އެންމެ ކުޑަ އުޖޫރަ (މިނިމަމް ވޭޖު) ދިނުމުގައި ދިވެހިންނާއި ބިދޭސީ މަސައްކަތްތެރިން ތަފާތުކުރުމަށް ހިތްވަރު ލިބޭ ގޮތަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހީމް ޝަރީފު(މަވޯޓާ) ވާހަކަދައްކަވައިފިއެވެ.
އެފަދައިން ޝަރީފު ވާހަކަދައްކަވާފައިވަނީ ރައްޔިތުންގެ މަޖިލީހުގެ ތިން ވަނަ ދައުރުގެ 11 ވަނަ ޖަލްސާގައި، ސަރުކާރުގެ ފަރާތުން ހުށަައަޅާފައިވާ ވަޒީފާއާއި ބެހޭ ގާނޫނަށް އިސްލާހު ގެނައުމުގެ ބިލަށް ބަހުސްކުރައްވަމުންނެވެ.
ސަރުކާރުގެ ފަރާތުން ހުށައެޅި އެ ބިލުގައިވަނީ ދިވެހިރާއްޖޭގެ އިގްތިސާދާއި ފުދުންތެރިކަމާއި އުފެއްދުންތެރި ކަމަށް ރިއާޔަތްކޮށް, މުސާރައިގެ ގޮތުން އެންމެ ކުޑަމިނުން ދޭންޖެހޭ އުޖޫރަ ނުވަތަ މިނިމަމް ވޭޖް ބިދޭސީންނަށް ދިނުން ވަކި މުއްދަތެއް ނެތް ގޮތަށް ފަސްކުރުމަށް ވަޒީފާއާ ބެހޭ ގާނޫނު އިސްލާހުކުރުމަށް ހުށައަޅާފައެވެ.
އެ ބިލަށް ބަހުސްކުރައްވަމުން ޝަރީފު ވިދާޅުވީ އެއީ ރާއްޖޭގެ އިގްތިސާދީ ހާލަތާއި ބަލާ މުހިންމު އިސްލާހެއް ކަމަށެވެ. މިއަދު މި އޮތީ އެ ހާލަތު ބައްދަލުކޮށްފައި ކަމަށާއި، އެހެންކަމުން، މިހާލަތުގައި މިނިމަމް ވޭޖު ދިނުމުގައި ދިވެހިންނާއި ބިދޭސީ މަސައްކަތްތެރިން ތަފާތުކުރަން ޖެހޭކަމަށް އޭނާ ވިދާޅުވިއެވެ.
"ބައެއް ބޭފުޅުން ތަފާތުކުރުމޭވެސް ވިދާޅުވެދާނެ، ތަފާތުކުރަން ޖެހޭ ހާލަތްތަކުގައި ތަފާތުވެސް ކުރަން ޖެހޭނެ، އެއީ ހަގީގަތަކީ"
މަރަދޫ ދާއިރާގެ މެމްބަރު އިބްރާހީމް ޝަރީފު (މަވޯޓާ)
އެއާއެކު އޭނާ ވިދާޅުވީ ކޮންމެ ގައުމެއްގައިވެސް އެ ގައުމެއްގެ ރައްޔިތުންނަށް ޚާއްސަ އިމްތިޔާޒުތަކާއި އިނާޔަތްތައް ދެމުން ގެންދާ ކަމަށެވެ. އެގޮތުން ދިވެހިރާއްޖޭގައިވެސް ބިދޭސީ ފަރާތްތަކަށް ނޯންނަ އިމްތިޔާޒުތައް އޮންނާނެކަން އޭނާ ފާހަގަކުރެއްވިއެވެ.
ޝަރީފުގެ ވާހަކައިގައި ވަނީ ރާއްޖޭގެ އިގްތިސާދަށް މި އައި ހީނަރުކަމާއެކު، މިނިމަމް ވޭޖު ކަނޑައެޅުމުގައި ތަފާތު ކުރުމަކީ، ނުވަތަ ބިދޭސީންނަށް މިނިވަން ވޭޖު ކަނޑައެޅުން ފަސްކުރުމަކީ ދިވެހިންނާއި ބިދޭސީން ތަފާތުކުރުންކަމަށް ގަބޫލު ނުކުރައްވާކަމަށްވެސް އޭނާ ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
