ޖުމްހޫރީ ޕާޓީގެ ގައުމީ ޖަލްސާ ނުވަތަ ގައުމީ ކޮންފަރެންސް މިއަހަރުގެ ޑިސެމްބަރު މަހުގައި ބޭއްވުމަށް ވާން ޖެހެ ތައްޔާތީތައް ޕާޓީގެ ސެކްރެޓޭރިއޭޓުން ފަށައިފިއެވެ. 

އެކަން ހާމަކުރައްވާ ޖުމްހޫރީ ޕާޓީގެ ތަރުޖަމާނު އަލީ ސޯލިހު ވިދާޅުވީ ޑިސެމްބަރުގައި ބޭއްވުމަށް މަސައްކަތް ކުރާ އެ ޕާޓީގެ ގައުމީ ޖަލްސާގައި ޖުމްހޫރީ ޕާޓީއިން ސިޔާސީ ގޮތުން މުހިންމު ނިންމުންތަކެއް ނިންމާނެކަމަށެވެ. 

ޖުމްހޫރީ ޕާޓީގެ 146 ވަަނަ ކައުންސިލް ބައްދަލުވުމުގައި ޕާޓީގެ ގައުމީ ބައްދަލުވުމަށް ތާއްޔާރުވުމުގެ ގޮތުން ކުރަންޖެހޭ އެންމެ މުހިންމު މަސައްކަތް ކަމަށްވާ އެ ޕާޓީގެ ރަށު ގޮފިތައް އަސާސީ ގަވައިދާއި އެއްގޮތަށް އެކުލަވާލާ ފުރިހަމަ ކުރުމަށްޓަކައި 7 މެމްބަރުންގެ ވަގުތީ ކޮމެޓީއެއްވެސ މިހާރު ނަގާފައިވާކަމަށް އަލީ ސޯލިހު ވިދާޅުވިއެވެ. 

Advertisement

އެ ގޮތުން ‎ޕާޓީގެ ގޮފިތައް ހެދުމަށް ޕާޓީއަށް ހެޔޮއެދޭ އެންމެހާ ފަރާތްތަކަށް ވަނީ ފުރުސަތު ހުޅުވާލާފައިވާކަމަށް ޖުމްހޫރީ ޕާޓީއިން ވަނީ ބުނެފައެވެ. 

ރަށްރަށަށް ދަތުރު ކުރުމާއި ޕާޓީ ޕްރޮމޯޓް ކުރުމާއި މީހުން ބާރުވެރި ކުރުމަށް މަސައްކަތް ކުރުމަށް ޕާޓީގެ ހުރިހާ މެންބަރުންނަށް ފުރުސަތު އޮތްކަންވެސް ޖޭޕީއިން ވަނީ ފާހަގަކޮށްފައެވެ. 

ޑިސެމްބަރުގައި ބޭއްވުމަށް ޖުމްހޫރީ ޕާޓީއިން ތައްޔާރުވަމުން އަންނަ ގައުމީ ޖަލްސާއަކީ އެ ޕާޓީއިން ކުރިއަށް އޮތް ރިޔާސީ އިންތިޚާބަށް ތައްޔާރުވުމަށް ކުރާ ކަމެއްކަމަށް ބެލެވެއެވެ. 

އެ ޕާޓީއިން ވަނީ ކުރިއަށް އޮތް ރިޔާސީ އިންތިޚާބުގއި ވާދަކުރައްވާނެކަމަށް ބުނެފައެވެ. އެހެން ނަމަވެސް ވާދަކުރާނީ އަމިއްލަ ކެންޑިޑޭޓެއް ނެރެގެން ތޯ ނުވަތަ ކޯލިޝަން ހަދައިގެންކަމެއް އަދި އެ ޕާޓީއިން ހާމަކޮށްފައެއް ނުވެއެވެ. 

އެހެންކަމުން ކުރިއަށް މި އޮތް ބައްދަލުވުމުގައި މިފަދަ ނިންމުންތައް ނިންމާނެކަމަށް ބެލެވެއެވެ.