އިނގިރޭސިވިލާތުގެ ރާނީ އެލިޒަބަތު ދެވަނައިގެ ހަށިކޮޅު އެގައުމުގެ ވެރިރަށް ލަންޑަންގައި ހުންނަ ބަކިންހަމް ގަނޑުވަރަށް ގެނެސްފިއެވެ. 

މި މަހުގެ 8 ވަނަ ދުވަހު ސްކޮޓްލޭންޑުގެ ބަލްމޯރަލް ކާސަލްގައި އަވަހާރަވި ރާނީ އެލިޒަބަތުގެ ހަށިކޮޅު އެންމެ ފުރަތަމަ ގެންދެވިފައިވަނީ އެ ގައުމުގެ އެޑިންބަރާއަށެވެ. ސްކޮޓްލޭންޑުގެ ރައްޔިތުންނަށް އެކަމަނާގެ މޫނު ބެލުމުގެ ފުރުސަތު ދިނުމުގެ އިތުރުން އެޑިންބަރާގެ ސެއިންޓް ގައިލްސަސް ކެތީޑްރަލް ގައި ވަނީ އެކަމަނާގެ ހަދާނުގައި ހާއްސަ ހަފުލާއެއް ބޭއްވިފައެވެ. މި ހަފްލާގައި އިނގިރޭސިވިލާތުގެ އައު ރަސްގެފާނު، ރަސްގެފާނު ޗާލްސް ތިންވަނަ އަދި ޝާހީ އާއިލާގެ އެހެން މެންބަރުން ބައިވެރިވެވަޑައިގަންނަވާފައި ވެއެވެ. 

ސްކޮޓްލޭންޑުން ރާނީގެ ހަށިކޮޅު އިނގިރޭސިވިލާތުގެ ވެރިރަށް ލަންޑަނަށް ގެންދެވިފައިވަނީ ވައިގެ މަގުން އަސްކަރީ މަތިންދާ ބޯޓެއްގައެވެ. ރާނީގެ ހަށިކޮޅު އުފުލި މި ދަތުރު 6 މިލިއަނަށްވުރެ ގިނަ މީހުން ޓްރެކް ކުރިކަމަށް މަޝްހޫރު ފްލައިޓް ޓްރެކިން އެޕްލިކޭޝަން "ފްލައިޓް ރޭޑާ24" އިން ވަނީ ބުނެފައެވެ. 

Advertisement

ލަންޑަނުގެ އެއާޕޯޓުން ބަކިންހަމް ގަނޑުވަރަށް ރާނީގެ ހަށިކޮޅު އެކަމަށް ހާއްސަކޮށްފައިވާ ކާރުކޮޅެއްގައި ގެންދެވުނު އިރު މަގުތަކަށް އަދި ހާއްސަކޮށް ގަނޑުވަރުގެ ވަށައިގެންވާ ސަރަހައްދަށް ގިނަ އަދަދެއްގެ އާންމުން ވަނީ އެއްވެފައެވެ.

ރާނީ އެލިޒަބަތު ދެވަނައިގެ ޖާނާޒާ މި މަހުގެ 19 ވަނަ ދުވަހު ލަންޑަނުގައި ބޭއްވުމަށް ހަމަޖެހިފައިވާއިރު މި ޖަނާޒާގައި ދުނިޔޭގެ ގައުމުތަކުގެ އިސްވެރިން ބައިވެރިވެވަޑައިގަންނަވާނެ ކަަމަށް މައުލޫމާތު ލިބެއެވެ.