ދުނިޔޭގެ ބާޒާރުގައި ސާފްނުކުރާ ތެލުގެ އަގު މިހާރު ވަރަށްބޮޑަށް ދަށަށްގޮސްފައިވާ ކަމަށާއި، އެހެންކަމުން އާއްމުނަށް ވިއްކާ ތެލުގެ އަގު ދަށް ނުވާންވީ ސަބަބެއް މިހާރު ނެތްކަމަށް އެމެރިކާގެ ރައީސް ޑޮނާލްޑް ޓްރަމްޕް ވިދާޅުވެއްޖެއެވެ.
ތެލުގެ އަގު ހެޔޮނުވެގެން އުޅޭ މައްސަލާގައި ޓްރަމްޕް އޭނާގެ އަމިއްލަ ސޯޝަލް މީޑިއާގައި ކުރި ޕޯސްޓެއްގައި ވިދާޅުވީ، މެދުއިރުމަތީގެ މަޝްރަހަށް އައި ހަމަޖެހުމާއެކު، ޕެޓްރޯލްގެ އަގު ދަށަށްދާނޭކަމަށް އުއްމީދު ކުރެވުނުކަމަށެވެ. ނަމަވެސް އެކަން އެގޮތަށް ނުދާކަމަށް ޓްރަމްޕް ފާހަގަކުރެއްވިއެވެ.
މި ޕޯސްޓްގައި ޓްރަމްޕް ވަނީ ދުނިޔޭގެ ބާޒާރުގައި ސާފްނުކުރާ ތެލުގެ އަގު ދަށްވިނަމަވެސް އާއްމުނަށް ތެއޮ ވިއްކާ ފަރާތްތަކުން އަގުހެޔޮނުކޮށް ބޮޑު އަގުގައި ވިޔަފާރިތަކުން ފައިދާ ހޯދަމުންދާކަމަށް ތުހުމަތު ކުރައްވާފައެވެ. އަދި އެމެރިކާގެ ބޮޑެތި ހަކަތަ އުފައްދާ ކުންފުނިތަކުން ބޮޑު އަގުގައި ތެއޮ ވިއްކާ މައްސަލަ ތަހުގީގުކުރުމަށްވެސް ވަނީ އަމުރުކުރައްވާފައެވެ. ނަމަވެސް އެއީ ކޮން ކުންފުނިތަކެއްކަމެއް ވިދާޅެއް ނުވެއެވެ.
އެމެރިކާގެ ތެލާއި ގޭސް އިންޑަސްޓްރީ ތަމްސީލުކުރާ 'އެމެރިކަން ޕެޓްރޯލިއަމް އިންސްޓިޓިއުޓް' (އޭޕީއައި) އިން ބުނެފައިވަނީ، ޕެޓްރޯލްގެ އަގު ބަދަލުވަމުންދަނީ ސާފުނުކުރާ ތެލުގެ އަގަށް އަންނަ ބަދަލުތަކާ އެއްވަރަކަށް ނޫން ކަމަށެވެ.
"ސާފުނުކުރާ ތެލުގެ އަގުތައް ވަރަށް ބޮޑަށް ދަށަށް އެބަދޭ! އެހެން އިބާރާތަކުން ބުނާނަމަ، ކަސްޓަމަރުންގެ އަތުން އެދަނީ ނަހަމަ ފައިދާ ނަގަމުން،" ޓްރަމްޕްގެ ޕޯސްޓްގައި ވިދާޅުވެފައި ވެއެވެ.
ތެލުގެ އަގު ހެޔޮ ނުވާ މައްސަލާ ޝަރިއަތުން ބެލުމަށް ޓްރަމްޕް އަމުރު ކުރައްވާފައިވާއިރު، ދުނިޔޭގެ ބާޒާރުގައި ހަކަތައިގެ ގޮތުގައި ބޭނުންކުރާ ތެލުގެ އަގު މިހާރު ވަނީ ވޭތުވެދިޔަ ހަތަރު މަސްދުވަހު ދަށަށް ނުދާވަރަށް ދަށަށްގޮސްފައެވެ. ދުނިޔޭގެ ބާޒާރުގައި މިއަދު ސާފްނުކުރާ ތެއޮ ފީފާއެއްގެ އަގު ހުރީ 74 ޑޮލަރަށްވުރެ ދަށުގައެވެ.
މެދުއިރުމަތީގެ މަޝްރަހް ހަމަޔަކަށް އެޅިފައިވާއިރު، އެމެރިކާ އަދި އީރާނުން އަންނަނީ ސުލްހައިގެ މުއާހަދާތައް އެކުލަވާލައި ތަންފީޒުކުރަން ތައްޔާރުވަމުންނެވެ.
Advertisement
This content is created and paid for by advertisers and does not involve Voice Journalists
