އިނގިރޭސިވިލާތުގެ ރާނީ އެލިޒަބަތު ދެ ވަނައިގެ ސިއްހީ ހާލަތު ސީރިއަސްވެ އިތުރު ފަރުވާދީ މޮނީޓާ ކުރުމަށް އެޑްމިޓްކޮށްފިއެވެ.

މިއަދުގެ ހެދުނު އާންމު އުސޫލުގެ ދަށުން ހެދި އެވަލުއޭޝަން އެއްގައި އެކަމަނާގެ ސިއްހީ ހާލުކޮޅު ސީރިއަސްް ކަމަށް ރާނީގެ ޑޮކްޓަރުންގެ ޓީމުން ބުނެފައިވާ ކަަމަށް އިނގިރޭސިވިލާތުގެ ރިޕޯޓުތަކުން ބުނެފައިވެއެވެ. އަދި މިވަގުތު އެކަމަނާ އަށް ބަލްމޯރަލް ކާސަލްގައި ފަރުވާދީ ސިއްހީ ހާލުކޮޅު މޮނީޓާ ކުރަމުންދާ ކަމަށް ބީބީސީއިން ވަނީ ކަށަވަރު ކޮށްދީފައެވެ.

މިވަގުތު ބީބީސީއިން އަންނަނީ މިއަދަށް ޝެޑިއުލް ކޮށްފައިވާ ހުރިހާ ޕްރޮގްރާމްތައް ހުއްޓާލާ އުމުރުން 96 އަހަރުގެ ރާނީގެ ސިއްހަތާއި ގުޅިގެން ހާއްސް ލައިވް ކަވަރޭޖެއް ފަށާފައެވެ.

ރާނީގެ ސިއްހަތާއި ގުޅިގެން ދުނިޔޭގެ ގިނަ ގައުމުތަކުގެ ވެރިން އަންނަނީ ކަންބޮޑުވުން ފާޅުކުރަމުންނެވެ. އެގޮތުން އިނގިރޭސި ވިލާތުގެ ބޮޑުވަޒީރު ކަމާއި އަލަށް ގުޅިވަޑައިގެންނެވި ލިޒް ޓްރަސް ވަނީ މުޅި ގައުމު ވެސް ރާނީގެ ސިއްހީ ހާލުކޮޅާއި ގުޅޭގޮތުން ކަންބޮޑުވާ ކަމަށާއި މި ދަތި ވަގުތުގައި ރާނީގެ އާއިލާއަށް ވަނީ ހަމްދަރުދީ ފޮނުވާފަ އެވެ.

މި ވަގުތު ރާނީ އާއި އެކު ވަގުތު ހޭދަ ކުރުމަށް އިނގިރޭސި ޝާހީ އާއިލާގެ މެންބަރުން ދަނީ ބަލްމޯރަލް އަށް ދަތުރު ކުރަމުންނެވެ. އެގޮތުން މިވަގުތު ޝާހީ އާއިލާއާއި ވަކިވެފައިވާ ޕްރިންސް ހެރީ އަދި އޭނާގެ އަންހެނުން މެގަން ވެސް އަންނަނީ ރާނީގެ އަރިހަށް ދަތުރު ކުރަމުންނެވެ.