ޖަލުގައި ކުއްލި ގޮތަކަށް ނިޔާވި މުހައްމަދު ނަޝީދު މަރުވާން ދިމާވި ސަބަބުތައް ބަލައި، އެ މަރުގެ ހަގީގަތް ރައްޔިތުންނަށް ހާމަކުރުމަށް އިދިކޮޅު އިއްތިހާދުން ގޮވާލައިފިއެވެ. 

އިދިކޮޅުން ވަނީ އެފަދައިން ގޮވާލާ ބަޔާނެއްވެސް ނެރެފައިއެވެ. 

އިދިކޮޅުގެ ބަޔާނުގައި ބުނެފައިވަނީ ޝަރީއަތް ނިމެންދެން ވާނުވާ ނޭނގޭ ގޮތަށް ބަންދުގައި ބައްހައްޓާފައި ހުރި ޤައިދީއަކު ކުއްލި ގޮތަކަށް ނިޔާވި ޚަބަރު މިކޯލިޝަނުން އެހީ ނުހަނު އަސަރާއި ހިތާމައާއެކުގައި ކަމަށެވެ.

ޖަލުގައި ކުއްލި ގޮތަކަށް ނިޔާވި މ. މުލީ ހުދުފިނިފެންމާގޭ މުޙައްމަދު ނަޝީދުގެ ފުރާނައަށް މާތްﷲ ސުބުޙާނަހޫ ވަތަޢާލާ ރަޙުމަތް ލައްވާ، ފާފަ ފުއްސަވާ ސުވަރުގޭގެ މަތިވެރި ނިޢުމަތް މިންވަރު ކޮށްދެއްވުން އެދި ދުއާކުރާކަމަށް ބަޔާނުގައި ލިޔެފައިވެއެވެ.

މަރްޙޫމް މުޙައްމަދު ނަޝީދު ޢާއިލާއަށް މިކޯލިޝަންގެ ލީޑަރ، ޕްރޮގްރެސިވް ޕާޓީ އޮފް މޯލްޑިވްސް (ޕީ.ޕީ.އެމް) ގެ ރައީސް، ރައީސް ޢަބްދުﷲ ޔާމީން ޢަބްދުލްޤައްޔޫމް އާއި ލީޑަރޝިޕާއި، ސެނެޓާއި، ސްޓިއަރިންގ ކޮމިޓީތަކާއި އަދި ޢާންމު މެންބަރުންގެ ނަމުގައި ތަޢުޒިޔާ ދަންނަވައި ޢާއިލާއަށް ކެތްތެރިކަން މިންވަރު ކުރެއްވުން އެދި ދުޢާ ކުރާކަންވެސް ބަޔާންކޮށްފައިވެއެވެ.

އިދިކޮޅުން ބުނީ ކުއްލި ގޮތަކަށް ނޭވާ ނުލެވި ޖަލުގައި ނިޔާވި ނަޝީދު ނިޔާވުމުގެ ކުރިން އޭނާގެ ނޭވާއަށް އުނދަގޫ ވާކަން ޖަލުގެ އޮފިސަރުންނާއި ޙިއްސާ ކުރުމުންވެސް، އެކަމުގައި ފަރުވާ ކުޑަކޮށް، އެކަށިގެންވާ ފަރުވާ ދީފައި ނުވާ ކަމާއި، އަދި ތަކުރާރުކޮށް އަނިޔާ ކުރާކަމުގެ ޝަކުވާ ނަޝީދުގެ ލޯޔަރުންނަށް ލިބިފައިވާކަމުގެ މަޢުލޫމާތު އެ ކޯލިޝަނަށް ލިބިފައިވާކަމަށެވެ. 

އެހެންކަމުން، މި މައްސަލައިގެ ފުރިހަމަ ތަޙުޤީޤެއް ހިންގައި، މަރުގެ ޙަޤީޤަތް ހާމަކުރުމަށާއި، މިކަމުގައި އިހުމާލުވާ ފަރާތްތައް އިންސާފުގެ ކުރިމައްޗަށް ގެނައުމަށް އިދިކޮޅުން ވަނީ ގޮވާލާފައެވެ.

ހަމައެއާއެކު، މި މައްސަލަ އަވަސް މައްސަލައެއްގެ ގޮތުގައި ބެލުމަށް ހިއުމަންރައިޓްސް ކޮމިޝަން އޮފް ދަ މޯލްޑިވްސް އާއި ދައުލަތުގެ ކަމާ ބެހޭ މުއައްސަސާތަކަށްވެސް އިދިކޮޅުން ވަނީ ގޮވާލާފައެވެ.