޓަރެވެ. ސެންޓްރަލް ހޮސްޕިޓަލްގެ ސީނިއަރ ހައުސް އޮފިސަރ އިން އެނިސްތީޒިއާކަން ދެއްވީ 16 އޮކްޓޫބަރު 1982 ގައެވެ. ހޮސްޕިޓަލްގެ ވަޒީފާއިން 21 އޭޕްރިލް 1988 ގައި ވަކިވެވަޑައިގެންނެވިރު ހުންނެވީ ސީނިއަރ ރަޖިސްޓްރާރ އިން އެނިސްތީޒިއޮލޮޖީގެ މަގާމުގައެވެ.
އަލްމަރްޙޫމް ޑޮކްޓަރ އިބްރާހީމް ޢުމަރު މަނިކަކީ، ޔުނިވަރސަލް އެންޓަރޕްރައިޒަސް ލިމިޓެޑުގެ އެއް ޑައިރެކްޓަރުވެސް މެއެވެ. އަދި މާލޭ އެރޭޓޭޑް ވޯޓަރ ކަމްޕެނީ ޕްރައިވެޓް ލިމިޓެޑް އުފެއްދެވީވެސް އިބްރާހީމް ޢުމަރު މަނިކެވެ. ކޮކާކޯލާގެ އުފެއްދުންތައް ރާއްޖެއަށް ގެންނެވުމުގައިވެސް ވަނީ މުހިއްމު ދައުރެއް އަދާކުރައްވާފައެވެ.
އިޤްތިޞާދީ މަސައްކަތް ކުރިއެރުވުމުގެ ރޮނގުން 1998 ވަނަ އަހަރު އެ ކުންފުންޏަށްވަނީ ޢާންމު ޚިދުމަތުގެ ހިތްވަރު ދިނުމުގެ އިނާމު ސަރުކާރުން ދެއްވާފައެވެ. އެ ކުންފުނީގެ މަސައްކަތް ފުރަތަމަ ފެށުނީ 1983 ވަނަ އަހަރުއެވެ.
Advertisement
This content is created and paid for by advertisers and does not involve Voice Journalists
