ޓެލެކޮމް އަދި ޑިޖިޓަލް ޕްރޮޑަކްޓުގެ ދާއިރާގައި ދިހަ އަހަރަށް ވުރެ ގިނަ ދުވަހުގެ ތަޖުރިބާ ހޯދާފައިވާ އަޙްމަދު ނޫމާން އުރީދޫ ފިންޓެކުގެ ރާއްޖޭގެ ކަންޓްރީ ހެޑް ގޮތުގައި އައްޔަންކޮށްފިއެވެ.
ނޫމާން މީގެ ކުރިން ހުރީ އުރީދޫ މޯލްޑިވްސްގެ ފިންޓެކް އެންޑް ޕާޓްނާޝިޕް މަގާމުގައެވެ. އޭނާ ވަނީ ރާއްޖެއަށް އިންޓަނެޓް ބޭނުންނުކޮށް ފޭސްބުކް ބޭނުންކުރެވޭ ޚިދުމަތެއް ތަޢާރަފުކުރުމުގައި އިސް ދައުރެއް އަދާކޮށްފައެވެ.
ހަމައެހެންމެ ވައިބާގައި ދިވެހި ބަހުން ފުރަތަމަ ސްޓިކާ ޕެކެއް ނެރުމުގައި ވެސް އޭނާ ޙަރަކާތްތެރިވެފައިވެއެވެ. މީގެ އިތުރުން އުރީދޫ ނޭޝަން (އީސްޕޯޓްސް) އާއި މޫލީ (އީ ކޮމާސް) އަދި ޕާޓްނާޝިޕްސް ފަދަ ދާއިރާތަކުގެ މެނޭޖްމެންޓް މަގާމުތައް ނޫމާން އަދާކޮށްފާވެއެވެ.
އުރީދޫ ފިންޓެކަކީ 2022 ވަނަ އަހަރު އުފެއްދި ކުންފުންޏެކެވެ. އެ ކުންފުނީގެ ސަބްސިޑިއަރީތައް ޤަޠަރު ޢޮމާން ކުވެއިތު ޢިރާޤު ތޫނިސް އަދި ރާއްޖޭގައި ހިންގައެވެ. ޤަޠަރުގައި "އުރީދޫ މަނީ"ގެ ނަމުގަ އާއި ޢޮމާނުގައި "ވޮލެޓީ ބައި އުރީދޫ"ގެ ނަމުގަ އާއި އަދި ރާއްޖޭގައި "އެމް ފައިސާ"ގެ ނަމުގައި ޑިޖިޓަލް ފައިނޭންޝަލް ޚިދުމަތް އެ ކުންފުނިން ފޯރުކޮށްދެއެވެ.
ރާއްޖޭގައި 2016 ވަނަ އަހަރު ތަޢާރަފުކުރި އެމް ފައިސާ މެދުވެރިކޮށް މޯބައިލް މަނީ އާއި ޑިޖިޓަލް ފައިނޭންޝަލް ޚިދުމަތްތައް ދެމުން އައިސްފައިވާއިރު މި އަހަރު އުރީދޫ ވަނީ ޕޭޕެލް މެދުވެރިކޮށް ލިބޭ ޑޮލަރު ޕޭމެންޓް ސީދާ އެމް ފައިސާ ވޮލެޓަށް ޖަމާކުރެވޭ ޚިދުމަތެއް ވެސް ފަށާފައެވެ.
Advertisement
This content is created and paid for by advertisers and does not involve Voice Journalists
