ދިވެހިރާއްޖޭގައި ފާހަގަކުރާ އެކިއެކި މުނާސަބަތުތަކުގައި ދިވެހިންނަށް ދިވެހި ބަހުން ތަހުނިޔާ ދަންނަވާއި ޝުކުރު ކުރައްވާ، އަދުގެ ސަރުކާރާއި ނުހަނު ގާތް ގުޅުމެއް ބާއްވަވާ އިންޑިއާގެ ބޮޑުވަޒީރު ނަރެންދުރަ މޯދީ، ދިވެހިރާއްޖޭގެ ފަޚުރުވެރި މިނިވަން ދުވަހުގެ ތަހުނިޔާ ކިޔުއްވާފައެއް ނުވެއެވެ.

މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ގެ ސަރުކާރުތަކުގައި ދިވެހިރާއްޖެއާއި އިންޑިޔާއާ ދެމެދުގައި އޮންނަ ގުޅުން އިންތިހާއަށް އިތުުރުވެ ބަދަހިވެގެންދާކަމަކީ ސިޔާސީ ދާއިރާގައި މަސައްކަތް ކުރާ ފަރާތްތަކުގެ އިތުރުން އާއްމުންވެސް ދައްކާވާހަކައެކެވެ. އަދި ވަކިން ޚާއްސަކޮށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވެރިކަމަށް އައި ފަހުން ދެގައުމުގެ ދެމެދުގައި އޮތް ގުޅުން ހުރިހާ ދާއިރާއަކުންވެސް އިތުރަށް ބަދަހިވެގެން ގޮސްފައިވާކަން ޚުދު އިންޑިއާ ސަރުކާރުންވެސް ވަނީ ފާހަގަކުރައްވާފައެވެ.

އެހެންނަމަވެސް، ދިވެހިރާއްޖެ މިނިވަން ދައުލަތެއްގެ ގޮތުގައި އޮންނަތާ 57 އަހަރުފުރުނު ދިވެހިންގެ ފަޚުރުވެރި މިނިވަންދުވަސް އައިސް ނިމިގެން ދިޔަ އިރުވެސް ދުވަހުގެ ތަހުނިޔާ ދިވެހި ސަރުކާރަށާއި ދިވެހި ރައްޔިތުންނަށް މޯދީ ކިޔުއްވާފައެއްނުވެއެވެ.

ސައުދީ އަރަބިއްޔާއާއި، އެމެރިކާފަދަ ބޮޑެތި ގައުމުތަކުން ދިވެހިރާއްޖޭގެ މިނިވަންދުވަހުގެ ތަހުނިޔާ ކިޔުއްވާފައިވާއިރު ދިވެހިތާއްޖޭގެ އަވަށްޓެރި، އަދުގެ ސަރުކާރުގެ އެންމެ އަރިސް، ސަރުކާރުން ބޭރުގެ ފަރާތަކަށް އަރުވާނެ އެންމެ ޝަރަފުވެރި މަގާމް، ނިޝާން ޢިއްޒުއްދީނުގެ ލަގަބުވެސް އަރުއްވާފައިވާ މޯދީ ދިވެހިރާއްޖެއަށް ތަހުނިޔާ ދަންނަވާފައިނުވާ ސަބަބު ސާފެއްނުވެއެވެ.

މޯދީ މިފަދައިން އަދުގެ ކަންތައް ކުރައްވާފައިވާއިރު، ރާއްޖޭގެ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އާއި، ކުރީގެ ރައީސް އަދި މިހާރުގެ ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަކީ، އިންޑިޔާއިން ފާހަގަކުރާ އެގައުމުގެ އެކި އެކި މުނާސަބަތު ތަކާއި ގުޅިގެން، އެގައުމަށާއި، އެގައުމުގެ ބޮޑުވަޒީރަށް ފަށްފަށުން މަރުހަބާ ދަންނަވައި ތަހުނިޔާ ފޮނުއްވާ ބޭފުޅުންކަން ފާހަގަކޮށްލަންޖެހެއެވެ. އެއިން ކޮންމެ ތަހުނިޔާއެއްގައިވެސް އެގައުމަށް ސަނާ ކިޔުމާއި، ދެގައުމު ދެމެދުގައިވާ ގުޅުން ބަދަހި ކުރައްވަން މަސައްކަތް ކުރައްވާ ކަން ފާހަގަނުކުރައްވާ ފަހަރެއް ވަރަށް މަދުވާނެއެވެ.

ވީއިރު ރާއްޖޭއަށް އެންމެ ޚާއްސަ އެއް މުނާސަބަތުގައި އިންޑިއާގެ ބޮޑުވަޒީރު ތަހުނިޔާ ދަންނަވައި ޓުވީޓެއްގެ ހިސާބުވެސް ކޮށް ނުލެއްވީ އެގައުމުގެ ހިންދުތުވާ ޖަމާޢަތުގެ މީހުން ބުނެފައިވާގޮތަށް ދިވެހިރާއްޖެއަކީ އިންޑިއާގެ ބައެއް ކަމަށް ގަބޫލުކުރާ ގަބޫލުކުރުމުގެ ސަބަބުން ކަމަށް ބެލުމުގެ ޖާގައެބައޮތެވެ.

މިކަމުގެ ފަހަތުގައި ކޮންމެ ސަބަބެއް އޮތް ނަމަވެސް، މިއިން ދޭހަވެގެންދަނީ، އަދުގެ އެމްޑީޕީ ސަރުކާރުން އިންޑިއާ އަކީ ސަރުކާރުގެ އެންމެ އަރިސް ގައުމުކަމުގައި ދެކިލެއްވި ނަމަވެސް އިންޑިއާ އިން އެފަދައިން ނުދެނޭކަމެވެ.

ދެކެލައްވާނަމަ، ރާއްޖޭގެ ރައީސުލްޖުމްހޫރިއްޔާ އާއި މަޖިލީހުގެ ރައީސް އެގައުމަށް ތަހުނިޔާއާއި މުބާރިކުބާދީ ދަންނަވާފަދައިން އެގައުމުގެ ބޮޑުވަޒީރު ވެސް ދެންނެވީހެވެ.