އިޒްރާއީލުން ދެމުންދާ އުދުވާނީ ހަމަލާތަކާ ގުޅިގެން މި ވަގުތު ހާލުގައި ޖެހިފައިވާ ފަލަސްޠީނާ އެކު ދިވެހިރާއްޖެ ތިބި ކަން ރަމްޒުކޮށް ދިނުމަށް ބާއްވާ ޚާއްޞަ ހަރަކާތެއް މިއަދު 4 ޖަހާއިރު ފަށަން ތައްޔާރު ވެއްޖެއެވެ.

ދިވެހި ޒުވާނުންތަކެއް އިސްނަގައިގެން މިއަދު ހަވީރު ބާއްވާ މި ހަރަކާތާއި ބެހޭ ގޮތުން ހަރަކާތް އިންތިޒާމުކުރާ ފަރާތުން މަޢުލޫމާތު ދެމުން އެ ޓީމުގެ މެންބަރެއް ބުނީ، މި ކަން ފެށުނީ ޓްވިޓާގައި 4 ވަރަކަށް މެންބަރުންގެ ގްރޫޕެއް ހަދައި ޣައްޒާގެ ހާލާ މެދު ހަމްދަރުދީ އުފެދި ޝެއާ ކުރި ޓްވީޓްތަކަކާ ހިސާބުން ކަމަށެވެ. އަދި ޓީމުގެ މެންބަރުން މިހާރު އިތުރުވެ ގިނަ ބައެއްގެ ތަރުޙީބު ލިބެމުންދާކަމަށް އޭނާ ބުންޏެވެ.

ކޮވިޑް-19 ގެ ހާލަތަށް ބަލައި މި ހަރާކާތް ކުރިޔަށް ގެންދިޔުމަށް ހަމަޖެހިފައިވަނީ ގޭގެ ބެލްކަނި އަދި ދޮރު މައްޗަށް ނުކުމެ ފަލަސްޠީނުގެ ދިދަ އާއި ދިވެހި ރާއްޖޭގެ ދިދަ ވިހުރާލާ ގޮތަށެވެ.

މީގެ އިތުރުން ކާފިއު ވަގުތު ފެށުމުގެ ކުރިންވެސް މިއަދު ކާރުތަކާއި ޓެކްސީ އަދި ޕިކަޕުތަކުގައި ވެސް ދިދަ ހަރުކޮށްގެން ދުވަން ހަމަޖެހިފައިވާކަމަށް އެފަރާތުން މަޢުލޫމާތު ދެއެވެ.

މި ހަރަކާތަށް އެހީތެރިވުމުގެ ގޮތުން ގިނަ ބަޔަކު ދިދަ ޕްރިންޓްކޮށް، އަދި ފަހައިދީފައިވާ ކަމަށާއި މިހާތަނަށް ލިބުނު ގިނަ ދިދަތައް މީހުންނަށް ބަހާފައި ވާނެ ކަމަށް ހަރަކާތް އިންތިޒާމު ކުރާ ފަރާތުން ބުނެފައިވެއެވެ.

މި އިވެންޓް ކުރިއަށް ދާނީ މާލެއާއި ހުޅުމާލޭގައި މިއަދު ހަވީރު 4:00 އިން 6:00 އާ ދެމެދެވެ. މި ވަގުތުގައި ހުރިހާ ގެއެއްގެ ބެލްކަނިތަކުން ބޭރަށް ނުކުމެ ފަލަސްޠީނުގެ ދިދަ ހޫރާލުމަށް ވަނީ ހަމަޖެހިފައެވެ. އަދި މި އިވެންޓުގައި ވީހާވެސް ގިނަ މީހުން ބައިވެރިވުމަށް އިވެންޓު އޯގަނައިޒް ކުރި ޓީމުން އެދެއެވެ.

ކުރިއަށް އޮތް ތަނުގައި ވެސް މިފަދަ އިވެންޓުތައް ކުރިއަށް ގެންދިއުމަށް އެ ޓީމުން ނިންމާފައިވާ ކަމަށާއި މިއީ އަދި ފެށުން ކަމަށް ވެސް އެ ޓީމުން ބުނެއެވެ.

މި ހަރަކާތް ވައިގާ ހިފާ ގިނަ ބައެއްގެ ތަރުޙީބު ލިބެމުންދާއިރު، ރާއްޖޭގެ މަޝްހޫރު އެކި ފަރާތްތަކުންވެސް އަންނަނީ މި ހަރަކާތުގައި ބައިވެރިވާނެކަން ހާމަ ކުރަމުންނެވެ.