އައްޑޫ އެކުއަޓޯރިއަލް ހޮސްޕިޓަލަށް 34 ހާސް ރުފިޔާއަށް ގަނެވެން އޮތް މައިކްރޯޕައިޕެޓް ޓިޕްސްތަކެއް އެތައް ގުނަ އަގުބޮޑުކޮށް ގަނެފައިވާ މައްސަލައެއް ފެންމަތިވެއްޖެއެވެ.

މިކަން ހާމަވެފައިވަނީ އޮޑިޓަރ ޖެނެރަލްގެ އޮފީހުން ނެރެފައިވާ އައްޑޫސިޓީ އެކުއެޓޯރިލއަލް ހޮސްޕިޓަލުގެ ކޮމްޕްލަޔަންސް އޮޑިޓް ރިޕޯޓުންނެވެ. މިކަމާ ގުޅޭގޮތުން އެ ރިޕޯޓްގައި ބުނެފައިވަނީ، ލެބޯޓްރީ ކޮންސިއުމަބަލްސް ފޯރުކޮށްދިނުމަށް ހުށަހަޅާފައިވާ އަގުތައް ރަނގަޅަށް ނުބެލުމުގެ ސަބަބުން 34،000 ރުފިޔާއަށް ގަނެވެން އޮތް އައިޓަމެއް 1،765،800 ރުފިޔާއަށް ގަނެފައިވާކަމަށެވެ. މި މުއާމަލާތް ހިނގާފައިވަނީ މިދިޔަ އަހަރުގެ އޮކްޓޯބަރުމަހުގެ ތެރޭގައެވެ. 

އޮޑިޓް ރިޕޯޓުން އެނގޭގޮތުގައި ބޮޑުއަގުގައި ގަތް އެއްޗަކީ މައިކްރޯޕައިޕެޓް ޓިޕްސްތަކެކެވެ. މި އެއްޗަކީ ލެބޯޓްރީތަކުގައި ދިޔާތަކެތި އެއްތަނުން އަނެއްތަނަށް ބަދަލުކުރުމަށް ބޭނުންކުރާ މައިކްރޯޕައިޕެޓްތަކުގެ ކޮޅަށް ޖަހާ، އެއްފަހަރު ބޭނުންކޮށްފައި އުކާލާ ޕްލާސްޓިކް ކޮޅުތަކެކެވެ.

އޮޑިޓަރ ޖެނެރަލް ނެރުއްވި ރިޕޯޓްގައިވާގޮތުން މިދިޔަ އަހަރުގެ އޮކްޓޯބަރުމަހު ހޮސްޕިޓަލަށް ބޭނންވާ ތަކެތި ހޯދުމަށް ކުރި އެ އިއުލާނާ ގުޅިގެން އެހެން ބާވަތުގެ އެއްޗެހިވެސް އަގުބޮޑުކޮށް ހޯދި މައްސަލަ ވަނީ ފާހަގަކޮށްފައެވެ. ހޯދި ހުރިހާ އެއްޗެއްގެ އަގު 2.7 މިލިއަން ރުފިޔާއަށް އަރައެވެ. މި އެއްޗެހި ހޯދުމުގެ ގޮތުން ކުރިއަށްގެންދިޔަ މުއާމަލާތްތަކުގައިވެސް މައްސަލަ ހުރިކަމަށް ރިޕޯޓްގައި ވަނީ ބުނެފައެވެ.

އޮޑިޓުން އެނގޭ ގޮތުގައި ބޮޑުއަގުގައި އެއްޗެހި ގަތް އެ މައްސަލަ އޭސީސީއަށްވެސް ވަނީ ހުށަހަޅާފައެވެ. އަދި ކޮމިޝަނުން ދަނީ މި މައްސަލަ ބަލަމުންނެވެ. އޮޑިޓް އޮފީހުން ވަނީ މި މައްސަލަ ބަލައި ނުނިމެނީސް އެތަކެތި ސަޕްލައިކޮށްދިން ފަރާތުން ހުށަހެޅި އެއްވެސް ބިލަކަށް ފައިސާ ނުދެއްކުމަށްވެސް އެދިފައެވެ.