ދިވެހިރާއްޖޭގެ ފަތުރުވެރިކަމަށް 50 އަހަރު ފުރޭ ރަން ޔޫބިލުގެ މުނާސަބަތާ ގުޅުވައި، ރާއްޖޭގައި ކަލިނަރީ ދާއިރާގެ އަގު ވަޒަންކުރުމަށް ފުރަތަމަ ފަހަރަށް "ސީޖީއެމް ޝެފްސް އެވޯޑްސް" ގެ ނަމުގައި އެވޯޑެއް ތަޢާރަފުކޮށްފިއެވެ.
ޝެފްސް ގިލްޑް އޮފް މޯލްޑިވްސްއިން ތަޢާރަފްކުރި "ސީޖީއެމް ޝެފްސް އެވޯޑްސް" އަކީ ރާއްޖޭގައި ކަލިނަރީ އާޓްސްގެ ދާއިރާގައި މަސައްކަތްކުރާ، އަދި އެ ފަންނު ދިރުވާ އާލާކުރުމުގައި އުޅޭ އެކި ފަރާތްތަކުގެ އަގު ވަޒަންކުރުމުގެ މަޤްސަދުގައި، މި އަހަރުން ފެށިގެން ކޮންމެ ދެ އަހަރަކުން އެއް އަހަރު ދޭނެ އެވޯޑެކެވެ.
ޝެފްސް ގިލްޑް އޮފް މޯލްޑިވްސްއިން ބުނީ ޝެފުންގެ ކަލިނަރީ ހުނަރުވެރިކަމާއި ފަންނުވެރިކަން ބަދިގެތަކުގެ އިތުރުން މުޖުތަމަޢުގައި ވެސް ބޭނުންކޮށް، ކަލިނަރީ ދާއިރާއިން މުޖުތަމަޢުތަކަށް އެކި ގޮތްގޮތުން ޚިދުމަތްކުރުމަކީ އެ އޯގަނައިޒޭޝަނުން އަބަދުވެސް ބާރުއަޅާ ކަމެއް ކަމަށެވެ.
"ސީޖީއެމް ޝެފްސް އެވޯޑްސް"ގެ މަޤްސަދަކީ މިފަދަ ޝެފުން ފާހަގަކޮށް، އެ ޝެފުން ރާއްޖޭގެ ފަތުރުވެރިކަމުގެ ދާއިރާއަށާއި މުޖުތަމަޢަށް ކޮށްދޭ ޚިދުމަތްތަކުގެ އަގު ވަޒަންކޮށް، ހިތްވަރުދިނުން ކަމަށާ އަދި ރާއްޖޭގައި ކަލިނަރީ ފަންނު ކުރިއެރުވުމުގެ މަސައްކަތްކޮށް، ބައިނަލްއަޤުވާމީ މުބާރާތްތަކާއި ފޯރަމްތަކުގައި ރާއްޖެ ތަމްސީލުކުރާނެ ޤައުމީ ކަލިނަރީ ޓީމެއް އެކުލަވާލުމުގެ މަސައްކަތް ކުރުން ކަމަށްވެސް ޝެފްސް ގިލްޑް އޮފް މޯލްޑިވްސްއިން ބުނެއެވެ.
މި އަހަރުގެ އެވޯޑްސްގައި ހިމެނޭ ކެޓަގަރީތަކަކީ:
• އެގްޒެކެޓިވް ޝެފް
• ސޫ ޝެފް
• ކޮމްޕެޓިޝަން ޝެފް
• އެޑިއުކޭޝަން ޝެފް
• ޕޭސްޓްރީ އެންޑް ބޭކަރީ ޝެފް
• ޔަންގް ޝެފް
• ލޯންގް ސާވިސް ސްޕެޝަލް އެވޯޑު
"ސީޖީއެމް ޝެފްސް އެވޯޑްސް 2022" އަށް ކުރިމަތިލުމަށް ރާއްޖޭގައި މަސައްކަތްކުރާ ހުރިހާ ޝެފުންނަށް ޝެފްސް ގިލްޑް އޮފް މޯލްޑިވްސްއިން ވަނީ ދަޢުވަތު ދީފައެވެ. އަދި ރާއްޖޭގެ އެކި ރިސޯޓުތަކާއި ރެސްޓޯރަންޓުތަކުން ވެސް، އެ ތަންތަނުގައި މަސައްކަތްކުރާ ޚިދުމަތްތެރި އަދި ހުނަރުވެރި ޝެފުންނާއި ކަލިނަރީ ޕްރޮފެޝަނަލުން މި އެވޯޑަށް ނޮމިނޭޓުކުރުމަށް މި ޖަމިއްޔާއިން ބާރު އަޅައެވެ.
މި އެވޯޑުތަކަށް ކުރިމަތިލާން އެދޭ ފަރާތްތަކުން https://cutt.ly/CGM_ChefsAward ލިންކް މެދުވެރިކޮށް، 10 އޮކްޓޫބަރު 2022 ގެ ކުރިން ނޮމިނޭޝަން ހުށަހެޅުއްވުމަށް އެ ޖަމިއްޔާ އިން ބުނެއެވެ.
ޝެފްސް ގިލްޑް އޮފް މޯލްޑިވްސް (ސީޖީއެމް)އަކީ ދިވެހިރާއްޖޭގައި މަސައްކަތްކުރާ ޝެފުން ތަމްސީލުކުރުމަށް އުފެއްދި އެންމެ ފުރަތަމަ، އަދި ހަމައެކަނި ނޮން-ޕްރޮފިޓް އަދި ނޮން-ގަވަރންމެންޓް ޖަމްޢިއްޔާއެވެ. މި ޖަމްޢިއްޔާގެ މަޤްސަދަކީ ދިވެހިރާއްޖޭގައި ކަލިނަރީ ފަންނު ކުރިއެރުވުމެވެ. ސީޖީއެމް ރަޖިސްޓްރީކުރީ 2 އޮކްޓޫބަރު 2014 ގައެވެ. އަދި މި ޖަމްޢިއްޔާއަކީ ދުނިޔޭގެ ޝެފުންގެ ޖަމްޢިއްޔާ، ވޯލްޑް އެސޯސިއޭޝަން އޮފް ޝެފްސް ސޮސައިޓީސް (ވޯލްޑްޝެފްސް)އިން ދިވެހިރާއްޖޭގެ ގައުމީ ކަލިނަރީ ޖަމްޢިއްޔާގެ ގޮތުގައި އެންޑޯޒްކުރާ ޖަމްޢިއްޔާއެވެ.
Advertisement
This content is created and paid for by advertisers and does not involve Voice Journalists
