ރާނީ އެލިޒަބަތު ދެވަނައިގެ ޖަނާޒާގައި ބައިވެރިވެ ވަޑައިގަތުމަށް ރައީސުލް ޖުމްހުރިއްޔާ އިބްރާހިމް މުހައްމަދު ޞާލިހް ވަޑައިގަންނަވަން ނިިންމަވައިފިއެވެ.
ރައީސް މިގޮތަށް ނިންމަވާފައިވާކަން ރައީސް އޮފީހުގެ ތަރުޖަމާނު މުހައްމަދު މިއުވާން ވަނީ 'ވޮއިސް' އަށް ކަށަވަރު ކޮށްދީފައެވެ. މިކަމާއި ގުޅިގެން މިއުވާން ވިދާޅުވެފައިވަނީ ރާނީ އެލިޒަބަތު ދެވަނައިގެ ޖަނާޒާގައި ރައީސް ޞާލިހް ބައިވެރިވެވަޑައިގަންނަވާނެ ކަމަށެވެ. އަދި މިކަމާއި ގުޅޭ އިތުރު ތަފްސީލު ކުރިއަށް އޮތް ތަނުގައި ހިއްސާކުރައްވާނެ ކަމަށްވެސް މިއުވާން ވަނީ ވިދާޅުވެފައެވެ.
މި މަހު 8 ވަނަ ދުވަހު ސްކޮޓްލޭންޑުގެ ބަލްމޯރަލް ކާސަލްގައި އަވަހާރަވި ރާނީގެ ޖަނާޒާ ބޭއްވުމަށް ހަމަޖެހިފައިވަނީ މި މަހުގެ 19 ވަނަ ދުވަހު އިނގިރޭސިވިލާތުގެ ލަންޑަނުގައެވެ.
މިއަދު ރާނީގެ ހަށިކޮޅު ސްކޮޓްލޭންޑުން އިނގިރޭސި ވިލާތައް ގެންދިއުމަށް ހަމަޖެހިފައިވާއިރު އިއްޔެ ސްކޮޓްލޭންޑުގެ އެޑިންބަރާގައި އެކަމަނާގެ ހަދާނުގައި ވަނީ ހާއްސަ ހަފުލާއެއް ބާއްވާފައެވެ. މި ހަފްލާގައި ރާނީ އަވަހާރަވުމުން ތަހުތާއި ހަވާލުވެވަޑައިގެންނެވި އެކަމަނާގެ ދޮށީ ދަރިކަލުން ރަސްގެފާނު ޗާލްސް ތިންވަނައިގެ އިތުރުން އިނގިރޭސި ޝާހީ އާއިލާގެ މެންބަރުން ވަނީ ބައިވެވެވަޑައިގަނެފައެވެ.
ރާނީ އެލިޒަބަތުގެ ޖަނާޒާގައި ދުނިޔޭގެ ގިނަ ގައުމުތަކުގެ ވެރިން ބައިވެރިވެވަޑައިގަންނަވާނެ ކަމަށް މައުލޫމާތު ލިބޭއިރު، އެމެރިކާގެ ރައީސް ޖޯ ބައިޑަން ވެސް ޖަނާޒާގައި ބައިވެރިވެވަޑައިގަންނަވާނެ ކަމަށް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
