ފެހި ގާނޫނު އަސާސީ ވުޖޫދުވެ، ޑިމޮކްރަސީގެ ރޭހުގައި ރާއްޖެ ހޯދަން ފެށި ކުރިއެރުންތަކާއެކު މާލެ މީހާއާއި ރާއްޖެ ތެރޭ މީހާއާއި ތަފާތުކުރުމުގެ ފަލްސަފާ ވަނީ ވަރަށް ބޮޑަށް ހުއްޓިފައެވެ. އަދި ރައްޔިތުންގެ މެދުގައި ތަފާތުކުރުންތައް ނައްތާލުމުގެ މަސައްކަތްތައްވެސް ސަރުކާރުތަކުން ފަށައިގަތެވެ.
އެހެން ނަމަވެސް، ޒަމާންތަކަކަށް ފަހު "މާލެ މީހާ، ރާއްޖެތެރޭ މީހާ" ގެ ބަހުސް ވަނީ އަނެއްކާވެސް ފެށިފައެވެ. އެއްބަޔަކު އަނެއްބަޔަކު ކުޑައިމީސް ކުރުމަކީ އާންމުކަމަށް ވެއްޖެއެވެ.
ދާދިފަހުން ހުޅުމާލޭގެ ދެވަނަ ފިޔަވަހީގައި ފްލެޓެއްގެ ބެލްކަނިން ވެއްޓެން ދިޔަ ކުއްޖެއް ސަލާމަތްކުރި ހާދިސާއަކީވެސް މާލެ މީހާއާއި ރާއްޖެތެރޭ މީހާގެ ހުރި ތަފާތު ބަޔަކަށް ސިފަވި ހާސިދާއަކަށް ވަނީ ވެފައެވެ.
އެގޮތުން ކުއްޖާ ސަލާމަތް ކުރާ ވީޑިއޯ ޓްވިޓާރގައި ހިއްސާކުރައްވަމުން ކުރީގެ ޓްރާންސްޕޯޓު މިނިސްޓަރު އާދިލް ސަލީމު ވިދާޅުވީ "އައިލްނެޑު ލައިފް" ނުވަތަ ރަށްފުށުގެ ދިރިއުޅުން ސިޓީއަށް ބަދަލުކޮށް އުސް އުމާރާތްތަކުގައި ދިރިއުޅެން ފަށާއިރު، އެ މީހުން އުސް އިމާރާތްތަކަށް އަހުލުވެރިކުރުމަށް ޚާއްސަ ޕްރޮގްރާމުތަކެއް ހިންގަން ޖެހޭކަމަށެވެ. އުސް އިމާރާތްތަކުގައި ދިރިއުޅޭއިރު، ކުރާނެ ކަންކަމާއި ނުކުރަންވީ ކަންކަންވެސް ބުނެދީ ހޭލުންތެރިކުރުވަން ޖެހޭނެކަމަށެވެ.
އޭނާއަށް ވިސްނުނު ގޮތުގައި އެ ހާދިސާ ހިނގަން މެދުވެރިވި ސަަބަބަކީ އުސް އިމާރާތްތަކަށް "ރާއްޖެތެރޭ މީހާ" އަހުލުވެރިވެފައި ނެތުމެވެ. އެފަދަ އިމާރާތެއް މީގެ ކުރިން ފެނިފައި ނެތުމާއި، އެ އިމާރާތެއްގައި ދިރިއުޅޭނެ ގޮތްވެސް ރާއްޖެތެރޭ މީހާއަށް ނޭނގުމެވެ.
އެ ހާދިސާ ހިނގަން މެދުވެރިވި ސަބަބު މިހާތަނަށް ފުލުހުންވެސް ހާމަކޮށްފައެއް ނުވެއެވެ. އެހެން ނަމަވެސް މި ހުންނަނީވެސް އެއްބަޔަކަށް މި ހާދިސާ ސިފަވިގޮތެވެ.
ކޮންމެއަކަސް، އެފަހުން ރަނގަޅަށް ބަލާލައިރު، ހިޔާގެ އުސް ޓަވަރުގެ 13 ވަނަ ފަންގިފލާއިން ވެއްޓެމުން ދިޔައީ މާލޭ މީހެއްގެ ދަރިއެއްކަމަށް ވެއެވެ. އެއާއެކު ސަލީމަށް ގިނަ ބައެއްގެ ފާޑުކިޔުން ވަނީ އަމާޒުވެފައެވެ.
އެކަމާއި ގުޅޭގޮތުން އޭނާ ކުރި ޓްވީޓަށް ޖަވާބުދިން ގިނަ ބަޔަކު ބުނެފައިވަނީ އަދީލުގެ އެ ޓްވީޓަކީ ނަސްލީ ތަފާތުކުރުން ބޮޑު ޓްވީޓެއްކަމަށެވެ. އެ ހާދިސާއަކީ ކޮންމެ ރަށެއްގެ މީހަކަށްވެސް ދިމާވެދާނެ ފަދަ ހާދިސާއެއްކަމަށްވާއިރު ރާއްޖެތެރޭ މީހުން ކުޑައިމީސްކުރީ ސަލީމުގެ ބަލި ސިކުނޑީގެ ސަބަބުންކަމަށް ގިނަ ބަޔަކު ވަނީ ބުނެފައެވެ.
އަނެއްކޮޅުން ޚުދު ސަލީމަކީ މާލޭ ބޭފުޅަކަށްވެ ހުންނަވާ ރާއްޖެތެރޭގައި ދިރިއުޅުއްވަމުންދާ ބޭފުޅެކެވެ. މާފުށީގައި ގެސްޓު ހައުސްގެ ވިޔަފާރު ކުރައްވަމުން ގެންދަވާ ބޭފުޅެކެވެ.
ސަލީމުގެ ޕޯސްޓަށް ކޮމްނެޓުކުރި މީހުން އެކަން ފާހަގަކޮށްފައިވެއެވެ. އަދި ސަލީމު އެރަށުން ބޭލުމަށް އެމީހުން ގޮވާލާފައިވެއެވެ.
ރާއްޖެތެރޭގައި ތިބޭނީ ފަސްކުޅަނދު މަދު މީހުންކަމަށް މީގެ ޒަމާންތަކެއް ކުރިން މާލޭގެ އިއްޒަތްތެރި ބޭފުޅުން ބުނަމުންދިޔަ ދިއުން އިޔާދަކުރައްވާ ސަލީމު ވާހަދެއްކުމާއި ގުޅިގެން، ގިނަބައެއްގެ ނަފްރަތު ވަނީ އޭނާއަށް އަމާޒުވެފައެވެ.
ހަމަހަމަ މުޖުތަމައެއްގެ ސިފަ މިފަދަ ފަރާތްތަކުން ދައްކާ ވިހަ ވާހަކަތަކުގެ ސަބަބުން ގެއްލިގެންދާަމަށް އެއްބަކު ބުނެފައިވެއެވެ.
އަނެއްބަޔަކު ބުނީ އެކްސިޑެންޓެއް ވަނީ، ނުވަތަ އެނޫންވެސް ހާދިސާއެއް ދިމާވަނީ އެއީ ކޮން ރަށެއްގެ ކާކުތޯ ބަލާފައެއް ނޫންކަމަށާއި، ސަލީމަށްވެސް އެފަދަ ހާދިސާއެއް ދިމާވެދާނެކަމަށެވެ. އަދި މީހަކަށް ދެރަކަމެއް ދިމާވީމާ މަލާމާތް ކުރުމުގެ ބަދަލުގައި އިހުސާންތެރިވުމަކީ އޭގައި އޮންނަ އެންމެ ރީތި ގޮތްކަމަށް ބައެއް ފަރާތްތައްވަނީ އޭނާއަށް ހަނދާންކޮށްދީފައެވެ.
ސަލީމަށް ރައްދުދިން މީހުން ބުނީ ރާއްޖެތެރެއަށް ނިސްބަތްވުމަކީ އެމީހާގެ ސިކުނޑި އުނިވުމެއް ނޫންކަމަށެވެ. ގައުމާއި ރައްޔިތުންނަށް ޚިދުމަތްކޮށްދިނުމުގައި ފާހަގަކޮށްލެވޭ ދަރިވަރުން އުފައްދަމުންދަނީ ހަމައެކަނި މާލެއަކުންވެސް ނޫންކަމަށާއި، އިލްމާއި ހިލްމަކީ، އަދި ކަންކަން ކުރަންވީ ގޮތް އޮޅުންފިލުވާ ތަހުޒީބު ދިރިއުޅުމެއް އުޅުމަކީ ކޮންމެ މީހަކަށްވެސް އޮތް ފުރުސަތެއްކަން ގިނަ ފަރާތްތަކުން ވަނީ ފާހަގަކޮށްފައެވެ.
ސަލީމަށް ދިން ރައްދުގައި އާންމުން ފާހަގަކޮށްފައި ހުރީ މުޅިންވެސް ރަނގަޅު ވާހަކަތަކެކެވެ.
އެއާއެކު ދަންނަވަން ޖެހެނީ ތަހުޒީބު ދިރިއުޅުމެއްގައި އުޅުމުގެ ފުރުސަތު ލިބިފައި އޮތުމަކީ މިހާގެ ސިކުނޑި ތަހުޒީބުވާ ކަމެއް ނޫންކަންވެސް ސަލީމުގެ ވާހަކަތަކުން ދޭހަވާކަމަށެވެ. ސިކުނޑި ތަހުޒީބު ކުރުމަށް ދުނިޔެއަށް ލޯހުޅުވޭ، ދުނިޔޭގެ ކަންކަން ހިނގާ ގޮތާއި ގުޅޭ އިލްމު ލިބިފައި ހުރުން މުހިންމެވެ. ފިކުރާއި ޚިޔާލު ދުނިޔެއަށް ހުޅުވާލާ، މީހުން ބަލައިގަންނަން ދަސްކުރުންވެސް މުހިންމެވެ،
އެހެން ނޫންކަމަށް ވާނަމަ ކިތަންމެ މަތީ ފާހެއް އޮތަސް، އަދި ކިތަންމެ ބޮޑު މަގާމެއް އަދާކުރައްވާފައި ހުއްނެވި ނަމަވެސް ތިމާގެ އަނގައިން ނިކުންނާނީ ސަލީމު ކުރެއްވި ތްވީޓުފަދަ ނާތަހުޒީބު ވާހަކތަކެއްކަން ޔަގީނެވެ.
Advertisement
This content is created and paid for by advertisers and does not involve Voice Journalists
