ކުރީގެ މަޝްހޫރު ފިލްމީ ތަރި މަރިޔަޝް ނިޝާ ޖުމްހޫރީ ޕާޓީއަށް ސޮއިކޮށްފިއެވެ. 

މަރިޔަމް ނިޝާ ވަނީ ޖޭޕީއަށް ސޮއިކުރުމަށްފަހު ފޯމު ޕާޓީގެ ނައިބުރައީސް އަހުމަދު ސައުދު އާއި ޕާޓީގެ އަންހެނުންގެ ރޫހުގެ ރައީސް ވަލީދާއާއި ހަވާލުކުރައްވާފައެވެ. 

ޖުމްހޫރީ ޕާޓީއިން ވަނީ ނީޝާ އެ ޕާޓީއާއި ގުޅިވަޑައިގެންނެވިކަން ފާހަގަކުރައްވާ މަރުހަބާ ދަންނަވާފައެވެ. 

Advertisement

މަރިޔަމް ނިޝާއަކީ ރާއްޖޭގެ ގިނަ ރައްޔިތުންގެ ލޯބި ހޯދައިފައިވާ، ފިލްމީ ތަރިއެވެ. އެ ދާއިރާގައި ގިނަ ދުވަސްތަކެއް ވަންދެން މަސައްކަތްކޮށްފައިވާ އަދި ރީތި ފިލްމުތަކެއް ކުޅެފައިވާ ފަންނާނެކެވެ. 

ނިޝާ ޖޭޕީ އާއި ގުޅިފައިވާއިރު، އެ ޕާޓީއިން ގެންދަނީ 2023 ގެ ރިޔާސީ އިންތިޚާބަށް ތައްޔާރުވާން ފަށާފައެވެ. އެގޮތުން ޕާޓީގެ ހިންގުން ވަރުގަދަ ކުރުމަށް މަސައްކަތްތަކެއް ފަށާފައިވާކަމަށް ޖޭޕީއިން ވަނީ ބުނެފައެވެ. 

އަދި ޕާޓީގެ ހިންގުން ހަރުދަނާކުރުމަށް އެ ޕާޓީގެ ގައުމީ ބައްދަލުވުން އޮކްޓޫބަރުގައި ބޭއްވުމަށްވެސް ޖޭޕީއިން ގެންދަނީ ތައްޔާރުވަމުންނެވެ.

އޭގެ އިތުރުން ޕާޓީއަށް މެމްބަރުން އިތުރުކުރުމުގެ މަސައްކަތްވެސް އެ ޕާޓީއިން ކުރިއަށް ގެންދާކަން ފާހަގަކޮށްލެވެއެވެ.