މޯލްޑިވްސް މާރކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) މެދުވެރިކޮށް ވ. އާރަށް ކުއްޔަށް ދޫކުރުމުގެ މުއާމަލާތާއި ގުޅުވާ ކުރީގެ ރައީސް ޔާމީން އަބްދުލްގައްޔޫމުގެ މައްޗަށް އުފުލާފައިވާ ދައުވާތަކާއި ގުޅިގެން ހެއްކެއްގެ ގޮތުގައި ދައުލަތުން ހުށައެޅި އިކޮނޮމިކް އެންޑް ޔޫތު ކައުންސިލް(އީ.ވައި.ސީ) ގެ ޔައުމިއްޔާއަކީ ސައްހަ ޔައުމިއްޔާއެއް ނޫންކަމަށް ވިދާޅުވެ، ކުރީގެ އިކޮނިމް މިނިސްޓަރު އަދި އީ.ވައި.ސީގައިވެސް ހިމަނިވަޑައިގަންނަވާ މުހައްމަދު ސައީދު ހެކިބަސް ދެއްވައިފިއެވެ.
ވ. އާރަށުގެ މައްސަލައާއި ގުޅިގެން ރައީސް ޔާމީން ގެ މައްޗަށް އުފުލާފައިވާ ދައުވާތަކާއި ގުޅޭ ޝަރީއަތުގެ އަޑުއެހުމެއް މިއަދު ކުރިމިނަލް ކޯޓުގައި ކުރިއަށް ގެންގޮސްފައިވާއިރު، މިއަދު އޮތީ ރައީސް ޔާމީންގެ ފަރާތްޕުޅުން ހުށައަޅާ ހެކިންގެ ހެކިބަސް ނެގުމެވެ.
އެގޮތުން ކުރީގެ އިކޮނޮމިކް މިނިސްޓަރު ކްރިމިނަލް ކޯޓަށް ހާޒިރުކޮށް ކުރި ސުވާލުތަކަށް ޖަވާބުދެއްވަމުން ސައީދު ވިދާޅުވީ، 2013ން 2018ށް އޭނާ އިކޮނޮމިކް އެންޑް ޔޫތު ކައުންސިލް (އީވައިސީ) ގައިވެސް މަސައްކަތް ކުރައްވާފައިވާ ކަމަށެވެ. އެ ކައުންސިލުގައި އޭނާގެ އިތުރުން، ފިޝަރީޒް މިނިސްޓަރާއި، ޓޫރިޒަމް، ޔޫތު އަދި ފިނޭންސް މިނިސްޓަރ ހިމެނޭ ކަމަށާއި، އެ ކައުންސިލުގެ ޗެއަރ އަކީ ރައީސް ނުވަތަ ރައީސް ކަނޑައަޅުއްވާ ފަރާތެއްކަމަށެވެ.
އެ ކައުންސިލަށް ހުށައެޅޭ ކަންކަމަކީ ވަރަށް ޚާއްސަ ސަމާލުކަމެއް ދީގެން ބަލަހައްޓާ ކަންމެއްކަމަށާއި، އެ ކައުންސިލްގެ ޔައުމިއްޔާތަކަކީ ގަވައިދުން ބަލަހައްޓަމުންދާ ލިޔެކިޔުންތަކެއްކަމަށެވެ.
އެގޮތުން އީ.ވައި.ސީގައި މައްސަލައެއް އެޖެންޑާ ކުރުމަށް ވަކި ފޯމެޓެއް އޮންނަކަމާއި، އެ ކައުންސިލުން ނިންމާކަންކަން ފާސްކުރުމަށްފަހު ޔައުމިއްޔާ ކުރެވި، އެ ޔައުމިއްޔާތަކުގައި ކައުންސިލްގެ މެމްބަރުން ސޮއިކުރައްވާނެކަމަށް ސައީދު ވިދާޅުވިއެވެ.
އެ މައްސަލައާއި ގުޅިގެން އީ.ވައި.ސީގެ ޔައުމިއްޔާއެއްކަމަށް ދައުލަތުން ހުށައަޅާފައިވާ ޔައުމިއްޔާ ބެއްލެވުމަށްފަހު ސައީދު ވަނީ އެއީ ސައްހަ ޔައުމިއްޔާއެއް ނޫންކަމަށް ވިދާޅުވެފައެވެ.
އެ މައްސަލައާއި ގުޅިގެން ދައުލަތުން ކުރި ސުވާލުތަކަށް ޖަވާބުދެއްވަމުން ސައީދު ތަކުރާރުކޮށް ވިދާޅުވީ، އިކޮނޮމިކް ކައުންސިލްގެ ބައްދަލުވުންތަކުގެ ޔައުމިއްޔާ ބެލެހެއްޓެވުމަކީ ގަވައިދުން ކުރައްވަމުން ގެންދާ ކަމެއްކަމަށެވެ. އެގޮތުން ސެކްރެޓޭރިއެޓް ޔައުމިއްޔާ ތައްޔާރުކުރެއްވުމަށްފަހު، ކޮމެޓީގައި ބައިވެރިވެވަޑައިގެންނެވި ހުރިހާ މެމްބަރުން ލައްވާ ސޮއި ކުރުވާނެކަމަށެވެ.
އަދި ޔައުމިއްޔާގެ ކޮންމެ ގަނޑެއްގައި މެމްބަރުންގެ އިނީޝަލް ޖައްސަވާނެކަމަށާއި، އަދި ޔައުމިއްޔާގެ ފަހު ސަފްހާގައި އެ މެމްބަރެއް ސޮއި ކުރުމަށް އޮންނަ ތަނުގައި ސޮއިކުރައްވާނެކަމަށް އޭނާ ވިދާޅުވިއެވެ. އަދި ޔައުމިއްޔާ ފާސްކުރާނީ އެ އުސޫލުގެ ދަށުންކަމަށާއި، ސޮއި ނުކުރައްވާ ޔައުމިއްޔާއެއް ނޯންނާނެކަމަށް ސައީދު ވަނީ ވަރަށް ޔަގީންކަމާއެކު ވިދާޅުވެފައެވެ.
ވ. އާރަށުގެ މައްސަލަ އީ.ވައި.ސީއަށް ހުށައެޅުނުތޯއާއި އެ މައްސަލައާއި ގުޅިގެން އެ ކައުންސިލްގައި މަޝްވަރާ ކުރެވިފައިވޭތޯ މިއަދުގެ އަޑުއެހުމުގައި ވަނީ ސުވާލުކުރައްވާފައެވެ.
އެ ސުވާލަށް ޖަވާބުދެއްވަމުން ސައީދު ވިދާޅުވީ ރަށްތައް ކުއްޔަށް ދޫކުރުމުގެ މުއާމަލާތަކީ އާންމު އުސޫލަކުން އީ.ވައި.ސީއަށް ހުށައެޅޭ ޒާތުގެ މައްސަލައެއް ނޫންކަމަށެވެ. އެހެންކަމުން ސީދާ އެ މައްސަލަ ސީދާ އެ ކައުންސިލަށް ހުށައެޅުނު ތޯ ނޫންތޯ ކަނޑައެޅިގެން ދަންނަވަން އެނގިވަޑައި ނުގަންނަވާކަމަށް ސައީދު ވިދާޅުވިއެވެ.
އަދި އެފަދަ މައްސަލައެއް އީ.ވައި.ސީއަށް ހުށައެޅިފައިވާނަމަ ޔަގީނުންވެސް އެޖެންޑާ ކުރެވިފައިވާނެކަމަށާއި، އަދި އެ މައްސަލައަކީ އީ.ވައި.ސީގައި މަޝްވަރާކުރެވުނު މައްސަލައެއްކަމަށްވާނަމަ ޔަގީނުންވެސް ޔައުމިއްޔާގައި ކިޔެވި، އެ ބައްދަލުވުމުގައި ބައިވެރިވި ހުރިހާ މެމްބަރުންގެ ސޮއި ކުރެވިފައި އޮންނާނެކަމަށް ސައީދު ވަނީ ވިދާޅުވެފައެވެ. އަދި ސޮއި ނުކުރެވޭ އެއްވެސް ޔައުމިއްޔާއެއް ނޯންނާނެކަމަށް ސައީދު ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
