ވެލާނާ އިންޓަރނޭޝަނަލް އެއަރޕޯޓުން ފުލުހުން ހައްޔަރު ކުރި އިންޑިއާ ޖާސޫސުންގެ މައްސަލަ އިންސާފުވެރިކަމާއިއެކު ބެލުމަކީ އާއްމުންގެ ސަލާމަތަށް މުހިންމު ކަމެއް ކަމަށް ރައްޔިތުންގެ މަޖިލީހުގެ މާވަށު ދާއިރާގެ މެންބަރު މުހައްމަދު ސައީދު ވިދާޅުވެއްޖެއެވެ. 

އިންޑިއާގެ ޖާސޫސުންތަކެއް ރާއްޖެގެ ވެލާނާ އިންޓަރނޭޝަނަލް އެއަރޕޯޓުން މިދިޔަ އޯގަސްޓްމަހުގެ 28 ވަނަ ދުވަހުގެ ރޭ ފުލުހުން ވަނީ އަތުލައިގަނެފައެވެ. 

އެ މައްސަލާގައި ފުލުހުން ފުރަތަމަ ބުނެފައިވަނީ ސިއްރު ކެމެރާއެއް ގެންގުޅުނު މައްސަލާގައި ދެ މީހަކު ހާޒިރުކޮށް ސުވާލުކުރި ކަމަށެވެ. ނަމަވެސް އޭގެ ފަހުން އެ ދެ މީހުން ހައްޔަރުކޮށް މިދިޔަ މަހު 29 ގައި ވަނީ ބަންދަށް 10 ދުވަސް ކޯޓުން ދީފަ އެވެ. އޭގެ ފަހުން މި މައްސަލާގައި ފުލުހުން ތަފްސީލެއް ނުދެ އެވެ. 

Advertisement

އެ މައްސަލައާއި ގުޅޭގޮތުން "ވޮއިސް" އިން ގެނެސްދިން ތަހުގީގީ ރިޕޯޓަކާއި ގުޅިގެން ސައީދު ކުރެއްވި ޓުވީޓެއްގައި ވިދާޅުވީ، މިމައްސަލަ މަޖިލީހުގެ 241 ކޮމެޓީ ނުވަތަ ސަލާމަތީ ޚިދުމަތްތަކާބެހޭ ކޮމިޓީން އިންސާފުވެރިކަމާއިއެކު ބެލުމަކީ ރާއްޖޭގެ ފަތުރުވެރިކަމުގެ ސިނާއަތުގެ ރައްކާތެރިކަމާއި ޢާއްމު ސަލާމަތައް ވަރަށް މުހިއްމުކަމެއް ކަމަށެވެ.

ވެލާނާ އިންޓަރނޭޝަނަލް އެއަރޕޯޓްގައި ވެރިއަކު ނެތި ދޫކޮށްލާފައިވާ ލަގޭޖެއް ހުރި ކަމަށް ރިޕޯޓްކުރުމާއި ގުޅިގެން ފުލުހުން އެއާޕޯރޓްގައި އޮޕަރޭޝަނެއް ހިންގާފައިވާ ކަމަށް ފުލުހުން ބުނެފައިވެއެވެ. އަދި އެ މައްސަލާގައި އެއާރޕޯޓުން ހައްޔަރު ކުރި ދެ މީހުން ހައްޔަރު ކުރި ސަބަބާއި ގުޅޭގޮތުން މައުލޫތު ދެމުން ފުލުހުން ބުނީ، އެ ލަގެޖުގައި އޮތް ގަމީހެއްގައި ބަޓަން ކެމެރާއެއް އިންކަން އެނގުމާ އެކު ލަގެޖް ބެހެއްޓީ ކާކުކަން ބެލުމަށް ފަހު، އިތުރު ބައެއްކަންކަން ސާފުކުރުމަށް އެ ލަގޭޖާ ގުޅުންހުރި ދެ ބިދޭސީން ހައްޔަރުކުރީ ކަމަށް ފުލުހުން ބުންޏެވެ.

ވެލާނާ އިންޓަނޭޝަނަލް އެއާޕޯޓް (ވީއައިއޭ)ގައި އިންޑިއާގެ ބަޔަކު ޖާސޫސް ކުރި މައްސަލައާ ގުޅިގެން ދެފުށް ފެންނަ ތަހުގީގެއް ކުރުމަށް ގޮވާލައި ސައީދު ވަނީ ރައްޔިތުންގެ މަޖިލީހަށް ކުއްލި މައްސަލައެއްވެސް ހުށަހަޅާފައެވެ. އެހެން ނަމަވެސް އެމްޑީޕީގެ މެޖޯރިޓީ އޮންނަ މަޖިލީހުން ވަނީ އެ މައްސަލަ ބޭރުކޮށްލާފައެވެ.