ދިވެހިރާއްޖޭގެ ޝަރުއީ ނިޒާމުގެ މިނިވަންކަމާއި ގުޅޭގޮތުން، މަރާލާފައި އަދި ގެއްލުވާލާފައިވާ މީހުންގެ މައްސަލަތަކާއި ގުޅޭ ރިޔާސީ ކޮމިޝަންގެ ރައީސް އަލްއުސްތާޛު ހުސްނުއްސުއޫދު ދެއްކެވި ވާހަކަތަކާއި ގުޅިގެން އެބޭފުޅާއާއި ދެކޮޅަށް ފިޔަވަޅު އެޅިދާނެކަމަށް ޑިޕާރޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ބުނެފިއެވެ.
ޑީޖޭއޭއިން މިހެން ބުނީ އެ އިދާރާއިން މިއަދު ބޭއްވި ނޫސްވެރިންގެ ބައްދަލުވުމެއްގައެވެ.
މި ބައްދަލުވުމުގައި ވާހަކަފުޅު ދައްކަވަމުން ޖުޑިޝަލް އެކަޑަމީގެ ޗާންސެލަރު އަހުމަދު މާޖިދު ވިދާޅުވީ ސުއޫދު ދެއްކެވި ވާހަކަތަކުގެ ތަފްސީލް ހިއްސާކުރުމަށް އެދުމުންވެސް އެކަމަށް އިންކާރުކޮށްފައިވާކަމަށެވެ.
އެހެންކަމުން ސުއޫދު ދެއްކެވި ވާހަކަތަކަކީ ސާބިތު ނުހިފޭ ގޮތަށް އަދި ފަނޑިޔާރުންގެ އަގު ވައްޓާލެވޭ ފަދަ ވާހަތަކެއް ކަމަށް ބެލެވިދާނެކަމަށް މާޖިދު ވަނީ ވިދާޅުވެފައެވެ. މިއީ ކޯޓުގެ ހުރުމަތް ކަނޑާލުމަށް ދެއްކި ވާހަކަތަކެއް ކަމަށް ބެލެވިދާނެ ކަމަށާއި ސުއޫދުގެ އެ ވާހަކަތަކާ ގުޅޭގޮތުން އޭނާއާ މެދު ފިޔަވަޅު އަޅަން ހުރަހެއް ނެތްކަމަށް އޭނާ ވަނީ ވިދާޅުވެފައެވެ. އެކަމާއި ގުޅިގެން އޭނާއާއި ދެކޮޅަށް ފިޔަވަޅެއް އަޅާނެތޯ ސީދާކޮށް މާޖިދު ވިދާޅުވެފައެއް ނުވެއެވެ.
ޑީޖީއޭ އިން ވަނީ ސުއޫދުގެ ތުހުމަތުތަކުގެ ހަގީގަތް ހޯދުމަށް ޚާއްސަ ކޮމެޓީއެއް އެކުލަވާލާފައެވެ.
Advertisement
This content is created and paid for by advertisers and does not involve Voice Journalists
