ރާޅާ ދެކޮޅަށް ފަތާށާއި އަމާޒަށް ތީރު ޖަހަން ދަސްކުރި މީހެއްގެ މައްޗަށް ނިރުބަވެރިކަމުގެ އަމަލެއް ކުރުމަށް ބޭނުންވާ އުކުޅުތައް ދަސްކުރިކަމުގެ ކުށުގެ ދައުވާ އުފުލައިފިއެވެ.

ދައުލަތުން މި ދައުވާ ކޮށްފައިވަނީ ތ. ތިމަރަފުށި، ކެނެރީގެ، ޢަލީ މުނީޒު، 28، ގެ މައްޗަށެވެ. އޭނާ އަކީ ތ. ތިމަރަފުށީގައި ހަރުކަށި ފިކުރު ފަތުރާ، ހަމަލާދޭން އުޅުނު މައްސަލައާއި ގުޅިގެން ހައްޔަރު ކުރި މީހުންގެ ތެރެއިން އެކަކަށް ވާއިރު، ދައުލަތުން އޭނާގެ މައްޗަށް އުފުލާފައިވާ ނިރުބަވެރިކަމުގެ ދައުވާގެ އަޑުއެހުމެއް މިއަދު ކްރިމިނަލް ކޯޓުގައި ވަނީ ބާއްވާފައެވެ.

މިއަދު އޮތް އަޑުއެހުމުގައި ދައުލަތުން ބުނެފައިވާ ގޮތުގައި މުނީޒު ވަނީ 2019 ގެ ކުރީކޮޅުން ފެށިގެން ތިމަރަފުށީގައި ހަރުކަށި ފިކުރު ފެތުރުމުގެ މަސައްކަތް ކޮށްފައެވެ.

Advertisement

އަދި މީގެ އިތުރުން، ތ.ކަނިމީދުއަށް ގޮސް އަމާޒަށް ތީރުޖެހުމާއި, ރާޅާ ދެކޮޅަށް ފަތަން ދަސްކޮށް, ތަންތަނަށް އެރުމުގެ އުކުޅު ވެސް އޭނާ ދަސްކުރި ކަމަށް ދައުލަތުން ބުންޏެވެ. އަދި އޭނާ އެފަދަ އުކުޅުތައް ދަސްކޮށްފައިވާތީ ދައުލަތުން ވަނީ އޭނާގެ މައްޗަށް ނިރުބަވެރިކަމުގެ އަމަލެއް ކުރަން ބޭނުންވަ އުކުޅުތައް ދަސްކުރުމުގެ ކުށުގެ ދައުވާއެއް ވެސް އުފުލަފާފައެވެ.

ދައުލަތުން މުނީޒުގެ މައްޗަށް ދެން އުފުލާފައިވަނީ ޓެރަރިޒަމްގެ ޢަމަލެއް ހިންގަން ހިތްވަރު ދިނުމުގެ ދަޢުވާއާއި, ޓެރަރިސްޓު ޖަމާޢަތަކަށް ތާއީދުކުރާފަދަ ލިޔުމެއް ގެންގުޅުމުގެ ކުށުގެ ދަޢުވާއެވެ.

މި މައްސަލައިގައި ހިމެނޭ ހުރިހާ ދައުވާއަކަށް ވެސް މުނީޒު އިންކާރު ކުރާއިރު ދައުލަތުން ވަނީ އޭނާއާ ދެކޮޅަށް ގިނަ ހެކިތަކެއް ހުށަހަޅާފައެވެ. އޭގެ ތެރޭގައި އެންމެ މުހިއްމު ހެކިންގެ ގޮތުގައި ހިމެނެނީ ސިއްރު ހެކިންނެވެ.

ދައުލަތުން ހުށަހެޅި ހެކިތަކަށް ބަލައި ކްރިމިނަލް ކޯޓުގައި މިއަދު ބޭއްވި އަޑުއެހުމުގައި ފަނޑިޔާރު އަލީ ނަދީމް ވަނީ މުނީޒުގެ މައްޗަށް ކުރާ ދަޢުވާތައް މަދަނީ މިންގަނޑުން ކުރިއަށް ގެންދެވޭނެކަމަށް ކަނޑަައަޅުއްވައި, ލިޔުމުން ދިފާޢީ ހެކި ހުށަހަޅަން އޭނާއަށް ފަސް ދުވަސް ދީފައެވެ.

އަލީ މުނީޒާއެކު ހައްޔަރުކުރި މީހުންނަށް ދައުވާ ނު އުފުލާ ބަންދުގައި ގިނަ ދުވަހު ބައިތިއްބައި، ސިއްހީ ފަރުވާ ލިބިދިނުމާއި އެނޫންވެސް އިތުރު ހައްގު ތަކުން މަހުރޫމް ކުރާ ކަމަށް ބުނެ އެ ފަރާތްތަކުގެ އާއިލާތަކުން ވަނީ މީގެކުރިން ކަންބޮޑުވުން ފާޅުކޮށްފައެވެ.