ބުރުނާއީ އާއި ލާއޮސް އާއި ދެކޮޅަށް އެކުވެރިކަމުގެ ދެ މެޗު ކުޅުމަށް ގައުމީ ފުޓްބޯޅަ ޓީމު މިއަދު ހެދުނު ބުރުނާއީ އަށް ފުރައިފިއެވެ.
މި އަހަރުގެ ވޯލްޑް ކަޕުގެ ކުރިން ލިބޭ ހަމައެކަނި އިންޓަނޭޝަނަލް ބްރޭކް މި ހަފްތާ ފެށޭއިރު މި މެޗުތަަކަށް ތައްޔާރުވުމުގެ ގޮތުން ގައުމީ ޓީމުން ފަރިތަކުރުންތައް ފަށާފައިވަނީ މި މަހުގެ ފުރަތަމަ ހަފްތާގެ ތެރޭގައެވެ.
ގައުމީ ކޯޗު އިޓަލީގެ ފްރެންޗެސްކޯ މޮރިއޭރޯ ގެ އިރުޝާދުގެ ދަށުން ފަރިތަކުރުންތައް ކުރިއަށް ގެންގޮސް ގައުމީ ޓީމުން ވަނީ އޭދަފުށީ ޓީމާއި ދެކޮޅަށް އެރަށުގައި އެކުވެރި ކަމުގެ މެޗެއް ކުޅެފައެވެ. މި މެޗު ގައުމީ ޓީމުން ކާމިޔާބު ކޮށްފައިވަނީ 0-3 ގެ ނަތީޖާއަކުން ގައުމީ ޓީމުންނެވެ.
ބުރުނާއީގައި ކުޅުމަށް ހަމަޖެހިފައިވާ ދެ މެޗުގެ ތެރެއިން ފުރަތަމަ މެޗުގައި ރާއްޖެއިން ނުކުންނާނީ އެ ގައުމާއި ދެކޮޅަށެވެ. މި މެޗު ކުޅުމަށް ހަމަޖެހިފައިވަނީ މި މަހުގެ 21 ވަނަ ދުވަހުއެވެ. ދެވަނަ މެޗުގައި ރާއްޖެއިން ލާއޮސްއާއި ދެކޮޅަށް ނުކުންނާނީ މި މަހުގެ 24 ވަނަ ދުވަހުއެވެ.
ރާއްޖޭގެ ގައުމީ ޓީމުން އެންމެ ފަހުން މެޗެއް ކުޅެފައިވަނީ ޖޫން މަހު 14 ވަނަ ދުވަހު އޭސިއަން ކަޕް ކޮލިފިކޭޝަން ގައި އަވައްޓެރި ސްރީ ލަންކާ އާއި ދެކޮޅަށެވެ. މި މެޗު ރާއްޖެއިން ކާމިޔާބުކުރީ 0-1 ގެ ނަތީޖާއަކުންނެވެ.
Advertisement
This content is created and paid for by advertisers and does not involve Voice Journalists
