ހުޅުމާލޭގައި ހަދާފައިވާ ސްވިމިންޕޫލަކީ ކުރީގެ ރައީސް ޔާމީން އަބްދުލްޤައްޔޫމް ހަދާފައިވާ ޕްރޮޖެކްޓެއް ކަމަށް މިނިސްޓަރ އޮފް ޔޫތު ސްޕޯޓްސް އެންޑް ކޮމިއުނިޓީ އެމްޕަވަރމެންޓް އަހްމަދު މަޙްލޫފް ވިދާޅުވެއްޖެއެވެ.
ހުޅުމާލޭ ސްވިމިންޕޫލް މިއަދު ރަސްމީކޮށް އާންމުންނަށް ބޭނުންކުރެވޭނެހެން ހުޅުވުމާއި ގުޅިގެން ޕީޕީއެމްގެ ނައިބް ރައީސް އަޙްމަދު ޝިޔާމް ކުރެއްވި ޓްވީޓެއްގައި ވިދާޅުވެފައިވަނީ އެ ސްވިމިންޕޫލްގެ ކްރެޑިޓްވެސް ދެއްވަންވީ އިބްރާޙިމް މުޙައްމަދު ޞާލިޙަށްތޯ ސުވާލު ކޮށްފައެވެ.
"މިކަމުގެ ކްރެޑިތްވެސް ހަމަ ދެއްވަންވީ ރައީސް އިބްރާޙިމް މުޙައްމަދު ޞާލިޙް އަށްތޯ؟ މިހުންނަނީ އަނދުން އެޅުވޭވަރަށްވުރެ ފާޅުކަންބޮޑުކޮށް ރައީސް ޔާމީން ދިވެހި ރައްޔިތުންނަށް ވަކިން ޚާއްސަކޮށް ޒުވާން ޖީލަށް ކޮށްދެއްވާފައިހުރި ކަންކަން." ޝިޔާމްގެ ޓްވީޓްގައި ވިދާޅުވެފައިވެއެވެ.
ޝިޔާމްގެ ޓްވީޓަށް ރައްދުދެއްވަމުން މަހްލޫފް ވިދާޅުވީ، ހުޅުމާލެ ސްވިމިންޕޫލަކީ ރައީސް ޔާމީންގެ މަސައްކަތެއް ކަމަށާއި، އެކަމުގެ ކްރެޑިޓް ރައީސް ޞާލިޙް ނުނަންގަވާ ކަމަށެވެ. އަދި ރައީސް ޞާލިޙް މިހާރު މަސައްކަތް ކުރައްވަމުން ގެންދަވަނީ އޮލިމްޕިކް ސްޓޭންޑާޑް ސްވިމިންޕޫލެއް އެޅުއްވުމަށް ކަމަށް މަހްލޫފް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
