ސިޔާސީ ދެ ޕާޓީއެއް މިއަދު އުވާލިއިރު ކުރީގެ ރައީސް ޢަބްދުﷲ ޔާމީން އިސްކޮށް ހުންނަވައިގެން އުފެއްދެވި ޕީޕަލްސް ނެޝަނަލް ފްރަންޓްގައި ގާނޫނީ އަދަދު ހަމަވަނީ ކިރިޔާ ކަމަށް އިލެކްޝަންސް ކޮމިޝަނުން ބަލަހައްޓާ ޕާޓީތަކުގެ މެންބަރުންގެ ދަފްތަރުން ހާމަވެއްޖެ އެވެ.

ސިޔާސީ ޕާޓީއެއް ދެމިއޮތުމަށް ގާނޫނު ލާޒިމުކުރާ 3000 މެންބަރުން ހަމަކުރުމަށް ދިން މުއްދަތުގައި 3000 މެންބަރުން ހަމަވެފައިނުވާތީ، މިއަދުން ފެށިގެން މޯލްޑިވްސް ލޭބާ އެންޑް ސޯޝަލް ޑިމޮކްރަޓިކް ޕާޓީ އާއި ދަ ޑިމޮކްރެޓްސް އުވާލައި އެ ޕާޓީތައް ސިޔާސީ ޕާޓީގެ ދަފްތަރުން އުނިކުރުމަށް ކޮމިޝަނުން ވަނީ ނިންމާފަ އެވެ.

ދަ ޑިމޮކްރެޓްސްގައި ހިމެނެނީ 2,952 މެންބަރުންނެވެ. މޯލްޑިވްސް ލޭބާ އެންޑް ސޯޝަލް ޑިމޮކްރަޓިކް ޕާޓީގައި ތިބީ 1,710 މެންބަރުންނެވެ.

މި ދެ ޕާޓީ އުވާލުމުން ދެން ދަފްތަރުގައި ހިމެނޭނީ ހަތް ސިޔާސީ ޕާޓީ އެވެ. އޭގެ ތެރެއިން ޕީއެންއެފްގައި މެންބަރުން ތިބީ ކިރިޔާ ގާނޫނީ އަދަދު ހަމަވާ މިންވަރަށެވެ. އެ ޕާޓީގައި ތިބީ 3,012 މެންބަރުންނެވެ. ނެޝަނަލް ޕާޓީގައި 5,133 މެންބަރުން ތިބިއިރު އަދާލަތު ޕާޓީގައި ތިބީ 8,267 މެންބަރުންނެވެ. އެމްޑީއޭގައި 9,686 މެންބަރުންނެވެ.

ދައުލަތުގެ ބަޖެޓުން ފައިސާ ލިބޭ އަދަދަށް މެންބަރުން ހަމަވަނީ ތިން ޕާޓީގަ އެވެ. އެންމެ މެންބަރުން ގިނައީ ޕީއެންސީގަ އެވެ. ދެން އެމްޑީޕީގަ އެވެ.

* ޕީއެންސީ - 74,048 މެންބަރުން

* އެމްޑީޕީ - 43,784 މެންބަރުން

* ޖުމްހޫރީ ޕާޓީ - 12,343 މެންބަރުން