ނޫސްވެރިންނަށް މަޢުލޫމާތު ދޭ މަސްދަރު ވަކި ޙާލަތްތަކެއްގައި ހާމަކުރުމަށް ހެއްކާބެހޭ ޤާނޫނުގައި ލާޒިމްކުރާ މާއްދާ އުވާ ނުލައި އެ ގާނޫނު އިސްލާހު ކުރުމަށް ރައްޔިތުންގެ މަޖިލީހަށް ހުށަހެޅުމަށް ގަސްތުކޮށްފައިވާ ކަމަށް އެޓާރނީ ޖެނެރަލްގެ އޮފީސް (އޭޖީ) ބުނެފިއެވެ.  

އޭޖީ އޮފީހުން މިއަދު ބުނީ، ނޫސްވެރިންނަށް މަޢުލޫމާތު ދޭ މަސްދަރު ވަކި ޙާލަތްތަކެއްގައި ހާމަކުރުމަށް ހެއްކާބެހޭ ޤާނޫނުގައި ލާޒިމްކުރާ މާއްދާގެ ސަބަބުން ނޫސްވެރިންގެ މެދުގައި ކަންބޮޑުވުންތަކެއް އުފެދިފައިވާތީ، އެކަންކަމަށް ޙައްލެއް ހޯދުމަށްޓަކައި، އެ ޤާނޫނަށް އިޞްލާޙު ގެނައުމަށް ސަރުކާރުން ނިންމާފައިވާކަމަށެވެ. 

އެގޮތުން ހުށަހަޅާ އިޞްލާޙުތަކުގެ ތެރޭގައި، ހެއްކާބެހޭ ޤާނޫނުގެ 136 ވަނަ މާއްދާގައި ނޫސްވެރިންނަށް މަޢުލޫމާތު ދޭ މަސްދަރު ހާމަކުރުމަށް ލާޒިމްކުރާ ޙާލަތްތައް ކަމުގައި ބަޔާންކޮށްފައިވާ ޓެރަރިޒަމްގެ ކުށްތަކާއި ޤައުމީ ސަލާމަތާ ގުޅުންހުރި ކުށްތައް އިތުރަށް ސާފުވާނެ ފަދައިން، ޤައުމީ ސަލާމަތާ ގުޅުންހުރި ކުށްތަކަކީ ދިވެހިރާއްޖޭގެ ސިޔާދަތަށް ނުވަތަ އިޞްތިޤްލާލަށް ނުވަތަ މީހެއްގެ ނުވަތަ ބައެއްގެ ޖިސްމާއި ފުރާނައަށް ނުވަތަ މުދަލަށް ބޮޑެތި ގެއްލުންތަކެއް ކުރިމަތިވުމަށް މަގުފަހިކުރާ ޢަމަލުތައް އެކުލެވޭ ކުށްތައް ކަމާއި، ޓެރަރިޒަމްގެ ކުށްތަކަކީ ޤާނޫނު ނަންބަރު 2015/32 (ޓެރަރިޒަމް މަނާކުރުމުގެ ޤާނޫނު) ގެ ދެވަނަ ބާބުގައި ބަޔާންކުރާ ޓެރަރިޒަމްގެ ކުށްތައް ކަމަށް ޤާނޫނުގައި ކަނޑައެޅުމަށާއި، ނޫސްވެރިންނަށް މަޢުލޫމާތު ދޭ މަސްދަރު ހާމަކުރުމަށް ލާޒިމްކުރުމުގައި ކޯޓުން ރިޢާޔަތްކުރަންޖެހޭ ކަންކަން ޤާނޫނުގައި ކަނޑައެޅުމަށާއި، އެފަދަ ނިންމުމެއް ނިންމާނީ ހައިކޯޓުން ކުރާ އަމުރެއްގެ ދަށުން ކަމަށް ކަނޑައެޅުމަށް ހުށަހަޅާ އިޞްލާޙުތައް ހިމެނޭ ކަމަށްވެސް އެ އޮފީހުން ބުނެފައިވެއެވެ.

Advertisement

މި އިޞްލާޙުތައް ގެނައުމަށް އެކުލަވާލާ ބިލު މޯލްޑިވްސް ޖާނަލިސްޓް އެސޯސިއޭޝަން (އެމް.ޖޭ.އޭ.) އާއި، މޯލްޑިވްސް އެޑިޓާސް ގިލްޑް (އެމް.އީ.ޖީ.) އާއި އެނޫންވެސް ކަމާބެހޭ ފަރާތްތަކާއެކު މަޝްވަރާކުރުމަށްފަހު، ރައްޔިތުންގެ މަޖިލީހަށް ހުށަހެޅުމަށްޓަކައި މިހާރު އެކުލަވާލާފައިވާކަމަށާ، އެ ބިލު މި ހަފްތާގެ ތެރޭގައި ރައްޔިތުންގެ މަޖިލީހަށް ހުށަހެޅުމަށް ގަސްތުކޮށްފައިވާ ކަމަށްވެސް އޭނޯ އޮފީހުން ބުނެފައިވެއެވެ.