އިނގިރޭސިވިލާތުގެ ރާނީ، ރާނީ އެލިޒަބަތު ދެ ވަނަ އަވަހާރަ ވެއްޖެއެވެ.

ރާނީ އެލިޒަބަތު އަވަހާރަ ވެފައިވަނީ މިއަދު އެކަމަނާގެ ޑޮކްޓަރުން ހެދި އިވެލުއޭޝަނަކަށް ފަހު އެކަމަނާގެ ސިއްހީ ހާލުކޮޅާ މެދު ކަންބޮޑުވާ ކަމަށް ބުނުމުން އެޑްމިޓްކޮށް ފަރުވާދެމުން ދަނިކޮށެވެ. ބީބީސީއިން އާންމުކުރި ގޮތުގައި އެކަމަނާ އަވަހާރަ ވެފައިވަނީ އިނގިރޭސި ވިލާތުގެ ގަޑިން މިއަދު މެންދުރު ފަހުގެ ވަގުތެއްގައި އެވެ.

އިނގިރޭސިވިލާތުގެ ބަލްމޯރަލް ކާސަލްގައި އެކަމަނާ އަވަހާރަވި އިރު އިނގިރޭސި ޝާހީ އާއިލާގެ ގިނަ މެންބަރުން އެކަމަނާގެ އަރިހުގައި ތިއްބެވިއެވެ. އެގޮތުން ދިމާވި ދެބަސްވުންތަކަކާއި ގުޅިގެން ޝާހީ އާއިލާ އާއި ވަކިވެފައިވާ ޕްރިންސް ހެރީ އަދި އަނބިކަނބަލުން މެގަން ވެސް ވަނީ އެކަމަނާގެ އަރިހަށް ދުރުވެފައެވެ.

ރާނީ އެލިޒަބަތު ދެވަނަ ތަހުތާއި ހަވާލުވެ ވަޑައިގަތީ 1952 އަހަރުގައި އުމުރުން 25 އަހަރުގައި އެކަމަނާގެ ބައްޕާފުޅު ރަސްގެފާނު ޖޯޖް ހަވަނަ އަވަހާރަވުމާއި ގުޅިގެންނެވެ. 70 އަހަރު ތަހުތުގައި އެކަމަނާ ހޭދަ ކުރައްވާފައިވެއެވެ. އެކަމަނާ ވަނީ 1972 ވަނަ އަހަރު ދިވެހި ރާއްޖެއަށް ވެސް ޒިޔާރަތް ކުރައްވާފައެވެ.

އެކަމަނާ 2021 ވަނަ އަހަރުވެސް ވަނީ އާލަސްކަންފުޅާއި އުޅުއްވާފައެވެ. އެގޮތުން ކޮވިޑް 19 އަށް ޕޮޒިޓިވް ވެ އެކަމަނާގެ ހާލުކޮޅު ސީރިއަސްވެ ފަރުވާ ދީފައިވެއެވެ. 2021 ވަނަ އަހަރުގައި އެކަމަނާގެ ފިރިކަލުން ޕްރިންސް ފިލިޕް ވަނީ އަވަހާރަވެފައެވެ. އެއަށްފަހު އާންމު ހަފްލާތަކުން އެކަމަނާ ފެނުން ވަނީ މަދުވެފައެވެ.