ފޯނު ނަމްބަރު ހާމަނުކޮށް ޔޫޒަރނޭމް ބޭނުންކޮށްގެން މުއާމަލާތް ކުރެވޭ ގޮތަށް ތައާރަފްކުރަން އުޅޭ އާ ފީޗަރ ނެރުން މަޑުޖައްސާލުމަށް އިންޑިއާ ސަރުކާރުން މެޓާ ކުންފުނީގެ ވަޓްސްއަޕަށް އަންގައިފިއެވެ.
މިފަދައިން އަންގާފައިވަނީ މި ފީޗަރގެ ސަބަބުން އޮންލައިން ފްރޯޑާއި ފިޝިންގް ފަދަ ސައިބަރ ކުށްތައް އިތުރުވެދާނެ ކަމުގެ ބިރު އޮތުމުން ކަމަށް ބުނެފައިވެއެވެ.
އިންޑިއާގެ މިނިސްޓްރީ އޮފް އިލެކްޓްރޯނިކްސް އެންޑް އިންފޮމޭޝަން ޓެކްނޮލޮޖީން މިދިޔަ ބުދަ ދުވަހު ވަޓްސްއަޕަށް ފޮނުވި ނޯޓިސްއެއްގައި ބުނެފައިވަނީ، ކުށްވެރިން އެމީހުންގެ އަސްލު ފޯނު ނަމްބަރު ފޮރުވައިގެން މީހުންނަށް އޮޅުވާލުމުގެ ފުރުސަތު މި ފީޗަރގެ ސަބަބުން ބޮޑުވާނެ ކަމަށެވެ. އަދި ސަރުކާރުގެ އިދާރާތަކާއި، މާލީ މުއައްސަސާތަކުގެ ނަމުގައި ފޭކް ޔޫޒަރނޭމްތައް ހަދައިގެން އޮޅުވާލުމުގެ ފުރުސަތު އޮތް ކަމަށްވެސް މިނިސްޓްރީން ފާހަގަކޮށްފައިވެއެވެ.
މިކަމާ ގުޅިގެން ވަޓްސްއަޕުން ބުނެފައިވަނީ މި ފީޗަރ އަދި އާންމުކޮށް ދޫކޮށްލާފައި ނުވާ ކަމަށާއި، މީހުންގެ ނަމުގައި އޮޅުވާލައިގެން އެކައުންޓް ހެދުން ހުއްޓުވުމަށް ގިނަ ފިޔަވަޅުތަކެއް އަޅާފައިވާނެ ކަމަށެވެ. މީގެ ތެރޭގައި މަޝްހޫރު ފަރާތްތަކާއި ސަރުކާރުގެ އިދާރާތަކުގެ ނަންތައް ރިޒާވްކުރުން ހިމެނެއެވެ. އަދި އައު މީހަކު މެސެޖު ކުރުމުން އެއީ ކޮން ފަދަ އެކައުންޓެއްކަން އަންގައިދޭ މައުލޫމާތު ލިބޭނެ ގޮތް ހަދާފައިވާނެ ކަމަށްވެސް މެޓާއިން ބުނެއެވެ.
އިންޑިއާއަކީ ވަޓްސްއަޕްގެ އެންމެ ބޮޑު މާކެޓެވެ. އެ ގައުމުގައި 850 މިލިއަނަށްވުރެ ގިނަ މީހުން ވަޓްސްއަޕް ބޭނުންކުރެއެވެ. އިންޑިއާގެ ތަފާސްހިސާބުތަކުން ދައްކާގޮތުގައި 2024 ވަނަ އަހަރު އެކަނިވެސް 102,000 އަށްވުރެ ގިނަ ސައިބަރ ކުށްތައް ރިޕޯޓްކޮށްފައިވާއިރު، މީގެ ތެރެއިން ގިނައީ އޮންލައިންކޮށް ފައިސާގެ މުއާމަލާތްތަކުގައި އޮޅުވާލުމުގެ މައްސަލަތަކެވެ.
ނަމަވެސް، ޑިޖިޓަލް ރައިޓްސް ޖަމްއިއްޔާއެއް ކަމަށްވާ 'އިންޓަނެޓް ފްރީޑަމް ފައުންޑޭޝަން' އިން ވަނީ ސަރުކާރުގެ މި ނިންމުމަށް ފާޑުކިޔާފައެވެ. އެ ޖަމްއިއްޔާއިން ބުނާގޮތުގައި ކުންފުންޏަކުން ތައާރަފްކުރާ ފީޗަރތައް ހުއްޓުވުމުގެ ގާނޫނީ ބާރު ސަރުކާރަށް ލިބިގެން ނުވެއެވެ.
Advertisement
This content is created and paid for by advertisers and does not involve Voice Journalists
