މެމްބަރުންނަށް އެނގުމަކާއި ނުލާ، ރަޖިސްޓްރީވެފައިވާ ސިޔާސީ ޕާޓީ ނޫން އެހެން ޕާޓީތަކަށް މެމްބަރުން ބަދަލުކުރާ މައްސަލައާއި، އޮޅުވާލައިގެން ސިޔާސީ ޕާޓީތަކަށް މެމްބަރުން ވައްދާ މައްސަލަ ހައްލުކުރުމަށް ޕާޓީއަށް ވަނުމަށް ހުށައަޅާ ފޯމުގައި ޖަހާ ފިންގަރ ޕްރިންޓު ވެރިފައި ކުރާނެ މެޝިނެއް އިލެކްޝަންސް ކޮމިޝަނަށް ހޯދުމަކީ ކޮންމެހެން ކުރަންޖެހޭ ކަމެއްކަމަށް މަޖިލީހުގެ ނައިފަރު ދާއިރާގެ މެމްބަރު އަދި ޕީޕީއެމްގެ ނައިބުރައީސް އަހުމަދު ޝިޔާމު ވިދާޅުވެއްޖެއެވެ. 

ޕީޕީއެމްގެ މެމްބަރުން އެހެން ޕާޓީތަކަށް ބަދަލުކުރަމުންދާކަމުގެ ޝަކުވާތަކާއި ކަންބޮޑުވުންތަކާއެކު، އެ ޕާޓީގެ ލީޑަރޝިޕްގައި ހިމެނިވަޑައިގަންނަވާ މެމްބަރުން ވަނީ މިއަދު އިލެކްޝަންސް ކޮމިޝަނާއި ބައްދަލުކޮށްފައެވެ. 

އީސީގެ މެމްބަރުންނާއެކު ކުރިއަށް ދިޔަ ބައްދަލުވުމަށްފަހު ނޫސްވެރިންނަށް މައުލޫމާތު ދެއްވަމުން ޝިޔާމު ވިދާޅުވީ، ޕީޕީއެމްގެ މެމްބަރުން އެހެން ޕާޓީތަކަށް ބަދަލުކުރާ މައްސަލައަކީ އެ ޕާޓީގެ ބޮޑު ކަންބޮޑުވުމެއް އޮތް މައްސަލައެއްކަމަށެވެ. 

އަދި އެއީ އެ ޕާޓީގެ އާންމު މެމްބަރުންގެވެސް ބޮޑު ކަންބޮޑުުމެއް އޮތް މައްސަލައެއްގެ ގޮތުގައި ޝިޔާމު ފާހަގަކުރެއްވިއެވެ. 

ޝިޔާމު ވިދާޅުވީ އެ ޕާޓީ ނޫނަސް، އާންމު ރައްޔިތުންގެ އިތުބާރު ހޯދުމަށް ޕާޓީއަށް ވަނުމަށް ހުށައަޅާ ފޯމުގައި ޖަހާފައި އޮންނަ ފިންގަރޕްރިންޓު ވެރިފައި ކުރެވޭނެ ނިޒާމެއް އީސީގައި ގާއިމުކުރަން ޖެހޭކަމަށެވެ. އެކަމަށްޓަކައި އެ ކޮމިޝަނަށް ފިންގަރޕްރޮންޓް މެޝިނެއް މުހިންމު ކަމަށާއި، މެޝިން ހޯދުމަށް އަންނަ އަހަރުގެ ބަޖެޓުގައި ހިމެނުމަށް އީސީއަށް ދަންނަވާފައިވާނެކަމަށް ޝިޔާމު ވިދާޅުވިއެވެ.

މީގެ ކުރިންވެސް ޕީޕީއެމުން ވަނީ އެ ޕާޓީގެ މެމްބަރުން އެހެން ޕާޓީތަކަށް ވަގަށް ނަގާ މައްސަލަތައް އިލެކްޝަން ކޮމިޝަނަށް ހުށައަޅާފައެވެ. 

މިހާތަނަށް އައިރު އެފަދަ މައްސަލަތަކަށް އެކަށީގެންވާ ފިޔަވަޅެއް އީސީއިން އަޅާފައި ނުވާއިރު، އިދިކޮޅުން ގެންދަނީ މެމްބަރުން އެހެން ޕާޓީތަކަށް ބަދަލުކުރަނީ އިލެކްޝަން ކޮމިޝަންގެ ތެރެއިންކަމަށްވެސް ތުހުމަތު ކުރަމުންނެވެ.