ކުޑަކުއްޖަކަށް ޖިންސީ ގޯނާ ކުރުމުގެ ތުހުމަތުގައި ހައްޔަރުކުރި އައްޑޫ ސިޓީ ޝަރަފުއްދީން ސްކޫލުން އައިމިންދިޔެ (އައިމިންދައްތަ) ވަޒީފާއިން ސަސްޕެންޑު ކުރީ ގޯސްކޮށް ކަމަށް ނިންމައި ވަޒީފާ އޭނާއަށް އަނބުރާ ދިނުމަށް ސިވިލް ސާވިސް ކޮމިޝަނުން އެންގުމުން އެ ސްކޫލުން އެކަމަށް އިންކާރު ކޮށްފައިވާކަން ހާމަވެއްޖެއެވެ.

މީގެ އިތުރުން ސިވިލް ސާވިސް ކޮމިޝަނުން އެޑިއުކޭޝަން މިނިސްޓަރު ޑރ. އައިޝަތު އަލީއަށް ފޮނުވި ސިޓީގައި އައިމިންދައްތަ ސަސްޕެންޝަނުގައި ހުރި މުއްދަތުގައި ދޭންޖެހޭ މުސާރަ އާއި އިނާޔަތް ދިނުމަށްވެސް އަންގާފައިވެއެވެ. އަދި މި މައްސަލައިގައި އެ މިނިސްޓްރީއިން އަމަލު ކުރި ގޮތެއް މިދިޔަ މަހުގެ 21 ވަނަ ދުވަހު ރަސްމީ ގަޑި ނިމުމުގެ ކުރިން އެ ކޮމިޝަނަށް އެންގުމަށްވެސް އެ ސިޓީގައި ބުނެފައިވެއެވެ.

ނަމަވެސް މި އެންގުމާއި ގުޅިގެން އައިމިންދައްތަގެ އާއިލާއިން މީޑިއާތަކަށް މައުލޫމާތު ދެމުން ބުނެފައިވަނީ ސިވިލް ސާވިސް ކޮމިޝަންގެ އެންގުމަށް އެޑިޔުކޭޝަން މިނިސްޓްރީއާއި ޝަރަފުއްދީން ސްކޫލުން ވެސް އަމަލުކުރުމަށް ދެކޮޅު ހަދާ ތަފާތު ބަހަނާތަކެއް ދައްކާފައިވާ ކަމަށެވެ.

Advertisement

މި މައްސަލައިގައި އައިމިންދައްތަގެ ވަޒީފާ އަނބުރާ ހޯދުމުގެ މައްސަލަ ވަޒީފާއާ ބެހޭ ޓްރައިބިއުނަލަށްވެސް ލާފައިވާކަން ފާހަގަ ކޮށްލެވެއެވެ.