އިނގިރޭސި ރާނީ އެލިޒަބަތު ދެވަނައިގެ ހަށިކޮޅު ސްކޮޓްލޭންޑުގެ އެޑިންބަރާއަށް ގެންގޮސްފިއެވެ.
ރާނީގެ ހަށިގަނޑު އިއްޔެ އެޑިންބަރާގެ ހޮލީރުޑްހައުސްއާ ގަނޑުވަރަށް ގެންގޮސްފައިވާއިރު، މިއަދާއި ހަމައަށް އެކަމަނާގެ ހަށިކޮޅު އޮންނާނީ އެ ގަނޑުވަރުގައެވެ.
ހަ ގަޑިއިރުގެ މި ދަތުރުގައި ރާނީގެ ހަށިކޮޅު އެޑިންބަރާއަށް ގެންގޮސްފައިވަނީ އެކަމަނާ އަވަހާރަވި ބަލްމަރޯ ކާސަލްއިންނެވެ. ރާނީގެ ހަށިކޮޅު އުފުލުމަށް ހާއްސަކޮށްފައިވާ ކާރުކޮޅު ސްކޮޓްލޭންޑުގެ މަގުތަކުން ދަތުރުކުރިއިރު ގިނަ ބަޔަކު ވަނީ މަގުތަކަށް ނިކުމެ ރާނީ އަށް އިހުތިރާމު އަދާ ކޮށްފައެވެ.
މިއަދު ރާނީގެ ހަށިކޮޅު ހޮލީރުޑްހައުސްއާ ގަނޑުވަރުން އެޑިންބަރާގައި ހުންނަ ސެއިންޓް ގައިލްސަސް ކެތީޑްރަލް އަށް ގެންދެވޭނެއެވެ. އަދި މިއަދުން ފެށިގެން 24 ގަޑިއިރުގެ މުއްދަތަކަށް ސްކޮޓްލޭންޑުގެ އާންމު ރައްޔިތުންނަށް ރާނީގެ މޫނު ބެލުމުގެ ފުރުސަތު ލިބިގެންދާނެއެވެ.
މީގެ އިތުރުން މިއަދު އެ ކެތީޑެރެލްގައި ރާނީގެ ހަދާނުގައި ހާއްސަ ހަފުލާއެއް ބޭއްވިގެން ދާނެއެވެ. މި ހަފުލާގައި އިނގިރޭސިވިލާތުގެ އައު ރަސްގެފާނު، ރަސްގެފާނު ޗާލްސް ތިންވަނަ އަދި ޝާހީ އާއިލާގެ އެހެން މެންބަރުން ބައިވެރިވެވަޑައިގަތުމަށް ވަނީ ހަމަޖެހިފައެވެ. ރަސްގެފާނު ޗާލްސް އެޑިންބަރާއަށް ވަޑައިގަތުމުގެ ކުރިން އިނގިރޭސިވިލާތުގެ ގާނޫނު ހަދާ މަޖިލީހުން ރާނީގެ ހަދާނުގައި ބާއްވާ ހާއްސަ ޖަލްސާއެއްގައި ބައިވެރިވެވަޑައިގަންނަވާނެއެވެ.
މާދަމާ ރާނީގެ ހަށިކޮޅު ސްކޮޓްލޭންޑުން އިނގިރޭސި ވެރިރަށް ލަންޑަނަށް ގެންދެވޭނެއެވެ. ޝާހީ އާއިލާއިން މައުލުމާތުދޭ ގޮތުގައި ރާނީ އެލިޒަބަތުގެ ޖަނާޒާ ބޭއްވުމަށް ހަމަޖެހިފައިވަނީ މި މަހުގެ 19 ވަނަ ދުވަހުއެވެ.
ރާނީ އެލިޒަބަތު އަވަހާރަ ވެފައިވަނީ މިއަދު އެކަމަނާގެ ޑޮކްޓަރުން ހެދި އިވެލުއޭޝަނަކަށް ފަހު އެކަމަނާގެ ސިއްހީ ހާލުކޮޅާ މެދު ކަންބޮޑުވާ ކަމަށް ބުނުމުން އެޑްމިޓްކޮށް ފަރުވާދެމުން ދަނިކޮށް މި މަހުގެ 8 ވަނަ ދުވަހުއެވެ.
Advertisement
This content is created and paid for by advertisers and does not involve Voice Journalists
