ސަފާރީ ރޭޕް ކޭސް: ޝާންގެ މައްޗަށް ތިން ދައުވާކޮށްފި

12 Jan 2021 | 01:20

މިދިޔަ އަހަރުގެ ޖޫންމަހުގެ ތެރޭގައި ހުޅުމާލޭގެ ފަޅުގައި އަޅާފައި އޮތް ސަފާރީއެއްގައި ބިދޭސީ އަންހެނަކު ރޭޕް/ ޖިންސީ ގޯނާކުރަން އުޅުނު މައްސަލައިގައި މީހެއްގެ މައްޗަށް ހުޅުމާލޭ މެޖިސްޓްރޭޓް ކޯޓުގައި މިދިޔަ ބުދަ ދުވަހު ދައުވާ އުފުލައިފިއެވެ.

ޕްރޮސެކިއުޓަރ ޖެނެރަލްގެ އޮފީހުން މައުލޫމާތުދޭ ގޮތުގައި އެ މައްސަލައިގައި ދައުލަތުން ދައުވާކޮށްފައިވަނީ ލ. ގަން، ތުނޑި، ނޫރަންގެ ޝާންގެ މައްޗަށް ކަމަށެވެ.

މި މައްސަލައިގައި ދައުލަތުން ވަނީ ޝާންގެ މައްޗަށް ތިން ދައުވާއެއް އުފުލާފައެވެ. އެއީ ޖިންސީ ގޯނާކުރުމުގެ ކުށުގެ ދައުވާ، އަނިޔާއެއް ދީފާނެކަމުގެ ބިރުދެއްކުމުގެ ކުށުގެ ދައުވާ އަދި ގައިގައި އަތްލުމުގެ ކުށުގެ ދައުވާއެވެ. މި މައްސަލައިގައި ފުލުހުން ވަނީ އެހެން ދެ މީހެއްގެ މައްޗަށް ދައުވާކޮށްދޭންވެސް ޕީޖީ އޮފީހުގައި އެދިފައެވެ.

ނަމަވެސް އެ މީހުންގެ މައްޗަށް ދައުވާ ސާބިތުކުރެވޭނެ ވަރަށް ހެކި ނެތްކަމަށް ޕީޖީން ވަނީ ފާހަގަކޮށްފައެވެ.

ޝާންގެ މައްޗަށް އުފުލާފައިވާ ހުރިހާ ދައުވާއެއް ސާބިތުވެއްޖެނަމަ ދިގު މުއްދަތެއްގެ ޖަލުހުކުމެއް އައުމަކީ އެކަށީގެންވާ ކަމެކެވެ އޭނާއަކީ ރައްޔިތުންގެ މަޖިލީހުގެ ހިންނަވަރު ދާއިރާގެ މެންބަރު ޖީހާން މަހުމޫދުގެ ފިރިކަލުންނެވެ.

Advertisement

ކޮމެންޓް