އުތުރުތިލަފަޅު އެއްބަސްވުން މަޖިލީހަށް ގެންނަން ތާއީދެއް ނުކުރަން: ރޮޒައިނާ
އުތުރުތިލަފަޅުގައި ޑޮކްޔާޑަކާއި ބަނދަރެއް ތަރައްޤީކުރުމާ ގުޅޭ ގޮތުން ދިވެހިރާއްޖެއާއި އިންޑިޔާގެ ދެމެދުގައި ހަދާފައިވާ އެއްބަސްވުން ރައްޔިތުންގެ މަޖިލީހަށް ގެންނަން ތާއީދު ނުކުރައްވާ ކަަމަށް އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެއެވެ.
އުތުރުތިލަފަޅުގެ އެއްބަސްވުމުގެ ދެލިކޮޕީއެއް ކަމަށް ބުނާ ލިޔުމެއް ލީކުވެފައިވާއިރު، މިއަދު މަޖިލީހަށް އެ ލިޔުމަކީ ސައްޙަ ލިޔުމެއް ނޫންކަމަށް ބުނެ، އެ ލިޔުމާ ގުޅިގެން ވާހަކަދައްކަމުންދާ ފަރާތްތަކާމެދު ފިޔަވަޅުއެޅުމަށް ގޮވައިލާ ރައްޔިތުންގެ މަޖިލީހުގެ އަލިފުށީ ދާއިރާ މެންބަރު މުޙައްމަދު ރަޝީދު (ބިގޭ)ވަނީ ކުއްލި މައްސަލައެއް ހުށަހަޅުއްވާފައެވެ.
އެ މައްސަލައިގެ ބަހުސްގައި ވާހަކަދައްކަވަމުން ރޮޒައިނާ ވިދާޅުވީ ރައްޔިތުންގެ މަޖިލީހަކީ ސިއްރިއްޔާތު ނުހިފަހެއްޓޭ ތަނެއް ކަމަށާއި، މަޖިލީހަށް ލިބޭ ސިއްރު ލިޔެކިޔުންތައް ލީކުވެފައިވާ ކަމަށެވެ. އަދި ސިއްރުކޮށްގެން ބާއްވާ ކޮމިޓީ ބައްދަލުވުންތަކުގައި ދައްކާ ވާހަކަތައްވެސް ލީކުވެފައިވާ ކަމަށް އޭނާ ވިދާޅުވިއެވެ. އެހެންކަމުން މަޖިލީހަށް ސިއްރިއްޔާތު ހިފަހައްޓަންޖެހޭ ލިޔުމެއް ގެންނަން ތާއީދުނުކުރައްވާ ކަމަށްވެސް ރޮޒައިނާ ވިދާޅުވިއެވެ.
އުތުރުތިލަފަޅު އެއްބަސްވުމުގެ ސޮއިކުރި އަސްލު ލިޔުން ރައްޔިތުންނަށް ހާމަ ކުރުމަށް ގިނަ ބަޔަކު ދަނީ ގޮވާލަމުންނެވެ.
Advertisement
This content is created and paid for by advertisers and does not involve Voice Journalists