ފަލަސްތީނުގެ ބިންތައް ގަދަކަމުން ފޭރި، އެގައުމުގެ މުސްލިމުން ޝަހީދުކުރަމުންދާ ނިރުބަވެރި އިސްރާއީލާއެކު ސަލާމަތީ އެއްބަސްވުމެއް ގާއިމުކުރުމަށް ސޫރިޔާއިން މަސައްކަތް ކުރަމުންދާ ކަމަށް އެގައުމުގެ ރައީސް އަޙްމަދު އަލްޝަރަޢު ވިދާޅުވެއްޖެއެވެ.

އާދީއްތަ ދުވަހު އަލްޖަޒީރާއަށް ދެއްވި ބަސްދީގަތުމެއްގައި ރައީސް ޝަރަޢު ވިދާޅުވީ، މިފަދަ އެއްބަސްވުމެއްގެ ސަބަބުން ދެ ގައުމުގެ ދެމެދުގައި ފުރިހަމަ ސުލްހައަކަށް މަގުފަހިވެގެންދާނެ ކަމަށެވެ.

ރައީސް ޝަރަޢު ފާހަގަކުރެއްވި ގޮތުގައި، މި އެއްބަސްވުމަކަށް ދިޔަ ނަމަވެސް، 1967 ވަނަ އަހަރު އިސްރާއީލުން ހިފާފައިވާ ގޯލާން ހައިޓްސްގެ މައްޗަށް ސޫރިޔާއަށް އޮތް ހައްގުތައް ދޫކޮށް ނުލާނެއެވެ. އަދި އިސްރާއީލުން ސޫރިޔާއާ މެދު ގެންގުޅޭ ސިޔާސަތުތައް ހަމަހަމަ ކުރުމަށްޓަކައި ބައިނަލްއަގުވާމީ ގިނަ ގައުމުތަކެއް މެދުވެރިކޮށް އިސްރާއީލަށް ފިއްތުންތައް ކުރިމަތިކުރުވަން މަސައްކަތް ކުރައްވާ ކަމަށްވެސް ވިދާޅުވިއެވެ.

2024 ވަނަ އަހަރުގެ ޑިސެމްބަރު މަހު ބައްޝާރުލް އަސަދުގެ ސަރުކާރު ވެއްޓުމާއެކު، އިސްރާއީލު ސިފައިން ވަނީ ސޫރިޔާގެ ބައެއް ސަރަހައްދުތަކަށް އަރައި، ދިމިޝްގު ފެންނަ ހިސާބުގައި އޮންނަ މައުންޓް ހާމަން ފަދަ މުހިންމު ތަންތަން ހިފާފައެވެ. އޭގެ ފަހުން އިސްރާއީލުން ދަނީ ސޫރިޔާގެ އެކި ސަރަހައްދުތަކަށް ހަމަލާދީ، މީހުން ހައްޔަރުކުރަމުންނެވެ. އެންމެ ފަހުން އާދީއްތަ ދުވަހުވެސް އިސްރާއީލުން ވަނީ ސޫރިޔާގެ މާރިފާ އަވަށުގެ ކަރަންޓު ޓްރާންސްފޯމަރަކަށް ހަމަލާދީ، އެ އަވަށުން ކަރަންޓުގެ ހިދުމަތް މެދުކަނޑާލާފައެވެ.

"އަޅުގަނޑުމެން މަސައްކަތް ކުރަނީ ކުރިމަތިލުންތަކުން ދުރުހެލިވާން،" ޝަރަޢު ވިދާޅުވިއެވެ.

2024 ވަނަ އަހަރުގެ ޑިސެމްބަރު މަހު ބައްޝާރުލް އަސަދުގެ ސަރުކާރު ވެއްޓުމާއެކު، އިސްރާއީލު ސިފައިން ވަނީ ސޫރިޔާގެ ބައެއް ސަރަހައްދުތަކަށް އަރައި، ދިމިޝްގު ފެންނަ ހިސާބުގައި އޮންނަ މައުންޓް ހާމަން ފަދަ މުހިންމު ތަންތަން ހިފާފައެވެ. އޭގެ ފަހުން އިސްރާއީލުން ދަނީ ސޫރިޔާގެ އެކި ސަރަހައްދުތަކަށް ހަމަލާދީ، މީހުން ހައްޔަރުކުރަމުންނެވެ. އެންމެ ފަހުން އާދީއްތަ ދުވަހުވެސް އިސްރާއީލުން ވަނީ ސޫރިޔާގެ މާރިފާ އަވަށުގެ ކަރަންޓު ޓްރާންސްފޯމަރަކަށް ހަމަލާދީ، އެ އަވަށުން ކަރަންޓުގެ ހިދުމަތް މެދުކަނޑާލާފައެވެ.

ރައީސް ޝަރަޢުގެ މިފަދައިން ވިދާލުވެފައި މިވަނީ، އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް ސޫރިޔާއަށް ކުރައްވަމުން ގެންދަވާ ދަތުރުފުޅާ ދިމާކޮށެވެ. މިއީ 2009 ވަނަ އަހަރުގެ ފަހުން އދ. ގެ އެންމެ އިސްވެރިޔަކު ސޫރިޔާއަށް ކުރެއްވި ފުރަތަމަ ދަތުރުފުޅެވެ.

އެކްސްގައި ކުރެއްވި ޕޯސްޓެއްގައި ގުޓަރޭޒް ވަނީ ސޫރިޔާގެ މިނިވަންކަމާއި އިސްތިގުލާލަށް އިހުތިރާމް ކުރުމަށް ގޮވާލައްވައި، 1974 ވަނަ އަހަރުގެ އެއްބަސްވުމާ އިސްރާއީލުން ހިލާފުވާ ހިލާފުވުންތައް ހުއްޓާލުމަށް ގޮވާލައްވާފައެވެ.

މީގެ އިތުރުން، ލުބުނާނުގެ ހިޒްބުالله އާ ދެކޮޅަށް އަސްކަރީ އެއްވެސް ހަރަކާތެއް ހިންގުމަށް ގަސްދުނުކުރައްވާ ކަމަށް ރައީސް ޝަރަޢު ވިދާޅުވިއެވެ. ނަމަވެސް، އެމެރިކާގެ ރައީސް ޑޮނަލްޑް ޓްރަމްޕް މީގެ ކުރިން ބުނެފައިވަނީ ހިޒްބުالله އާ ދެކޮޅަށް މަސައްކަތް ކުރުމާ ގުޅޭގޮތުން ރައީސް ޝަރަޢުއާ މަޝްވަރާ ކޮށްފައިވާ ކަމަށެވެ.

ސޫރިޔާގެ އާ ސަރުކާރުން ބުނީ ސަރުކާރުން މިހާރު މަސައްކަތް ކުރަމުންދަނީ 14 އަހަރުވީ ހަނގުރާމައަށްފަހު، އެގައުމުގެ ބައިނަލްއަގުވާމީ ގުޅުންތައް އާލާކޮށް އިގުތިސާދު އާރާސްތު ކުރުމަށް ކަމަށެވެ.