ރަހީނުކުރުމުގެ އިތުރު ހާދިސާއެއް މިއަދު ހިނގާފައިވާ ކަމަށާ އެ މީހާ ސަލާމަތްކޮށް ތުހުމަތު އޮތް މީހާ ހައްޔަރު ކޮށްފައިވާ ކަމަށް ފުލުހުން ބުނެފި އެވެ.

މި ހާދިސާގެ ރިޕޯޓް ލިބުނީ އިއްޔެ އެވެ. ފުލުހުން ބުނީ އެ މީހާ ސަލާމަތްކޮށް ކުށުގެ ވެށީން މީހަކު ހައްޔަރު ކޮށްފައިވާ ކަމަށެވެ.

އެ މީހާގެ ފޮޓޯއާ ވަނަވަރު ވެސް ވަނީ އާންމުކޮށްފަ އެވެ. އެއީ އައްޑޫ ސިޓީ ފޭދޫ، އުމުރުން 48 އަހަރުގެ އިބްރާހިމް ސައީދު އެވެ.

ހިފަހައްޓައިގެން ގެންގުޅެ އަނިޔާކޮށްފައިވާ މީހާއަށް އައިޖީއެމްއެޗްގައި ދަނީ ފަރުވާ ދެމުންނެވެ. އެއީ އުމުރުން 44 އަހަރުގެ ދިވެހި ފިރިހެނެކެވެ.

މާލޭގެ ގެއެއްގައި ރަހީނުކޮށްފައި ހުރި ބަންގްލަދޭޝްގެ ފިރިހެނަކު ވެސް ފުލުހުން މިއަދު ވަނީ ސަލާމަތްކޮށްފަ އެވެ.

ފުލުހުންގެ މީޑިއާ އޮފިޝަލް ވިދާޅުވީ، މާލޭގެ ގެއެއްގައި ހުއްދަ ނޫން ގޮތުގައި މީހަކު ބަންދުކޮށްފައި ހުރި ކަމަށް ބުނާ މައްސަލައެއް މިއަދު ހެނދުނު 6:00 ހާއިރު ފުލުހުންނަށް ރިޕޯޓްކޮށްފައިވާ ކަމަށެވެ. އަދި އެ ރިޕޯޓާ ގުޅިގެން އެ ގޭގެ ތަޅު ހަލާކުކޮށްލައިގެން ފުލުހުން އެތަނަށް ވަދެ އެ މީހާ އެތަނުން ނެރެފައިވާ ކަމަށާ އެއީ ބަންގްލަދޭޝް ފިރިހެނެއް ކަމަށެވެ. 

ފުލުހުންގެ އޮފިޝަލް އިތުރަށް ވިދާޅުވީ، އެ މީހާ އައިޖީއެމްއެޗަށް ގެންގޮސް ސިއްހީ ހާލަތު ބެލުމަށް ބަލަންޖެހޭ ކަންކަން މިހާރު ބަލަމުން އަންނަ ކަމަށެވެ. އަދި އެ މީހާއަށް ބޭރުފުށުން އެއްވެސް އަނިޔާއެއް ލިބިފައި ނެތް ކަމަށެވެ.

ނަމަވެސް މައްސަލައާއި ގުޅޭ އިތުރު ތަފްސީލެއް ނުދެ އެވެ.