ހަނިމާދު އެއާޕޯޓް ތަރައްގީ ކުރުމުގެ ޕްރޮޖެކްޓްގެ އަގު ކަމައްވާ 2.1 ބިލިއަން ރުފިޔާ އަކީ ގާތްގަނޑަކައް އެކަހަލަ 3 އެއާޕޯޓް ތަރައްގީ ކުރެވޭނެ ވަރުގެ އަގެއް ކަމަށް ކުރީގެ އެންވަރަމެންޓް މިނިސްޓަރު އަދި އިދިކޮޅު ޕީޕީއެމްގެ ސެނެޓަރ ތޯރިޤް އިބްރާހިމް ވިދާޅުވެއްޖެއެވެ.

އިންޑިއާގެ އެގްޒިމް ބޭންކުން ރާއްޖެއަށް ދީފައިވާ 800 މިލިއަން ޑޮލަރުގެ ކްރެޑިޓް ލައިންގެ ދަށުން ހިންގަން ހަމަޖައްސާފައިވާ ހަނިމާދޫ އެއާޕޯޓްގެ މަޝްރޫއުގެ މަސައްކަތް ސަރުކާރުން އިންޑިއާގެ ޖޭއެމްސީ ޕްރޮޖެކްޓްސްއާއި ރޭގައި ހަވާލުކޮށްފައިވާއިރު، އެ މަޝްރޫއަށް 136.6 މިލިއަން ޑޮލަރު (2.1 ބިލިއަން ރުފިޔާ) ހޭދަވާނެ ކަމަށް ސަރުކާރުން ބުނެފައިވެއެވެ.

އެކަމާއި ގުޅިގެން ޠާރިގު ކުރެއްވި ޓުވީޓެއްގައި ވިދާޅުވީ، ހަނިމާދު އެއާޕޯޓް ތަރައްގީ ކުރުމުގެ ޕްރޮޖެކްޓްގެ އަގު ކަމައްވާ 2.1 ބިލިއަން ރުފިޔާ އަކީ ގާތްގަނޑަކައް އެކަހަލަ 3 އެއާޕޯޓް ތަރައްގީ ކުރެވޭނެ ވަރުގެ އަގެއްކަމަށެވެ.

"މިއީ މި ސަރުކާރުން ވަރައް ޒިންމާދާރުކަން ކުޑަކޮއް، ދިވެހިންނައް ބުރަ  އުފުލަންޖެހޭ ގޮތައް ކުރިއައް ގެންދާ ޕްރޮޖެކްޓެއް!" ޠާރިގު ވިދާޅުވިއެވެ.

ހަނިމާދޫ އެއާޕޯޓް ތަރައްގީ ކުރުމަށް ބޮޑު އަގުގައި އިންޑިއާގެ ޖޭއެމްސީ ޕްރޮޖެކްޓްސްއާއި ހަވާލު ކުރުމާއި ގުޅިގެން އިދިކޮޅު ގިނަ ފަރާތްތަކުން އަންނަނީ ސަރުކާރަށް ފާޑުވިދާޅުވަމުންނެވެ. އެގޮތުން، ފާޑުވިދާޅުވެ ޕީއެންސީގެ ނައިބު ރައީސް އަދި މާލެސިޓީގެ ހުޅުމާލޭ ދާއިރާގެ ކައުންސިލަރު އިބްރާހިމް ޝުޖާއު ކުރެއްވި ޓުވީޓެއްގައި ވަނީ، އެ މަސައްކަތް ހަވާލު ކުރެވުނު ކުންފުންޏަކީ އެކަން ކުރުމުގެ ގާވިލުކަންވެސް ނެތް ކުންފުންޏެއް ކަމަށް ވިދާޅުވެފައެވެ. އަދި އެފަދައިން ކަންތައް ކޮށްގެން ރައްޔިތުން ގުނބޯ ހައްދަން ހެޔޮ ނުވާނެ ކަމަށްވެސް އޭނާ ވިދާޅުވި އެވެ.