މަޖިލީހުގެ ރައީސް އަދި ސަރުކާރު ހިންގާ މައި ޕާޓީ އެމްޑީޕީގެ ރައީސް މުހައްމަދު ނަޝީދާއި، ރާއްޖޭގެ ފޮރިން މިނިސްޓަރުގެ މަގާމުގައި ހުންނަވައި ޔޫއެންގެ ޖެނެރަލް އެސެމްބްލީގެ ރައީސްކަން ކުރައްވަމުން ގެންދަވާ އަބްދުﷲ ޝާހިދު އިންޑިއާއަށް ވަޑައިގަތުމާއި ގުޅިގެން ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ފާޑުވިދާޅުވެއްޖެއެވެ.
ތާރިގު އެ ދެބޭފުޅުންނަށް ފާޑުވިދާޅުވެފައިވަނީ، ދާދިފަހުން ކުރެއްވި ޓްވީޓެއްގައެވެ.
ތާރިގު ވިދާޅުވި ގޮތުގައި އެ ދެ ބޭފުޅުންވެސް އިންޑިއާއަށް ވަޑައިގެން އިސްކުރައްވާނީ އިންޑިއާގެ މަސްލަހަތެވެ.
އެއީ ގައުމަށް ގައްދާރުވުންކަމަށް ސިފަކުރައްވާ ތާރިގު ވިދާޅުވީ ގައްދާރުންކަމަށް ނަންވެފައިވަނީ 9 ވަނަ ހަސަން ރަސްގެފާނާއި، ތާޖުއްދީނުގެ ދެ ދަރިންކަމަށެވެ.
އެ މީހުންނަކީ ތާރީހުގައި ރާއްޖޭގެ މިނިވަންކަން ގެއްލުވާލުމުގައި އިސްކޮށް މަސައްކަތްކޮށްފައިވާ ދިވެހިންކަން ފާހަގަކޮށްލެވެއެވެ.
ތާރިގުގެ ޓްވީޓުގައި ވަނީ ގައުމަށް ގައްދާރުވި އެފަދަ ފަރާތްތަކާއި، ނަޝީދުއާއި ޝާހިދު ތަފާތެއް ނެތްކަމަށް އިޝާރާތްކުރައްވާފައެވެ. އަދި ވިދާޅުވީ މިހާރު ވެރިކަން ކުރަމުންދާ ފަރާތްތަކާއި ގައުމު ހަވާލުކޯށްފިނަމަ ވެގެންދާނެ ގޮތް މީގެ ކުރިން ރައީސް އަބްދުﷲ ޔާމީން އަބްދުލްގައްޔޫމު ވިދާޅުވެދެއްވާފައިވާ ކަމަށެވެ.
އަދި ދިވެހިންގެ ކަންކަން ނިންމަންވާނީ ދިވެހިންކަން އެމަނިކުފާނު އަބަދވެސް ހަނދާންކޮށްދެއްވަމުން ގެންދިވަކަމަށެވެ.
ނުރަސްމީ ދަތުރުފުޅެއްގައި ނަޝީދު އިންޑިއާއަށް ވަޑައިގެންފައިވަނީ އެމްޑީޕީގެ ޕްރައިމަރީ ބާއްވަން އިއުލާނު ކޮށްފައިވަނިކޮށްކަން ފާހަގަކޮށްލެވެއެވެ.
އެހެން ނަމަވެސް ނަޝީދުއާއި ޝާހިދު އިންޑިއާއަށް ވަޑައިގެން ސީދާ ސަބަބެއް އަދި ހާމަކޮށްފައެއްނުވެއެވެ.
Advertisement
This content is created and paid for by advertisers and does not involve Voice Journalists
