ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރުން މަސްވެރިކަމާއި ގުޅިގެން ވެފައިވާ ވައުދުތަކުގެ 99 އިންސައްތަ ފުއްދަވާފައިވާކަމަށް ސަރުކާރުގެ ކޯލިޝަންގައި ހިމެނޭ ޖުމްހޫރީ ޕާޓީގެ ލީޑަރ އަދި މާމިގިލީ ދާއިރާގެ މެންބަރު ޤާސިމް އިބްރާހީމް ވިދާޅުވެއްޖެއެވެ.
ޤާސިމް މިފަދައިން ވިދާޅުވީ މިހާރު ކުރިއަށްދާ ރައްޔިތުންގެ މަޖިލީހުގެ ޖަލްސާގައި މިނިސްޓާރ އޮފް ފިޝަރީޒް އެންޑް އެގްރިކަލްޗާ ޑރ.ޙުސައިން ރަޝީދު ޙަސަނަށް ރައްޔިތުންގެ މަޖިލީހުގެ ތިމަރަފުށީ ދާއިރާގެ މެންބަރު ރިޔާޒު ކުރެއްވި ސުވާލަކާއި ގުޅިގެން މަޖިލިސް ހޫނުވުމާއި ގުޅިގެންނެވެ.
އެގޮތުން މިއަދުގެ ޖަލްސާގައި މަސްވެރިކަމުގެ ވައުދުތަކުގެ ތެރެއިން ފުއްދިފައިވަނީ ކިހާ އިންސައްތައެއްތޯ ޑރ.ޙުސައިިން އާއި ރިޔާޒުވަނީ ސުވާލުކުރައްވާފައެވެ.
އެ ސުވާލުގެ ޖަވާބުގައި ޑރ.ޙުސައިން ވިދާޅުވީ މަސްވެރިކަމުގެ ސިޔާސަތުތައް ތަންފީޒުކުރެވުނު ނިސްބަތުގެ ހިސާބުތައް ހައްދަވައިގެން ހިއްޕަވައިގެން ވަޑައިނުގަންނަވާ ކަމަށާ އެހެން ނަމަވެސް މަޖިލީހުގެ ކޮމިޓީއަކަށް އެކަމާ ގުޅޭ އިވެލުއޭޝަނެއް ހެދުމަށްފަހު ހުށަހެޅުމަށް އަންގާފައިވާތީ އެ މަސައްކަތް ކުރަމުން އަންނަ ކަމަށެވެ. އަދި އެ މަސައްކަތް ނިމުމުން އެކަމުގެ ޖަވާބު ލިބިވަޑައިގަންނަވާނެ ކަމަށެވެ.
"މަސްވެރިކަމުގެ ޕޮލިސީތައް ތަންފީޒު ކުރެވުނު ވަރުގެ ފަސެންޓް އިންސައްތަ އަޅުގަނޑުމެން ކަލްކިއުލޭޓްކޮށްފައި އެ ހިފައިގެނެއް ނޫން އައިސް މިއިދެވުނީީކީ. އެހެންވީމާ އެ ދަންނަވާކަށް ނޭނގެ." މިނިސްޓަރު ވިދާޅުވިއެވެ.
އެފަދައިން ޖަވާބުދެއްވުމުން ނިޒާމީ ނުކުތާއެއް ނަންގަވައި، ރިޔާޒު ވިދާޅުވީ އޭނާ ސުވާލުކުރެއްވީ ސަރުކާރުގެ މަސްވެރިކަމުގެ ޕޮލިސީތައް ތަންފީޒު ކުރެވުނު މިންވަރާ ގުޅޭ ގޮތުން ނޫން ކަމަށެވެ. ނަމަވެސް ސުވާލުކުރެއްވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވެވަޑައިގެންފައިވާ ވައުދުތަކުގެ ކިހާ އިންސައްތައެއް ފުއްދިފައިވޭތޯ ކަމަށެވެ.
އެކަމާއި ގުޅިގެން ޑރ.ހުސައިނަށް ފުރުސަތު ލިބިވަޑައިގަތުމުން ވިދާޅުވެފައިވަނީ އޭނާއަކީ ހަމައެކަނި ސަރުކާރުގެ ފިޝަރީޒް އެންޑް އެގްރިކަލްޗާ މިނިސްޓަރު ކަމަށެވެ. އެހެންކަމުން ރައީސް ޞާލިޙު ވެވަޑައިގެންފައިވާ ވައުދުތައް ފުއްދުނު މިންވަރު އެނގިވަޑައިނުގަންނަވާ ކަމަށްވެސް އޭނާ ވިދާޅުވިއެވެ.
އެއާއެކު މަޖިލީހުގެ ޖަލްސާ ހޫނުވެ މެންބަރުންގެ މެދުގައި ބަހުގެ ހަމަލާތަކެއް އަމާޒުކުރެވިގެންދިޔައެވެ. އަދި ފަހަރަކު މެންބަރެއް ނިޒާމީ ނުކުތާ ނަންގަވައި ވާހަކަ ދައްކަވަމުން ދަނިކޮށް، އަނެއްކާވެސް މެންބަރު ރިޔާޒް ވަނީ އޭނާގެ ސުވާލަކީ މަސްވެރިކަމުގެ ވައުދު ތަކުގެ ފުއްދުނީ ކިތައް އިންސައްތަ ތޯ ކަމަށެވެ.
ރިޔާޒުގެ މި ސުވާލައި އެކު މަޖިލީހުގެ ތެރޭގައި އަނެއްކާވެސް އިތުރަށް އަޑު ގަދަވެގެން ގޮސްފައި ވަނިކޮށް ނިޒާމީ ނުކުތާއެއް ނަންގަވައި ޑރ.ޙުސައިން ނިސްބަތްވެވަޑައިގަންނަވާ ޕާޓީގެ ލީޑަރު ޤާސިމް އިބްރާހީމް ވިދާޅުވެފައިވަނީ ސަރުކާރުގެ ވައުދުތަކުގެ 99 އިންސައްތަ ފުއްދާފައިވާ ކަމަށެވެ.
"އަޅުގަނޑަށް، ޔަގީންކުރަންވީ މި ސަރުކާރުން އޭރު ވެވަޑައިގެންނެވި ހުރިހާ ވައުދު ތަކެއްގެ 99 އިންސައްތަ މިހާރުވަނީ ނިންމަވާފައި."
ޤާސިމް އިބްރާހީމް
ގާސިމްގެ މި ޖަވާބައި އެކު ބައެއް މެންބަރުންގެ ހޫނު ތަރުހީބު އޭނާއަށް ލިބިގެންދިޔަ އިރު އަނެއްބައި މެންބަރުން ވަނީ މިނިސްޓަރާއި ކުރޮ ސުވާލުގެ ޖަވާބު ގާސިމް ދެއްވުމުން ފާޑުވިދާޅުވެފައެވެ.
Advertisement
This content is created and paid for by advertisers and does not involve Voice Journalists
