ޖޫލިއަން އަސާންޖް އެމެރިކާއަށް ފޮނުވާލުމާއި މެދު ކޯޓުން މާދަމާ ގޮތެއް ނިންމަނީ

03 Jan 2021 | 17:30

އެމެރިކާ ފަދަ ގައުމުތަކުގެ ސަރުކާރުތަކުން ހިންގާފައިވާ ތުހުމަތުކުރެވޭ ސިއްރު މުއާމަލާތްތަކާ ހަނގުރާމައިގެ އަނިޔާވެރި އަމަލުތައް ފަޅާއަރުވާލި މަޝްހޫރު ވިކިލީކްސް ވެބްސައިޓްގެ ބާނީ ޖޫލިއަން އަސާންޖް އެމެރިކާއަށް ފޮނުވާލުމާއި މެދު އިނގިރޭސިވިލާތުގެ ކޯޓުން މާދަމާ ގޮތެއް ނިންމާނެއެވެ. 

އޮސްޓްރޭލިޔާއަށް ނިސްބަތްވާ އުމުރުން 49 އަހަރުގެ އަސާންޖްގެ މައްޗަށް 2010ވަނަ އަހަރުގައި ސްވިޑެންއިން ވަނީ ޖިންސީ ގޯނާގެ މައްސަަލައެއްގެ ތުހުމަތުގައި ބައިނަލްއަގްވާމީ ހައްޔަރުކުރުމުގެ އަމުރެއް ނެރެފައެވެ. ނަމަވެސް އަސާންޖް އަދި ވިކިލީކްސްއިންވެސް އޭރު ބުނެފައިވަނީ މި އަމުރަކީ އޭނާ ސްވިޑެންއަށް ގެންގޮސް، އެމެރިކާއާ ގުޅޭ ސިއްރު މައުލޫމާތުތައް އާންމުކުރި މައްސަލައިގައި އެގައުމަށް ފޮނުވާލުމަށް ކުރާ "އަސްލެއް ނެތް" ކަމެއް ކަމަށެވެ.

މި މައްސަލަ މިހެން އޮއްވާ އަސާންޖް ވަނީ 2012ވަނަ އަހަރުގެ ޖޫންމަހުގައި ލަންޑަންގައި ހުންނަ އިކުއެޑޯރގެ އެމްބަސީއަށް ވަދެ، އެތަނުގެ ސިޔާސީ ހިމާޔަތް ހޯދާފައެވެ. އެތަނުގައި ހުރެގެންވެސް އޭނާ  ދޔައީ ވިކިލީކްސްގެ މަސައްކަތްތައް ކުރަމުންނެވެ. މިހެން އޮއްވާ، ސްވިޑެންގެ ސަރުކާރުން އޭނާގެ މައްޗަށް ކުރަމުންެދިޔަ ތުހުމަތުތަކުގެ ތަހުގީގު 2019ވަނަ އަހަރުގައި ހުއްޓާލިއެވެ.

އެހެނަސް އެ އަހަރުގެ ތެރޭގައި އިކުއެޑޯރގެ ސިޔާސީ މަޝްރަހަށް އައި ބަދަލުތަކާ އެކު، އެޕްރީލްމަހުގެ ތެރޭގައި އެގައުމުން އޭނާއަށް ދީފައިވާ ހިމާޔަތް އަނބުރާ ނެގިއެވެ. މިއާއި އެކު އިނގިރޭސި ފުލުހުން އެ އެމްބަސީއަށް ވަނުމުގެ ހުއްދަ ދީ، 2012ވަނަ އަހަރު ދެވުނު ކަފާލާތާއި ޚިލާފްވިކަމަށް ބުނާ މައްސަލައެއްގައި އޭނާ ހައްޔަރުކުރެވުނެވެ. އެއަށްފަހު 50 ހަފްތާގެ ޖަލު ހުކުމެއް އޭނާގެ މައްޗަށް އިއްވުނެވެ.

އިނގިރޭސިވިލާތުގެ ޖަލުގައި އަސާންޖް ހުރިއިރު، އެމެރިކާއިން ވަނީ އެގައުމުން ބަލަމުންދާ މައްސަލައަކާ ގުޅިގެން އޭނާ އެގައުމަށް ފޮނުވައިދޭން ނުވަތަ އެކްސްޓްރަޑައިޓް ކޮށްދޭން އިނގިރޭސި ސަރުކާރުގެ ކިބައިން ރަސްމީކޮށް އެދިފައެވެ. 

މިފަދައިން މައުލޫމާތު ހާމަކުރި މައްސަލައެއްގައި އެކްސްޓްރަޑައިޓް ކޮށްދޭން އެދުމަކީ މިނިވަން މީޑިޔާގެ މަސައްކަތަށް އެޅޭ ހުރަހެއްގެ ގޮތުގައި ބައިނަލްއަގްވާމީ އެހެން މީޑިޔާތަކާ މަދަނީ ޖަމްއިއްޔާ ޖަމާއަތްތަކުން ވަނީ ސިފަކޮށްފައެވެ. އަދި މިފަރާތްތަކުން ވަނީ އަސާންޖް އެމެރިކާއަށް އެކްސްޓްރަޑައިޓް ނުކުރުމަށާއި، އޭނާއާ ދެކޮޅަށް އުފުލިފައިވާ ދައުވާތައް އަނބުރާ ގެންދަންވެސް އެދިފައެވެ.

މި މައްސަލައިގައި އިނގިރޭސިވިލާތުގެ ކޯޓުން މާދަމާ ގޮތެއް ނިންމާނެއެވެ. ނަމަވެސް އަސާންޖް އެމެރިކާއަށް ފޮނުވާލުމުގެ މައްސަލައާ މެދު ފަހު ގޮތެއް ނިންމުމުގެ ބާރު އޮންނާނީ އިނގިރޭސިވިލާތުގެ ހޯމް ސެކްރެޓަރީ ޕްރީތީ ޕަޓޭލްގެ އަތްޕުޅުގައެވެ.

އަދި އެކްސްޓްރަޑީޝަންގެ ހުކުމެއް ކޯޓުން އައިކަމުގައި ވީނަމަވެސް އެކަން ފުރިހަމަވާން ދުވަސްތަކެއް ނަގާނެކަމަށް ބައެއް ފަރާތްތަކުން ވަނީ ލަފާކޮށްފައެވެ. އަސާންޖްގެ ބައިވެރިޔާ އަދި އޭނާގެ ދެކުދިންގެ މަންމަ ޓްވިޓަރ މެދުވެރިކޮށް ވަނީ އަސާންޖަށް މައާފު ދިނުމަށް އެމެރިކާގެ ރައީސް ޑޮނަލްޑް ޓްރަމްޕްގެ ކިބައިން އެދިފައެވެ.

Advertisement

ކޮމެންޓް

Advertisement