ރައީސް އިބުރާހިމް މުޙައްމަދު ޞާލިޙްގެ 100 ދުވަހުގެ ވަޢުދުގައި ހިމެނޭ އެސެޓް ރިކަވަރީ ކޮމިޝަނެއް އުފައްދާ، ދައުލަތުން ގެއްލިފައިވާ މުދަލާއި ފައިސާ ދައުލަތަށް އަނބުރާ ހޯދުމުގެ ވަޢުދު ނުފުއްދާ އެ ކޮމިޝަން އުވާލުމުން ގިނަ ބައެއްގެ ފާޑު ކިއުން ސަރުކާރަށް އަމާޒު ވެއްޖެއެވެ.

އެސެޓް ރިކަވަރީ ކޮމިޝަން އުވާލިކަން ހާމަކޮށް ރައީސް އޮފީހުން އިއްޔެ ނެރުނު ނޫސްބަޔާނުގައި ވަނީ އެ ކޮމިޝަން އުވާލާފައިވަނީ، ކޮމިޝަންގެ ފަރާތުން ބެލުމަށް ހަމަޖެހުނު ދައުލަތުގެ މުދަލާއި ފައިސާ ނަހަމަގޮތުގައި ބޭނުންކުރުމުގެ ގިނަ މައްސަލަތައް، ދިމާވި އެކިއެކި ސަބަބުތަކާހެދި ކުރިއަށް ނުގެންދެވުމުގެ ސަބަބުން އެކަށީގެންވާ މިންވަރަށް ތަހުގީގު ކުރެވި އިންސާފު ގާއިމްކުރެވިފައި ނުވާތީއެވެ.

މިކަމާ ގުޅިގެން ރައްޔިތުންގެ މަޖިލީހުގެ ވިލިމާލެ ދާއިރާގެ މެމްބަރު އަހުމަދު އުޝާމް ވިދާޅުވެފައި ވަނީ ދައުލަތުން ގެއްލިފައިވާ މުދަލާއި ފައިސާ ހޯދާ ދައުލަތުގެ މުދަލާއި ފައިސާ އަށް ވެފައިވާ ހިޔާނާތްތައް ބެލުމަށް މިސަރުކާރުން 2018 ގައި ވަޢުދުވި ކަމަށާއި ވެރިކަމަށް އައީ އެ ވަޢުދުތައް ވިއްކައިގެން ކަމަށާއި ނަމަވެސް ތިން އަހަރުވީ އިރުވެސް އެ ވަޢުދު ނުފުއްދުނު ކަމަށެވެ. އުޝާމް އިއްޔެ ކުރެއްވި ޓްވީޓެއްގައި އިތުރަށް ވިދާޅުވެފައިވަނީ ދައުލަތުން ގެއްލިފައިވާ މުދަލާއި ފައިސާ ހޯދުމުގައި ސަރުކާރު ފެއިލްވެފައިވާ ކަމަށެވެ.

މިކަމާއި ގުޅިގެން ރައްޔިތުން އިއްތިހާދުގެ ރައީސް އިބުރާހިމް މުޙައްމަދު ޖަނާބު ވިދާޅުވެފައި ވަނީ އެސެޓްރިކަވަރީ ކޮމިޝަނަށް ކުރި ޚަރަދަކީ ރީތިނަމެއް ކިޔައިގެން ދިވެހިންގެ ބައިތުލްމާލުން ވަގަށް ނެގުނު ފައިސާއެއް ކަމަށާއި ކޯލިޝަންގެ 4 ލީޑަރުން މިކަމަށް ޒިންމާ ނަގަންޖެހޭކަމަށެވެ. "ވައްކަމަށް ކިތައްމެ ރީތި ނަމެއް ކިޔަސް ވައްކަމާއި ފޭރުން ހެޔޮކަމަކަށް ނުހެދޭނެ. ވަގުހިފާ ނަމުގައި އައިސް ބޮޑެތި ވައްކަން ތައް ކޮށްފި." އިބްރާހީމް މުޙައްމަދު ކުރެއްވި ޓްވީޓެއްގައި ބުނެފައިވެއެވެ.

މިކަމާއި ގުޅިގެން ޝައިޚް ޢަލީ ޒައިދުވަނީ ކިތައް އެސެޓް ރިކަވާ ވިތޯ ސުވާލު ކުރައްވާ ޓްވީޓެއް ކުރައްވާފައެވެ. މި ޓްވީޓަށް ރައްދު ދެއްވާ ޝައިޚް ޒަމްޒަމް ފާރިޝް ވަނީ ރިކަވާ ކުރެވުނު އެއްޗެއް ނެތް ކަމަށް ވިދާޅުވެފައެވެ.ނަތީޖާ އެއް ނެރެވިފައި ނުވިނަމަވެސް ފާއިތުވި 3 އަހަރު ތެރޭގައި ގާތްގަޑަކަށް 10 ވަރަކަށް މިލިއަން ރުފިޔާ އެ ކޮމިޝަންގެ މެންބަރުންގެ މުސާރައާއި އެހެން ހޭދަތަކަށް ހަރަދު ކޮށްފައިވެއެވެ.

އެސެޓް ރިކަވަރީ ކޮމިޝަނުން އެންމެ ހާއްސަ އިސްކަމެއްދީގެން ކުރި މަސައްކަތަކީ އެމްއެމްޕީއާރުސީގެ ހިޔާނާތުގެ މައްސަލަ ތަހުގީގުކުރުމެވެ. އެގޮތުން އެ މައްސަލަ ތަހުގީގުކުރުމަށްފަހު، އެ ކޮމިޝަނުން ވަނީ އެމްއެމްޕީއާރުސީގެ ހިޔާނާތުގެ ފައިސާ ލިބުނުކަމަށް ތުހުމަތު ކުރާ 281 މީހުން ހިމެނޭ ލިސްޓެއް އާއްމުކޮށްފައެވެ.