ބޯކޮށް ވާރޭވެހި ޕާކިސްތާނުގައި ފެންބޮޑުވެ ފަސްގަނޑު ކަނޑައިގެން ދިއުމުގެ ސަބަބުން ހާހަކަށްވުރެ ގިނަ މީހުން މަރުވެއްޖެއެވެ.

ނިމިދިޔަ ހަފްތާގެ ތެރޭގައި ޕާކިސްތާނަށް ވަރަށް ބޯކޮށް ވާރޭ ވެހިފައިވާއިރު، ބިންގަނޑު އުސް ސަރަހައްދުތަކުގައި ހުރި ކޯރުތައް ބަންޑުންވެ މަގުތަކަށް އެޅި މީހުންނާ އެކު ވަނީ ގަނބައިގެން ގޮސްފަ އެވެ. އަދި މިހާރު ޕާކިސްތާނުގެ ބޮޑުބައި ފެނުއަޑީގައި އޮތްކަމަށް ރިޕޯޓުތަކުން ބުނާއިރު، އަދިވެސް އެ ގައުމަށް ދަނީ ވިއްސާރައިގެ އަސަރުކުރަމުންނެވެ.

އެ ގައުމުގެ ދަތުރުފަތުރުގެ ނިޒާމަށް އެއްކޮށް ބުރޫއަރާފައިވާއިރު މި ކާރިސާގައި މީހުން ސަލާމަތްކުރުމުގައި އުޅޭ އޮފިޝަލުން ސިންދު ޕްރޮވިންސާއި ބަލޫޗިސްތާންގައި ގިނަ ބަޔަކު ފަސްގަނޑު ދަށުވެ އަދި ވީނުވީ ގޮތް ނޭނގި އެތައް ބަޔަކު ވަނީ ގެއްލިފަ އެވެ.

އިސްލާމްއާބާދުގައި އޮތް ނޫސް ކޮންފަރެންސެއްގައި ވާހަކަދައްކަވަމުން އިންފޮމޭޝަން މިނިސްޓަރު މަރިޔަމް އޫރުންގަޒިބު ވިދާޅުވި ގޮތުގައި ވިއްސާރައިގެ ސަބަބުން މަރުވި މީހުންގެ އަދަދު ވަނީ 1،000 އަށް ވުރެ އިތުރުވެފަ އެވެ. އެ ގައުމުގެ ކާރިސާ މެނޭޖްމަންޓުން ބުނާ ގޮތުން ގެދޮރު ގެއްލިފައިވާ މީހުންގެ އަދުދު 30 މިލިއަނަށް ވުރެ މިހާރު އިތުރުވާނެ އެވެ.

މޫސުމީ ބަދަލުގެ ސަބަބުން މިއަހަރު ހާއްސަ ގޮތެއްގައި ދެކުނު އޭޝިއާގެ ގައުމުތަކަށް ކުރަމުންދާ މޫސުމީ ވިއްސާރައިގެ ގެއްލުން ވަނީ ބޮޑުވެފައެވެ.