އެމެރިކާއިން ފުރަތަމަ ފަހަރަށް އާކްޓިކް ސަރަހައްދަށް ހާއްސަ ސަފީރަކު ކަނޑައަޅަން ނިންމައިފިއެވެ.

އެމެރިކާއިން މިގޮތަށް ނިންމާފައިމިވަނީ އާކްޓިކް ސަރަހައްދުގައި ރަޝިއާއިން ހިންގަމުންދާ ހަރަކާތްތައް ވަރުގަދަ ކުރަމުންދާ ދަނޑިވަޅެއްގައެވެ. މިދިޔަ ހުކުރު ދުވަހު ނޭޓޯގެ ވެރިޔާ ޖެންސް ސްޓޮލްޓެންބާގް ވިދާޅުވީ ދުނިޔޭގެ އެންމެ އުތުރު ބިތަށް ރަޝިއާގެ ނުރައްކާ އެބަ އޮތް ކަމަށާއި، ރަޝިޔާގެ އިތުރުން އެ ސަރަހައްދުގައި ޗައިނާގެ ނުފޫޒު ފެތުރެމުންދާތީ ވެސް ކަންބޮޑުވާކަމަށެވެ.

އެމެރިކާގެ ސްޓޭޓް ޑިޕާޓްމަންޓުގެ ތަރުޖަމާނު ވެޑަންޓް ޕަޓޭލް ވިދާޅުވެފައިވަނީ އެމްބެސެޑާ އެޓް ލާޖްގެ ޒިންމާއަކަށް ވާނީ ދުނިޔޭގެ އެންމެ އުތުރު ބިތުގައި އެމެރިކާގެ ސިޔާސަތު ކުރިއެރުވުން ކަމަށެވެ.

އެމެރިކާގެ ހާއްސަ ސަފީރުގެ އެންމެ މައިގަނޑު މަސްއޫލިއްޔަތަކަށް ވާނީ އާކްޓިކްގެ ހަަތް ގައުމާ އެކު ގުޅުން ބަދަހިކުރުމަށް މަސައްކަތް ކުރުމެވެ. އެ ހަތް ގައުމަކީ ކެނެޑާ، ޑެންމާކް، ފިންލޭންޑް، އައިސްލޭންޑް، ނޯވޭ، ސްވިޑަން އަދި ރަޝިއާ އެވެ.