މޯލްޑިވިއަން އައިޑޮލްގެ ޕްރެޒެންޓަރ އަދި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލްގެ އަނބިކަނބަލުން އައިމިނަތު މައުރީން ގެ ރެސްޓޯރެންޓަށް ބަޔަކު ގެއްލުންދީފިއެވެ.
ހުޅުމާލޭގައި ހުންނަ "މިނޫޝިއާ" ރެސްޓޯރެންޓަށް ބަޔަކު ގެއްލުންދީފައި މިވަނީ އޮގަސްޓް 30 ވަނަ ދުވަހު ގަލޮޅު ދަނޑުގައި ކުރިއަށްދިޔަ މެޗެއްގައި ހަމަނުޖެހުން ތަކެއް ހިނގާފައިވަނިކޮށެވެ.
އެގޮތުން އަންނަ ސީޒަނުގެ ދިވެހި ޕްރިމިއާ ލީގަށް ކޮލިފައި ވުމަށް ކުޅެވުނު ލީގު ބުރުގައި ބުރު ސްޕޯޓްސް ކްލަބް އަދި ކްލަބް ޓީނޭޖް ކުޅުނު މެޗުގައި ރެފްރީގެ ނިންމުންތަކާއި ހިތްހަމަ ނުޖެހިގެން ޓީނޭޖުގެ ކުޅުންތެރިންނާއި އޮފިޝަލުން ވަނީ ހަމަނުޖެހުން އުފައްދާފައެވެ.
ޓީނޭޖުގެ އޮފިޝަލަކު ވަނީ ރެފްރީ ފަހަތުން ދުވެ ހަމަލާދޭންވެސް މަސައްކަތް ކޮށްފައިވެއެވެ. ހަމަނުޖެހުމާއި ގުޅިގެން މުބާރާތުގެ ކޮމިޓީއިން މެޗު ކުރިއަށް ނުގެންގޮސް ބުރު މެޗުން މޮޅުވީ ކަމަށް ނިންމާ އެ ޓީމަށް އަންނަ ސީޒަނުގެ ޕްރިމިއާ ލީގުގެ ޖާގަ ވަނީ ކަށަވަރު ކޮށްދީފައެވެ.
މައުރީންގެ ރެސްޓޯރެންޓަށް ހަމަލާދިން މައްސަލައިގެ އިތުރު ތަފްސީލެއް މިހާތަނަށް ލިބިފައިނުވެއެވެ.
Advertisement
This content is created and paid for by advertisers and does not involve Voice Journalists
