ދުނިޔެއަށް ދިމާވެފައިވާ އިގުތިސާދީ އެކިއެކި ދަތިކަމުގެ ތެރެއިން ވެސް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މި ގައުމު ބިނާ ކުރައްވަމުން ގެންދަވާ ކަމަށް ރައްޔިތުންގެ މަޖިލީހުގެ ވިލިނގިލި ދާއިރާގެ މެންބަރު ސައުދު ޙުސައިން ވިދާޅުވެއްޖެއެވެ.
ގއ. ވިލިނގިލީގެ އެމްޑީޕީގެ މެންބަރުންނާ ރޭ ބައްދަލު ކުރައްވައި، އެ ރަށުގައި ޕާޓީގެ ހަރަކާތްތައް ފުޅާކޮށް، ކުރިއަށް އޮތް ރިޔާސީ އިންތިހާބަށް ތައްޔާރު ވުމާއި ގުޅޭގޮތުން ސައުދު ވަނީ މަޝްވަރާތައް ކުރިއަށް ގެންދަވާފައެވެ.
އެ ބައްދަލުވުމަށްފަހު ސައުދު ކުރެއްވި ޓުވީޓެއްގައި ވިދާޅުވީ، ރައީސް ޞާލިޙްގެ ލީޑަރޝިޕްގައި ދިވެހި ގައުމު ކޮވިޑު19އިގެ ބަލިމަޑުކަމުން އަރައިގަނެ، ރަޝިޔާ ޔޫކްރޭން ހަނގުރާމައިގެ އިގުތިސާދީ ދަތިކަމުގެ ތެރެއިން ވެސް ގައުމު މިދަނީ ބިނާ ކުރެވެމުން ކަމަށެވެ.
އަމިއްލަ ގޮތުން ވާދަކުރަށްވައި 19 ވަނަ މަޖިލީހަށް އިންތިހާބުވެ ވަޑައިގެން ގިނަ ދުވަސްތަކެއް އެގޮތުގައި ހޭދަ ކުރެއްވުމަށްފަހު، މި އަހަރުގެ މެއި 20 ވަނަ ދުވަހު ސައުދު ވަނީ އެމްޑީޕީއާއި ގުޅިވަޑައިގެންފައެވެ. އެއަށްފަހު އޭނާ މިހާރު ފާހަގަކުރެވެނީ، ރައީސް ޞާލިހުގެ މި ސަރުކާރަށް ވަރަށް ބޮޑަށް ތައުރީފް ކުރައްވާ މެންބަރެއްގެ ގޮތުގައެވެ.
Advertisement
This content is created and paid for by advertisers and does not involve Voice Journalists
