މި ސަރުކާރުގެ ހަތަރު އަހަރުގައި މަސްވެރިންގެ މައްސަލަތައް ވީ އިތުރުކަމަށް ޕީޕީއެމްގެ ނައިބުރައީސް އަދި މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވެއްޖެއެވެ.
މަސްވެރިންނަށް ކުރިމަތިވެފައިވާ މައްސަލަތަކަށް ހައްލު ހޯދާދިނުމަށް ގޮވާލާ އިދިކޮޅުން ވަނީ ރޭ އިހުތިޖާޖުކޮށްފައެވެ.
އެ އިހުތިޖާޖުގައި ވާހަކަދައްކަވަމުން ޝިޔާމު ވިދާޅުވީ މާތް ރަސްކަލާނގެ ރަހުމަތްފުޅާއެކި ރާއްޖޭގައި މަސްވެރިކަން އަނެއްކާވެސް ތިޔާގިވެފައިވާކަމަށެވެ.
މަސްވެރިންނަކީ ރާއްޖޭގެ އިގްތިސާދަށް ހަކަތަ އިތުރުކުރުމަށް ބުރަ މަސައްކަތްތަކެއް ކުރާ ބައެއްކަމަށާއި، މިހާރު ވެރިކަމުގައި ތިބީ މަސްވެރިންނަށް ވަރަށް ގިނަ ވައުދުތަކެއް ވެގެން އައި ބައެއްކަމަށް ޝިޔާމު ވިދާޅުވިއެވެ.
އެއާއެކު އޭނާ ވިދާޅުވީ މި ސަރުކާރަށް ހަތަރު އަހަރު ވެގެން ދިޔައިރު މަސްވެރިންނަށް ދިމާވެފައިވާ ަމއްސަލަތައް ހައްލުކޮށް ނުދެވުނު ތާގައި މަސްވެރިންގެ މައްސަލަތައް ވީ އިތުރުކަމަށެވެ.
"މަސްވެރިންނަށް ހަމަ އަގު ހޯދާދޭނެ ވާހަކައާއި ކަންނެލި ޖަގަހަތަކެއްގެ ވާހަކައާއި، ގޭދޮށު މަސް ފެކްޓްރީގެ ވާހަކައަކާއި، ނޫ އިގްތިސާދުގެ ވާހަކަ، މިއީ ރައީސް އިބްރާހިމް މުހައްމަދު ސޯލިހު އޭރު ދައްކަމުން ދިޔަ ވާހަކަ. އެއީ ކެމްޕޭނުގައި މަސްވެރިންނަށް އޮޅުވާލުމަށްޓަކައި ދެއްކި ވާހަކަކަން މިއަދު އަޅުގަނޑުމެންނަށް އެނގެނީ. ހަތަރު އަހަރުވެގެން ދާއިރުވެސް މަސްވެރިންގެ މައްސަލަތަކަށް އެއްވެސް ހައްލެއް ނުލިބޭ. މަސްވެރިންގެ މައްސަލަތައް ވީ އިތުރު"
ޕީޕީއެމްގެ ނައިބުރައީސް ޝިޔާމު
ޝިޔާމުގެ ވާހަކައިގައި ވަނީ 2018 ވަނަ އަހަރުގެ ރިޔާސީ އިންތިޚާބުގައި އެމްޑީޕީއާއި، އެ ޕާޓީއަށް ބައިޢަތު ހިފައިގެން ހެދި ކޯލިޝަނުން މަސްވެރިންނަށް ވަރަށް ބޮޑަށް އޮޅުވާލާފައިވާކަމަށް ވިދާޅުވެފައެވެ. އަދި މަސްވެރިން މިއަދު އުފުލަމުންދާ ތަކުލީފުތަކުގެ ފުރިހަމަ ޒިންމާ އެމްޑީޕީއިން މިއަދު ނަގަން ޖެހޭކަމަށް ޝިޔާމުގެ ވާހަކައިގައި ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
