ޗައިނާގެ މީހުންނަކީ "ލޯ ކުޑަ" ބައެއްކަމަށް ބުނެ ޝިޔާން ފުރައްސާރަކޮށްފި

08 Feb 2021 | 20:02

މިއަދުގެ ރައްޔިތުންގެ މަޖިލީހުގެ ޖަލްސާގެ ތެރެއިން، ޗައިނާގެ މީހުންނަށް ނަސްލީގޮތުން އިހުތިރާމްކުޑަވާ ފަދަ ގޮތަކަށް ތޮއްޑޫ ދާއިރާގެ މެންބަރު ހަސަން ޝިޔާން ވާހަކަދައްކަވައިފިއެވެ.

އެބޭފުޅާ މިފަދަ މޭރުމަކުން ވާހަކަދެއްކެވީ މިއަދުގެ ރައްޔިތުންގެ މަޖިލީހުގެ ޖަލްސާއަށް ހުށައެޅުނު މާލޭގައި އިޖްތިމާއީ މަރުކަޒުތައް ގާއިމްކުރުމަށް ގޮވާލާ ގަރާރުގެ ބަހުސް މަރުހަލާގެ ތެރެއިން ވާހަކަ ދައްކަވަމުންނެވެ.

މި ބަހުސްގެ ތެރެއިން މާވަށު ދާއިރާގެ މެންބަރު މުހައްމަދު ސައީދު ވަނީ މި ސަރުކާރުން ހަދާފައިވާ ލޮނުޒިޔާރަތް ޕާކަށް ފާޑުވިދާޅުވެފައެވެ. އެގޮތުން އެތަނުގައި ހައްދާފައިވާ ވިނަގަނޑު މައްޗަށް އަރާލަން ތުއްތު ކުދިންނަށް ފުރުސަތު ނުދޭކަމަށް ސައީދު ވަނީ ވިދާޅުވެފައެވެ.

މިކަމަށް ރައްދުދެއްވައި ނިޒާމީ މައްސަލައެއް ނަންގަވައި ތޮއްޑޫ ދާއިރާގެ މެންބަރު ޝިޔާން ވަނީ ރައްޔިތުންނަށް ކަންކަން އޮޅޭ ގޮތަށް ސައީދު ވާހަކަ ދައްކަވަމުން ގެންދަވާކަމަށް ވިދާޅުވެފައެވެ. އެގޮތުން މިދިޔަ ހަފްތާގައި ޝިޔާންގެ ދެ ދަރިން ގޮވައިގެން އެޕާކަށް ވަޑައިގެންނެވިއިރު، އެ ކުދިންނަށް ވިނަގަނޑު މައްޗަށް އެރުނުކަމަށް ވަނީ ވިދާޅުވެފައެވެ. އަދި ރައީސް ޔާމީންގެ ސަރުކާރުން ތަރައްގީކުރި ރަސްރަނި ބަގީޗާގައި ބެހެއްޓީ ޗައިނާގެ ފޭކު ގަސްކަމަށް އެބޭފުޅާ ވިދާޅުވިއެވެ.

"އެތާނގަ ބެހެއްޓީ ޗައިނާގެ ފޭކު ޕްލާސްޓިކް ގަސް. ކޮން ކަމެއް އޮޅުވާލަން މިއުޅެނީ؟ ޗައިނާގެ ކުދިކުދި ލޯ ހުންނަ މީހުންނަށް ދައްކާ ކަހަލަ އެއްޗެހި އައިސް މިތާނގަ އަޅުގަނޑުމެންގެ ދަރިންނަށް ދައްކަން އުޅޭނެކަމެއް ނެތް"، ޝިޔާން ވިދާޅުވިއެވެ.

އެބޭފުޅާ މިހެން ވިދާޅުވުމާއި އެކު އެވަގުތު ރިޔާސަތުގައި އިންނެވި މަޖިލީހުގެ ނައިބު ރައީސް އީވާ ވަނީ އެކަން ހުއްޓުވައި ކުށްވެރިކުރައްވާފައެވެ. އަދި އެއްވެސް ގައުމެއްގެ ބައެއްގެ ނުވަތަ ނަސްލެއްގެ ސިފައާ ބެހިގެން ނުވާނެކަމަށް ވިދާޅުވެފައެވެ.  

Advertisement

ކޮމެންޓް