އަވައްޓެރި އިންޑިއާގެ ޓަމިލް ނާޑޫ ޑިސްޓްރިކްޓުގެ ސްޓޭޓް މިނިސްޓަރުގެ ކާރުކޮޅަށް ޖާގަދިނުމަށް ބަލިމީހަކު ގޮވައިގެން ދިޔަ އެމްބިއުލަންސްއެއް ހުއްޓުވައިފިއެވެ.
މިހާދިސާ ހިނގާފައިވަނީ ޓަމިލް ނާޑޫގެ "އަނައިކަރާއި" ބްރިޖުގައެވެ. އެ ބްރިޖަކީ އެއްކޮޅަށް ދުއްވާ ބުރިޖެއްކަމުން، މިނިސްޓަރުގެ ކާރުކޮޅު ބްރިޖު ހުރަސްކުރަންދެން އެންބިއުލަންސް ވަނީ ހުއްޓުވާފައެވެ.
އެ ސަރަހައްދުގެ ޓްރެފިކް ބަލަހައްޓަމުންދިޔަ ފުލުހުންނާއި ހަވާލާދީ އިންޑިއާގެ ބައެއް ނޫސްތަކުގައި ރިޕޯޓުކޮށްފައިވާ ގޮތުން "އަނައިކަރާއި" ބްރިޖަކީ ފަހަރަކު ކޮޅަކަށް ދަތުރުކުރާ ބްރިޖެކެވެ. އެގޮތުން އެއްކޮޅުން އަންނަ އުޅަނދުތައް ހުސްވަންދެން، ބްރިޖު ހުރަސްކުރަން އަނެއްކޮޅުގައި އޮންނަ ވެހިކަލްތަކަށް މަޑުކުރަން ޖެހެއެވެ. ބްރޖު ހުރަސްކުރާ ވެހިކަލްތަކުގެ ޓްރެފިކް ބަލަހައްޓަނީ ފުލުހުންކަންވެސް ފާހަގަކޮށްފައިވެއެވެ.
އެމްބިއުލަންސް ހުއްޓުވާފައިވަނީ ސްޓޭޓް މިނިސްޓަރުގެ ކާރުކޮޅު ބްރިޖު ހުރަސްކުރުމަށް ޖާގަ ދިނުމަށެވެ. މިނިސްޓަރުގެ ކާރުކޮޅާއި، ސެކިއުރިޓީ ވެހިކަލްތަކާއެކު ވީއަޕީ ވެހިކަލްތައްވެސް ބްރިޖު ހުރަސްކުރުމަށް އެއްކިލޯމީޓާރުގެ ޖާގަ ނަގާފައިވާކަން ޓްރެފިކް ބަލަހައްޓަމުންދިޔަ ފުލުހުންނާއި ހަވާލާދީ އިންޑީއާގެ ބައެއް ނޫސްތަކުގައި ވަނީ ރިޕޯޓުކޮށްފައެވެ.
އަދި ސެކިއުރިޓީއާއެކު ސްޓޭޓް މިނިސްޓަރުކޮޅުގެ ކާރުކޮޅު ބްރިޖު ހުރަސްކުރައްވަންދެން އެމްބިއުލަންސް މަޑުކުރުވާފައި އޮންނަ މަންޒަރު ފެނިގެންދާ ވީޑިއޯއެއްވެސް ވަނީ ސޯޝަލް މީޑިއާގައި އާންމުވެފައެވެ.
އެމްބިއުލަންސްގެ އިތުރުން ބްރިޖު ހުރަސްކުރަން އައި އެހެން އުޅަނދުތައްވެސް ވަނީ ސްޓޭޓް މިނިސްޓަރުގެ ކާރުކޮޅަށް ޖާގަ ދިނުމަށް މަޑުކުރުވާފައެވެ.
ބުރިޖުގެ ޓްރެފިކް ބަލަހައްޓަމުންދިޔަ ފުލުހުން އެމްބިއުލަންސް ހުއްޓުވުމާއި ގުޅިގެން ތަމިލްނާޑޫގެ ސުޕްރިންޑެންޓު އޮފް ޕޮލިސް ވަނީ އެފަދައިން އެކަން ކުރަން ޖެހުނު ސަަބު ބަޔާންކުރުމަށް ޓްރެފިކް ފުލުހުންނަށް އަންގާފައެވެ.
ސްޓޭޓް މިނިސްޓަރުގެ ކާރުކޮޅާއި، އެއާއި އެކު އޮތް ސެކިއުރިޓީ ކާރުކޮޅުތަކާއި، ވީއަޕީ ކާރުތައް ހިމެނޭ ފްލީޓަށް ޖާގަ ދިނުމަށް އެމްިއުލަސް ހުއްޓުވާލުމުން އެ ޑިސްޓްރިކްޓުގެ އާންމު ރައްޔިތުން ގެންދަނީ ތަމިލްނާޑޫ ސަރުކާރަށް ވަރަށް ބޮޑަށް ފާޑުކިޔަމުންނެވެ.
އަދި ފާޑުކިޔުންތައް ގިނަ ވުމާއި ގުޅިގެން ފަހުން ސްޓޭޓް މިނިސްޓަރު ވަނީ އެކަން ދިފާއުކުރެއްވުމަށް މަސައްކަތްކުރައްވާފައެވެ. އެގޮތުން އޭނާ ވިދާޅުވީ ކާރުކޮޅާއެކު އޮތް ފްލީޓު ބޮޑުވީ، ބައެއް އާންމު މީހުންގެ ކާރުތައްވެސް އެ ވަގުތު ބްރިޖަށް އެރުމާއި ގުޅިގެންކަަމަށެވެ.
އެހެން ނަމަވެސް އެމްބިއުލަންސް ހުއްޓުވާލާފައި އޮތުމުން، އާންމު ރައްޔިތުންގެ އިތުރުން އިދިކޮޅު ފަރާތްތަކުގެ ފާޑުކިޔުންތައްވެސް ވަނީ ސްޓޭޓު މިނިސްޓަރަށް އަމާޒުވެފައެވެ.
Advertisement
This content is created and paid for by advertisers and does not involve Voice Journalists
