ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހުގެ ގައިގައި މުނާފިގުންގެ ހުރިހާ ސިފައެއް ހަމަވާކަމަށް ކުރީގެ ނައިބުރައީސް އަދި ޕީޕީއެމްގެ މުސްތަޝާރު ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ. 

ޑރ. ޖަމީލު މިފަދައިން ވިދާޅުވެފައިވަނީ މި ސަރުކާރުން ގާނޫނު ތަންފީޒުކުރުމުގައި ގެންގުޅޭ "ސެލެކްޓިވް ޕްރޮސެކިއުޝަން" ގެ އުސޫލަށް ފާޑުވިދާޅުވެ ކުރެއްވި ޓްވީޓެއްގައެވެ. 

ޑރ ޖަމީލުގެ ޓްވީޓުގައިވަނީ މި ސަރުކާރުގެ ވެރިންނާއި، ސަރުކާރު ހިންގާ މައި ޕާޓީ އެމްޑީޕީއަށް ނިސްބަތްވާ މީހުން ކޮށްފައިވާ ބޮޑެތި ކުށްތަކަށް ދީފައިވާ ލުއި އަދަބުތަކުގެ މިސާލުތައް ހިމަނުއްވާފައެވެ. 

Advertisement

އެގޭތެރޭގައި އެމްޑީޕީގެ އެކްޓިވިސްޓެއްކަމަށްވާ ހޯރަ އިއްބެ ކުޑަކުއްޖަކަށް ޖިންސީ ގޯނާކޮށްގެން ޖަލު ހުކުމް ތަންފީޒުކުރަމުން ދަނިކޮށް މިނިވަންކުރުމާއި، އެމްޑީޕީގެ ރައީސް މުހައްމަދު ނަޝީދުގެ ކޮއްކޮ ނާޒިމް ސައްތާރުގެ މައްޗަށް އެއްޖިންސުން ގުޅުންހިންގިކަން ސާބިތުވުމުން ކުރި ލުއި ހުކުމް ހިމަނާފައިވެއެވެ. 

އޭގެއިތުރުން އެމްއެމްޕީއާރުސީގެ ޚިޔާނާތުގައި ޝާމިލުވާކަމަށް ތުހުމަތު އޮތް އެމްޑީޕީގެ މެމްބަރުންގެ މައްސަލަތައް ނުބެލުމާއި، ޔޫތު މިނިސްޓަރު އަހުމަދު މަހުލޫފަށް ދީފައިވާ ލުއިތައްވެސް ޑރ. ޖަމީލު ވަނީ ފާހަގަކުރައްވާފައެވެ. 

އެކަންކަން ފާހަގަކުރައްވާ ޑރ. ޖަމީލު ވިދާޅުވީ ސަރުކާރުން އިންސާފު ގާއިމުކުރުމުގައި ގެންގުޅޭ އުސޫލުތަކުގެ ސަބަބުން ރައީސް ސޯލިހުގެ މުނާފިގު ސިފަތައް ފެނިގެންދާކަމަށެވެ. 

އިންސާފު ގާއިމުކުރުމާއި ޝަރުއީ ދާއިރާ އިސްލާހުކުރުމަކީ އެމްޑީޕީގެ ރިޔާސީ ވައުދުތަކުގެ ތެރޭގައި ހިމެނޭ މުހިންމު ވައުދެކެވެ. އެކަމަށްޓަކައި ޖުޑިޝަލް ސަރވިސް ކޮމިޝަންގެ ކޮމްޕޮސިޝަން ބަދަލުކުރާނެކަމަށް އެ ޕާޓީއިން ވަނީ ބުނެފައެވެ. 

އެހެން ނަމަވެސް މިހާތަނަށް ޖޭއެސްސީ އެތުރިފައިވާ ގޮތް ބަދަލުކުރުމަށް މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު 3 ފަހރު މަތިން އިސްލާހު ހުށައަޅާފައިވާއިރު، އެމްޑީޕީ ސުޕަތ މެޖޯރިޓީ އޮންނަ ރައްޔިތުންގެ މަޖިލީހުން ވަނީ ބިލު ބޭރުކޮށްލާފައެވެ. 

މިހާތަނަށް އެމްޑީޕީއިން ޖޭއެސްސީ އިސްލާހުކުރުމަށް މަޖިލީހަށް ބިލެއް ހުށައަޅާފައި ނުވާކަން ފާހަގަކޮށްލެވެއެވެ.