ހަދީޘެއް ކިޔައިލީމަ އެމީހާ ޓެރަރިޒަމްގެ އަމަލެއް ކުރިކަމަށް ބަލާފަ ޖަލު ކުޑަގޮޅިއަށް ލާހިސާބަށް މި ގައުމުގެ ކަންތައް ދިޔައީމަ މީ އިސްލާމީ ގައުމެކޭ ބުނަން ލަދުގަންނަ ހިސާބަށް މިއަދު ގޮސްފި ކަމަށް ނޮޅިވަރަމް ދާއިރާގެ މެންބަރު މުހައްމަދު ނަޝީދު (މޮސްޓާ) ގޮވާލައްވައިފި އެވެ.

މޮސްޓާ މިފަދައިން ވިދާޅުވެފައިވަނީ އިސްލާމީ ފަތުވާ މަޖިލިސް އެކުލަވާލުމަށް ގޮވާލާ ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފު އުމަރު ހުށައެޅުއްވި މައްސަލައަށް ވާހަކަދައްކަވަމުންނެވެ. 

އެ މައްސަލައަށް ބަހުސް ކުރައްވަމުން މޮސްޓާ ވަނީ ޔޯގާ ހަމަނުޖެހުމާއި ގުޅިގެން ޝެއިޚް އާދަމް ނިޝާން ހައްޔަރު ކޮށް ޖަލަށް ސަބަބާއި ގުޅިގެން ކަންބޮޑުވުން ފާޅުކޮށްފައެވެ. އެގޮތުން، ޝެއިޚް އެ މައްސަލާގައި ހައްޔަރު ކުރި ސަބަބެއް ކަމުގައި، ޝެއިޚް އެދުވަހު ގަލޮޅު ދަނޑު ކައިރީ ހުރެގެން ކިޔާފައިވާ ހަދީޘް ދައްކާފައިވާއިރު، އެކަމާއި މެދު ކަންބޮޑުވުން ފާޅުކޮށް މޮސްޓާ ވިދާޅުވީ އެފަދަ ސަބަބުތަކާއި ހުރެ މިއީ 100 އިންސައްތަ މުސްލިމް ގައުމެކޭ ބުނަންވެސް ލަދުވެސް ގަންނަ ހިސާބަށް ގޮސްފި ކަމަށެވެ.

Advertisement

މިއާއެކު މޮސްޓާ ވަނީ ޔޯގާ ހުއްޓުވި މީހުން ނުރައްކާތެރި މީހުންނަށް ހަދައި ޖަލަށް ލާފައިވާ އިރު، ދާދި ފަހުން އިސްލާމީ މަރުކަޒަށް ބޮޑު ކަމުދިޔަ މީހާއާއި މެދު ފިޔަވަޅު ނާޅާ ދޫކޮށްލާފައިވާތީ ސަރުކާރާށް ފާޑުވިދާޅުވެފައެވެ. އެއާއެކު، ދިވެހިރާއްޖެ ސެކިއުލަރ ގައުމަކަށް ހަދާން އަދުގެ ސަރުކާރުން ކުރަމުންދާ މަސައްކަތްތައް ހުއްޓާލުމަށް ވެސް މޮސްޓާ ވަނީ ގޮވާލާފައެވެ. 

"އެހެންވީމަ މި ހުރިހާ ކަމެއް މިގޮތަށް ބަދަލުކުރަމުން ގޮސް ސެކިއުލާ ގައުމަކަށް ރާއްޖެ ހަދަން މިކުރާ މަސައްކަތް މިއަދުން މިއަދަށް އެބަޖެހޭ ހުއްޓުވާލަން، އެ މަސައްކަތް ނުހުއްޓުވައިފި ކަމަށް ވެއްޖިއްޔާ ކުރިއަށް އޮތް 10 އަހަރު ނޫނީ 20 އަހަރު ތެރޭގައި މިގައުމު ހަމަ ތުރުކީއަށްވީ މަގުން އަންދަލުސްއަށް ދިޔަ މަގުން ގޮސް މިތަން ހަލާކުވެގެން ދާނެ."

މޮސްޓާ އިތުރަށް ވިދާޅުވީ، ރާއްޖެ ސެކިއުލަރ ގައުމަކަށް ހެދުމުގެ މަސައްކަތަކީ އަދުގެ ސަރުކާރުން ރާވައިގެން ކުރާ ކަމެއް ކަމަށެވެ. އެގޮތުން ކުދިން ތުއްތު އިރުން ސުރެ ތައުލީމީ ނިޒާމަށްވެސް ސެކިއުލަރ ނުފޫޒު ފޯރުވަމުންދާ ކަމަށާ، އަދި ޑިމޮކްރަސީގެ ނަމުގައި ތައުލީމީ ނިޒާމު ފުނޑާލައި އެތަނަށް "ލާދީނީ" އެތައް ބަޔަކު ވައްދައިގެން، އެމީހުން ކުރާ ކަންކަމަކީ ވަރަށް ކުޑަ ކަންކަން ކަމުގައި ދެއްކުމަށް މަސައްކަތް ކުރާ ކަމަށްވެސް މޮސްޓާ ވިދާޅުވި އެވެ.