އަބްދުރަހީމަށް ޔުމްނާ: ޕާޓީ އަތުލައި 8 މަސް ޖަލުގައި ބެހެއްޓީ މައުމޫން ޒާތީވެގެންތޯ؟
ޕާޓީއަތުލައި 8 މަސް ވަންދެން ޖަލުގައި ބެހެއްޓީ ކުރީގެ ރައީސް މައުމޫން އަބަދުލް ޤައްޔޫމް ޒާތީވެގެންތޯ މައުމޫންގެ ދަރިކަނބަލުން ޔުމްނާ މައުމޫން ވިދާޅުވެއްޖެއެވެ.
އެކަމަނާ މިހެން ވިދާޅުވެފައިމިވަނީ ކުރީގެ ރައީސް މައުމޫނަށް ވުރެ ޒާތީ ބޭފުޅެއް ނުދެކޭކަމަށް ޕީޕީއެމްގެ ނައިބް ރައީސް އަދި ފޮނަދޫ ދާއިރާގެ މެންބަރު އަބްދުރަހީމް އަބްދުﷲ ވިދާޅުވުމުން އެކަމަށް ރައްދު ދެއްވައި ކުރެއްވި ޓުވީޓެއްގައެވެ.
އަބްދުރަހީމް ދުވަހު ނޫހަކަށް ދެއްވި ބަސްދީގަތުމުގައި ވިދާޅުވިގޮތުގައި މައުމޫންއާ ވަރަށް ގާތުން އޭނާ އަކީ މަސައްކަތް ކުރި މީހެއްކަމުން އެމަނިކުފާނު ވަރަށް ރަނގަޅަށް އެނގިވަޑައިގަންނަވާނެކަމަށެވެ.
"މައުމޫނަށް ވުރެ ޒާތީ ބޭފުޅެއް އަޅުގަނޑު ނުދެކެން ރާއްޖެ އިން. އެއަށް ވުރެ ހިތުގަ ފިތުނަވެރިކަން އޮވެގެން ހަސަދަވެރިކަމާ އެކީގަ މަސައްކަތް ކުރައްވާ ޒާތީ ސިޔާސީ ބޭފުޅެއް ނުދެކެން" އަބްދުރަހީމް ވިދާޅުވިއެވެ.
މައުމޫންގެ އެއްބަފާ ކޮއްކޯފުޅުގެ ވެރިކަމުގައި ވަނީ މައުމޫން ޖަލައްލައި ޕީޕީއެމްގެ ރައީސް ކަމުން މައުމޫން ދުރުކުރައްވާފައެވެ. އަދި މައުމޫންގެ ސިއްހީ ހާލަތާ ބެހޭގޮތުން ބޮޑެތި ކަންބޮޑުވުންތަކެއް އާއިލާއިންނާއި ވަކީލުން ފާޅުކުރައްވަމުން ގެންދެވިއިރުވެސް މައުމޫންވަނީ ޖަލުގައި 8 މަސް ވަންދެން ބަހައްޓާފައެވެ.
Advertisement
This content is created and paid for by advertisers and does not involve Voice Journalists
