ދިވެހިރާއްޖޭގައި މުއްސަދިންނާއި، ފުދުންތެރިކަން ދަށް މީހުންގެ ފަރަގުު ބޮޑުވެ އިޖުތިމާއީ އަދާލަތު ގެއްލިއްޖެކަމަށް މަޖިލީހުގެ ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހީމް ޝަރީފު ވިދާޅުވެއްޖެެއެވެ.
ޝަރީފު މިފަދައިން ވިދާޅުވެފައިވަނީ މިހާރު ކުރިއަށްދާ މަޖިލީހުގެ ތިން ވަނަ ދައުރުގެ 8 ވަނަ ޖަލްސާގައި ދިވެހިރާއްޖޭގެ ޓުއަރިޒަމާއި ބެހޭ ގާނޫނަށް ިސްލާހު ގެނައުމުގެ ބިލަށް ބަހުސްކުރައްވަމުންނެވެ.
މަޖިލީހުގައި އެ ބިލަށް ވާހަކަދައްކަވަމުން ބައެއް މެމްބަރުން ވަނީ ގެސްޓު ހައުސްތަކުން ގްރީން ޓެކްސް ނަގާއިރު، ނުވަތަ ރަށްތަކުން ޓެކްސް ދައްކަމުންދާނަމަ، އެ ރަށެއްގެ ތިމާވެށި ހިމާޔަތްކުރުމަށް ވަކި ޕަސެންޓޭޖެއް ކަނޑައެޅުމަށް ވަނީ ހުށައަޅުއްވާފައެވެ.
މެމްބަރު ޝަރީފުވަނީ އެ ޚިޔާަލާއި މުޅިން ދެކޮޅުކަމަށް ވިދާޅުވެފައެވެ.
އޭނާ ވިދާޅުވީ އެފަދައިން ޓެކުހުން ވަކި އިންސައްތައެއް ރަށްރަށަށް ޙާއްސަކުރުމަކީ ގެސްޓު ހައުސްތަކާއި ރިސޯޓުތަށް ނެތް ރަށްރަށާއި، އަތޮޅުތައް ބާކީކުރުންކަމަށެވެ.
ޓެކުހުން ލިބޭ ލާރި ހޭދަކުރަންޖެހޭނީ، ހުރިހާ ރައްޔިތުންގެ ލާބަޔާއި މަންފާއަށްކަމަށް އޭނާ ވިދާޅުވިއެވެ.
ޝަރީފު އިތުރަށް ވިދާޅުވީ، މުއްސަދިންނާއި ފަގީރުންގެ ފަރަގު ބޮޑުވެ މިހާރުވެސް ރާއްޖޭގައި އިޖްތިމާއީ އަދާލަތު ގެއްލިފައިވާކަމަށެވެ.
"އަޅުގަނޑުމެންގެ ރާއްޖޭގައި މިހާރުވެސް ލިބޭ މީހުންނާއި ނުލިބޭ މީހުންގެ ފަރަގު ބޮޑުވެ އާންމު މަސްލަހަތު ގެއްލޭ ހިސާބަށް ގޮސްފަ މި އޮތީ. އިޖުތިމާއީ އަދާލަތު ގާއިމުކުރުމަށްޓަކައި ރައްޔިތުންގެ މެދުގައި މިހާރަށްވުރެ ބޮޑަށް ދައުލަތަށް ލިބޭ އެއްޗަކާއި އަދި ރާއްޖޭގެ ޓެކްސް ނިޒާމަށް ބަދަލުތަކެއް ގެނެސްގެން އިންސާފުވެރި ގޮތަކަށް ޓެކްސް ޑިސްޓިރިބިއުޝަންގެ ކަންތައްތައް ކުރިއަށް ގެންދިއުން މުހިންމު" ޝަރީފު ވިދާޅުވިއެވެ.
އެއާއެކު ޝަރީފު ވިދާޅުވީ ވަށާޖެހޭ ޓެކްސް ނިޒާމެއް އޮތޭ ކިޔަސް، އަދި ރާއްޖޭގައި އެފަދަ ނިޒާމެއް ނެތްކަމަށެވެ. އަދި ރައްޔިތުންގެ މެދުގައި ހަމަހަމަކަމާއެކު ޓެކްސް ބެހޭނެ ނިޒާމެއް ގާއިމުކުުރުމަކީ މިހާލަތުގައި މުހިންމުކަމެއްކަން އޭނާ ފާހަގަކުރެއްވިއެވެ. new
Advertisement
This content is created and paid for by advertisers and does not involve Voice Journalists
