މިދިޔަ ހަފްތާގެ ބުރާސްފަތި ދުވަހުގެ ރޭ ފުލުހުން ޑްރިފްޓް ކުރުމަށް ހުރަސް އަޅާކަމަށް ބުނެ މޯލްޑިވްސް ޑްރިފްޓް އެސޯސިއޭޝަނުން ބޭއްވި އެއްވުމާއި ގުޅިގެން ޒުވާނުން ހައްޔަރު ކުރަމުންދާތީ ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަހުމަދު ޝިޔާމް ރައީސުލްޖުމްހުރިއްޔާ އިބްރާހީމް މުހައްމަދު ޞާލިހަށް ފާޑުވިދާޅުވެއްޖެއެވެ. 

މޮޓޯ ސްޕޯޓްސްގައި ހަރަކާތްތެރިވާ ޒުވާނުން ވަކިޑިސިޕްލީނެއްގެ ދަށުން އެކަން ކުރަމުން ދަނިކޮށް އެއްވެސް ގޮތެއް ނުދައްކާ ބިޑިއަޅުވާ ހައްޔަރަށްލުން ކުށްވެރި ކުރައްވާ ކަމަށް ބުނެ ޝިޔާމް މިއަދު ކުރެއްވި ޓުވީޓެއްގައި ވަނީ، ރައީސް ޞާލިހު ވިދާޅުވާ ހުރިހާ ކުޅިވަރަކަށް އޮތް ހަމަހަމަ ފުރުޞަތަކީ މިއީތޯ ސުވާލު ކުރައްވާފައެވެ. އަދި ޑްރިފްޓިންގެ މައްސަލާގައި ހައްޔަރުކޮށްފައިވާ އެންމެން ވަގުތުން ދޫކޮށްލުމަށް ވެސް ޝިޔާމް ވަނީ ގޮވާލައްވާފައެވެ.

ޑްރިފްޓް އެސޯސިއޭޝަނުން ބޭއްވި އެއްވުމުގައި ބައިވެރިވި މީހުން ހައްޔަރު ކުރާތީ ޑްރިފްޓިންގ އެސޯސިއޭޝަނުން ވެސް ވަނީ ކަންބޮޑުވުން ފާޅުކޮށްފައެވެ. އެގޮތުން ކަންބޮޑުވުންފާޅުކޮށް އެ އެސޯސިއޭޝަނުން ކޮށްފައިވާ ފޭސްބުކް ޕޯސްޓެއްގައި ބުނީ، ބުރާސްފަތި ދުވަހުގެ ރޭ އެ އެސޯސިއޭޝަންގެ ބަޔަކު ހުޅުމާލޭ ޕޮލިސް ސްޓޭޝަން ކުރިމަތީ އެއްވި އެއްވުމުގެ ތެރެއިން އެއްވެސް ހަމަނުޖެހުމެއް ނުހިނގާ ކަމަށާ، އަދި އެ އެއްވުމާއި ގުޅިގެން ފުލުހުން ހިތްހަމަ ނުޖެހޭ އެއްވެސް ކަމެއް ހިނގާފައިވާނަމައެ އެސޯސިއޭޝަނުން އެކަމުގެ ޒިންމާ ނަގަން ތައްޔާރު ކަމަށެވެ.

"ނަމަވެސް ފުލުހުން ވަކިވަކި މީހުން އެކަމާއި ގުޅުވައިގެން ހައްޔަރު ކޮށް މުއްދަތު ޖަހަން ގެންދިޔުން މި އެސޯސިއޭޝަނަށް ބަލައިގަންނަން ދަތި." ޑްރިފްޓް އެސޯސިއޭޝަނުން ބުނެފައިވެއެވެ. 

މީގެ އިތުރުން އެ އެސޯސިއޭޝަނުން ބުނީ، މިވަގުތު ދިވެހިރާއްޖޭގައި ރޭސިން އަށް ވަކި ގާނޫނެއް ހެދިފައި ނުވާތީ، އެފަރާތްތައް ހައްޔަރަށް ގެންދަން ފުލުހުން ބޭނުންކުރާ އުޒުރަކީ އަމުރަށް ނުކިޔަމަންތެރިވެ، ފުލުހުންގެ ވަޒީފާއަށް ހުރަސް އެޅުން ކަމަށެވެ. އެހެން ނަމަވެސް، އެރޭ އެއްވެސް ފުލުހަކަށް އެފަދަ އެއްވެސް ކަމެއް ދިމާވެފައި ނުވާނެ ކަމަށުގެ ޔަގީންކަން އެ އެސޯސިއޭޝަނުން ދޭ ކަމަށްވެސް ބުނެފައިވެއެވެ.