ސަރުކާރުން ޚަރަދުކޮށްގެން 2019 އާއި 2022 އާ ދެމެދު ފުރަތަމަ ޑިގްރީ ސްކީމަށް ވަތް ދަރިވަރުންގެ ތެރެއިން ކޯސް ފުރިހަމަކުރީ 50 އިންސައްތަ ކަން އޮޑިޓާ ޖެނެރަލްގެ އޮފީހުން ނެރުނު ރިޕޯޓަކުން ހާމަވެއްޖެއެވެ.

އެ ރިޕޯޓުގައި ވަނީ ހިލޭ ޑިގްރީ ސްކީމް ހިންގުމުގައި ކަންކަން ކުރިއަށް ގެންދިޔަގޮތް ވަރަށް ރަނގަޅަށް ބަޔާންކޮށްދީފައެވެ. މޯލްޑިވްސް ކޮލިފިކޭޝަން އޮތޯރިޓީ (އެމްކިޔުއޭ) އާއި ކިޔަވައިދޭ އެކި މަރުކަޒުތަކުން ހޯދި ތަފާސްހިސާބުތައް ދައްކާ ގޮތުން އެ މުއްދަތުގައި ޖުމްލަ 11،641 ދަރިވަރުން ސްކީމުގައި ބައިވެރިވެފައިވެއެވެ. ނަމަވެސް ކޯސް ނިންމައިގެން ނުކުމެފައި ވަނީ 5833 ދަރިވަރުންކަމަށް ވަނީ ފާހަގަކޮށްފައެވެ.

ބާކީ ތިބި ދަރިވަރުންނަށް ބަލާ އިރު 18 އިންސައްތަ ދަރިވަރުން މިހާރު ވެސް ކިޔެވުން ކުރިއަށް ގެންދެއެވެ. އެ ސްކީމުގެ ތެރެއިން 790 ދަރިވަރުން ކޯސް ފުރިހަމަ ނުކޮށް ވަކިވެފައިވާ ކަމަށް ރިޕޯޓުގައި ބަޔާންކޮށްފައިވެއެވެ. މީގެ އިތުރުން 2779 ދަރިވަރެއްގެ މަޢުލޫމާތު ލިބެން ނެތުމުން އެ ދަރިވަރުން ޕްރޮގްރާމް ނިންމިތޯ ނުވަތަ ނޫންތޯ ކަށަވަރު ނުވާ ކަމަށް ވެސް އެ އޮފީހުން ފާހަގަކޮށްފައިވެއެވެ.

ސްކީމުގެ ދަށުން ދޫކުރަން ޖެހޭ ހުރިހާ ފައިސާއެއް ހަމައަށް ދެއްކުމުން ދަރިވަރު ކޯސް ނިންމާނެ ކަމަށް ބެލެވުނު ނަމަވެސް ވުޒާރާއިން ފައިސާ ދޫކުރަނީ ކުރިއަށް އޮންނަ ހަ މަހަށް ނުވަތަ ސެމިސްޓާއަކަށް އެޑްވާންސް އުސޫލުން ކަމަށް ވާތީ ފައިސާ ލިބުނު ކޮންމެ ދަރިވަރަކީ ކޯސް ފުރިހަމަކުރި ދަރިވަރެއް ކަމުގައި ނުވެދާނެ ކަމަށް ރިޕޯޓުގައި ފާހަގަކޮށްފައިވެއެވެ. ކޯސް ފުރިހަމަކުރި ދަރިވަރުންނާއި ނުކުރާ ދަރިވަރުންގެ ފުރިހަމަ ތަފާސްހިސާބު ދެނެގަނެވެން ނެތް ކަމަށް ވެސް އެ ރިޕޯޓުގައި ބުނެފައިވެއެވެ.